بەردەوامبوونی ململانێی ئەمەریكا و ئێران لەسەر خاكی عێراق زۆرتر بووە و ئەوەش زیانی بە پێگە و سەروەریی عێراق گەیاندووە، شرۆڤەكارانی سیاسی دەڵێن، كازمی ناتوانێ كارێك بكات ئەو دەوڵەتانە ڕێز لە سەروەری عێراق بگرن و هاوسەنگیی هێزی وڵاتان بپارێزێت.
چواس حەسەن شرۆڤەكاری سیاسی بۆ "وشە" ڕای گەیاند، عێراق بۆ ئەمەریكا و ئێران بووەتە خەتێكی بەرژەوەندی و ڕوبەڕووبوونەوەی هەردوولا، كێشە و ململانێی نێوان ئەمەریكا و ئێران ڕەنگدانەوەیەكی قووڵی هەیە بەسەر عێراق، ئەوەش وای كردووە دۆخی عێراق لە ڕووی ئابووری و تەناهی و سیاسی و پێوەندی عێراق لەگەڵ وڵاتانی دەوروبەری بەردەوام خ‌راپ ببێت.
کازمی پێشتر سەردانی تارانی كردووە و بڕیاریشە 20ی ئەم مانگە چاوی بە دۆناڵد ترەمپ بكەوێت
ئەو بە پێویستی دەزانێ لە ململانێی ئەمەریكا و ئێران، عێراق بێلایەن بێت. مستەفا كازمی هەوڵی ئەوە دەدات هاوسەنگییەك بدۆزێتەوە. ئەو پێشتر سەردانی تارانی كردووە و بڕیاریشە 20ی ئەم مانگە لە كۆشكی سپی چاوی بە دۆناڵد ترەمپ بكەوێت و پێیان بڵێت جاران دەگونجا دەست لە ناوخۆی عێراق وەربدەن، بەڵام ئێستە ناگونجێت عێراق وەك بەشێك لە پرۆگرامی خۆیان تەماشا نەكەن. ئەو بە ئەستەمی دەزانێت وڵاتەكان ڕێز لە قسەكانی كازمی بگرن، چونكە نە لە پەرلەمان هێزی هەیه و نە حزبی لە پشتە، ئەوەی هەیە دەنگێكی شەقامە.
چواس حەسەن روونی كردەوە ئێران لە عێراق شیعەكانی بەدەستەوەیه و لە پەرلەمان بەهێزە و دەتوانێ هەركات بیەوێت لە پەرلەمانەوە متمانە لە كازمی وەربگرێتەوە، لەلایەكی ترەوە هێزەكانی حەشدی شەعبی لایە و هێزێكی چەكدارە و ناوچەی جیۆگرافی فراوانی لە بندەستە، مەگەر ئەمەریكا و ئێران خۆیان بیانەوێ هاوسەنگی لە عێراق ڕاگرن، ئەگەرنا كازمی هیچی پێ ناكرێت. بۆ نموونە باسی لە هەڵبژاردنی پێشوەختە كرد كە تەنیا قسەیەك بوو و فڕێی دایە سەر شەقام.
لە لایەكی ترەوە دكتۆر نەدا مێرگەسۆری شرۆڤەكاری سیاسی بە "وشه"ی ڕاگەیاند، زەوینەسازی وا نەكراوە بتوانرێ هاوسەنگی هێز لە نێوان ئەمەریكا و ئێران ڕابگیرێت، هەستی مەزەوی لە عێراق و لە لایەن شیعەكان زیاتر بەرەو ئێرانە، بۆیە ئەوە ڕاستییەكەیە، بۆیە مستەفا كازمی كرایە سەرۆك وەزیران بۆ ئەوەی بەشێك لەو كێشانەی هەیە لە عێراق چارەسەر بكات، بەڵام لەو ماوەیەی كە سەرۆك وەزیران كازمی ھاتووەتە سەر تەختی دەسەڵات، نەیتوانیوە هاوسەنگی ڕابگرێت، جگە لەوەی كە نەیتوانیوە كێشەكانی ناو گۆڕەپانی سیاسیی عێراقیش چارەسەر بكات. هەژموونی وڵاتە هەرێمییەكان ھەروەك خۆیەتی و كەم نەبووە. جگە لەمانە میلیشیا لە عێراق زیاتر دەسەڵاتدارە تا حكوومەت.
ئەو بە پێویستی دەزانێ هەموو سەرۆك وەزیرانەكان كە دێنە سەر حوكم هاوسەنگی رابگرن، لەماوەی ڕابردوو زۆری نەمابوو عێراق بكرێتە گۆڕەپانێكی رژدی شەڕ و ململانێی توندی وڵاتە زلهێزەكان. مێرگەسۆری دەڵێت "عێراق ئەوەندە تێكەڵ و ئاڵۆز بووە، بە دووری دەبینم كازمی بتوانێت هاوسەنگی ڕابگرێت، سەرباری ئەوەی سەردانی ئێرانی كردووە و لە چەند ڕۆژی ئایندەش سەردانی ئەمەریكا دەكات.
ئەمەریكا لە بەرانبەر ئەو قوربانییەی لە عێراق داویەتی دەیەوێ سوود لە عێراق ببینێت
ئەمەریكا بە هاوكاری دەوڵەتانی هاوپەیمانی عێراقی لە دیكتاتۆریی ڕزگار كرد، ئەمەریكا لە بەرانبەر ئەو قوربانییەی لە عێراق داویەتی دەیەوێ سوود لە عێراق ببینێت و بەرژەوەندییەكانیشی لە ناوچەكە بپارێزێت، دەیەوێ هەژموونی ئێران لە عێراق و ناوچەكە كەم ببێتەوە.
بەگوتەی مێرگەسۆری عێراق شوێنێكی ستراتیجییە، ئێران لە بیروباوەڕی مەزەوی خۆی نزیكتر دەبینێت لە عێراق تا ئەمەریكا، بەرژەوەندی هەردوو وڵات هەیە لە ڕووی ئابووری و سیاسی و جیۆگرافی، ئەوە گرنگە عێراق بەرژەوەندییەكانی خۆی لە پێش بەرژەوەندی وڵاتەكانەوە ببینێت و بە یەك مەودا سەیری وڵاتان بكات.
هەڵەبجە / عەزیز ڕەسووڵ