ده‌ڤه‌را به‌رواری بالا ئێكه ژ وان ده‌ڤه‌رێن ژ روویێ كه‌شوهه‌وای ڤه ناڤنجی و هوین، ئه‌ڤ یه‌ك بوویه ئه‌گه‌ر كو جووتیار و وه‌لاتیێن ده‌ڤه‌رێ رێژه‌یه‌كا باش یا به‌رهه‌مێ گێلاسێ بچنن، د نوكه دا بازاریِ وان گه‌رمه، به‌لێ وه‌ك جووتیار دده‌ن دیاركرن ب ئه‌رزانی دهێنه فرۆتن.
ژ ئه‌گه‌رێ هاتنا به‌رهه‌مێ گێلاسا بیانی بۆ هه‌رێما كوردستانێ ب ئه‌رزانی دهێنه فروت
كاوار هروری جووتیاره‌كێ گوندێ هرورێ یا سه‌ر ب ده‌ڤه‌را به‌رواری باڵایه بۆ "وشه" گۆت، ل ڤان سالێن دوماهیێ پشكه‌ك ژ جووتیارێن ده‌ڤه‌را به‌رواری باڵا ده‌ست ب چاندنا به‌رهه‌مێ گێلاسێ كرییه.
زێده‌تر گۆت "مه ل گوندێ خوه باغه‌كێ مه‌زن یێ گێلاسا چاندییه و چه‌ند رۆژه كه‌فتینه به‌رهه‌می، سوپاس بۆ خودێ به‌رهه‌مه‌كێ باش ژی دایه و رۆژانه یان دوو رۆژان جاره‌كێ، نێزیكێ 40 سندووقا ره‌وانه‌ی بازاڕی ل دهۆكێ و ده‌ورۆبه‌ران دكه‌ین و بازاڕ ژی گه‌رمه، به‌لێ جهێ داخێیه ژ ئه‌گه‌رێ هاتنا به‌رهه‌مێ گێلاسا بیانی بۆ هه‌رێما كوردستانێ ب ئه‌رزانی دهێنه فروتن"
ناڤبری دیاركر ژی كو ژ ئه‌گه‌رێ بۆردمانێن توركیا ئه‌و نه‌شێن ب شه‌ڤ بچنه ناڤا ره‌ز و بیستان و باغاتێن خوه یێن گێلاسا و گۆت ژی، "داخوازێ ل جهێن شوله‌ژێ ده‌ین كو دده‌ما پێگه‌هشتنا به‌رهه‌مێ گێلاسا خومالی، هه‌ڤكارییا جووتیاران بكه‌ن و نه‌هێلن به‌رهه‌مێ بیانی بهێته هه‌رێمێ داكو زیان ب جووتیاران نه‌كه‌ڤن، پرانییا به‌رهه‌مێ گێلاسا ده‌ڤه‌را به‌رواری بالا دكه‌ڤیته گوندێ هرورێ، تروانیش، مایێ و دێریشكێ"
به‌ختیار عه‌بدوڵا فرۆشیاره‌كێ فێقییه ل دهۆكێ بۆ "وشه" گۆت، ل بازاڕێن دهۆكێ هه‌موو جوره فێقیێ بیانی هه‌یه، به‌لێ د به‌رانبه‌ر ژی دا پرانییا ورێن فێقیێ خومالی هه‌یه، ئێك ژ وان به‌رهه‌مێ گێلاسێیه.
زێده‌تر گۆت "گێلاسا به‌رواری باڵا ره‌نگ و تامه‌كا جودا و جیاواز هه‌یه و خه‌ڵكێ ده‌ڤه‌رێ گه‌له‌ك حه‌ژێ دكه‌ن، هه‌رچه‌نده رۆژانه ناگه‌هیته مه، به‌لێ ده‌ما دهێت هه‌ر زوو دهێته فروتن، نوكه د بازاڕی دا كیلیوا به‌رهه‌مێ گێلاسا به‌رواری باڵا و یا بیانی ژی ب دوو هزار دینار بۆ سێ هزار دینار دهێته فروتن، كێشا سه‌ره‌كی یا گێلاسێ ئه‌وه، به‌رهه‌مێ خومالی تێرا بازاری ناكه‌ت له‌وا به‌رهه‌مێ بیانی دهێت و ئه‌ڤ یه‌ك كارتێكرن ل سه‌ر بهایێ به‌رهه‌مێ خومالی كرییه"
ده‌ڤه‌را به‌رواری باڵا پێكدهێت ژ 76 گوندان، ژ ئه‌گه‌رێ بۆردمانێن توركیا 14 گوند هاتینه چولكرن و زیانێن زۆر ب جووتیارێن ده‌ڤه‌رێ كه‌فتییه.