گه‌نجه‌كێ زاخۆى ب هونه‌رێ دارتاشیێ ئه‌لمانیا حێبه‌تى كرنه‌

:: PM:12:31:09/08/2020 ‌
گه‌نجه‌كێ باژێرێ زاخۆ بناڤێ (ره‌مه‌زان ره‌شید / كوچه‌ر) كو نوكه‌ ل وه‌لاتێ ئه‌لمانیا دژیت، ده‌سته‌كێ بالا د هونه‌رێ دارتاشى و چێكرنا دیكور و نه‌خش و وێنه‌یان ل سه‌ر داران هه‌یه‌، خه‌لكێ وه‌لاتێ ئه‌لمانیا حێبه‌تى كریه‌ و د نوكه‌ دا پترى شه‌ش جورێن هونه‌رى ل سه‌ر دارتاشیێ دزانیت.
وێنه‌ و نه‌خشه‌یێن كاغه‌زى ل سه‌ر داران كوپى دكه‌م

ره‌مه‌زان ره‌شید بۆ "وشه‌" گۆت، هه‌ر چه‌نده‌ ل كوردستانێ ژى  كارێ هونه‌رێ دارتاشى و چێكرنا نه‌خش و وێنه‌یان ل سه‌ر داران د سه‌رێ من دا بوو، به‌لێ ب شێوه‌ییه‌كێ گشتى پشتى كو ل سالا 2015 چویمه‌ ئه‌لمانیا ب ره‌نگه‌كێ به‌رفره‌هـ و زانستیانه‌ چومه‌ دناڤا هونه‌رێ دارتاشیێ دا.

زێده‌تر گۆت "كارێ من یێ سه‌ره‌كى د ژیانێ دا، دارتاشى یه‌، د نوكه‌ دا من ده‌سته‌كێ باش هه‌یه‌ و شیانێن زۆر بۆ چێكرنا وێنه‌ و نه‌خشان ل سه‌ر داران هه‌یه‌، دار ل وه‌لاتێ ئه‌لمانیا زۆر گرنگى یا خوه‌ هه‌یه‌ ژبه‌ركو دار كه‌رسته‌ییه‌كێ پاقژ و جوان و سه‌رنجراكێشه‌ و ب ساناهى تر ره‌فتار ل گه‌ل دهێته‌كرن، بۆ ناڤا مال و جهێن گشتى و دیكوران ژى گه‌له‌ك جوان و ساخله‌مه‌"

ناڤبرى دیاركر ژى كو ئه‌و نوكه‌ كار ل سه‌ر پترى شه‌ش جورێن هونه‌رى ل سه‌ر داران دكه‌ت و گۆت ژى "ئه‌ز وێنه‌ و نه‌خشه‌یێن ل سه‌ر دارى ب قه‌بارێ ئێك ملیم چێدكه‌م كو ئه‌ڤ جورێ هونه‌رى زۆر تایبه‌ت و زه‌حمه‌ته‌ و دیرۆكا وێ دزڤریت بۆ سه‌رده‌مێ فیرعه‌وێن مسرێ و پترى 700 ساله‌ هاتیه‌ ئه‌ورۆپا، د نوكه‌ دا وه‌لاتێ ئه‌لمانى زۆر گرنگى ب ڤى جورێ هونه‌رى دده‌ن، دیسان ئه‌ز كار ل سه‌ر كولانا وێنه‌ و نه‌خشه‌یان ل سه‌ر دارى دكه‌م، هونه‌ره‌كێ دى یێ من ئه‌وه‌ كو ئه‌ز په‌یكه‌رێن بچوك ژى دروست دكه‌م و وێنه‌ و نه‌خشه‌یێن كاغه‌زى ل سه‌ر داران كوپى دكه‌م كو بو موبیلیاتان گرنگییه‌كا زۆر هه‌یه‌، هه‌ردیسان وێنه‌ و نه‌خشه‌یان ب سوتنێ ل سه‌ر دارى دروست دكه‌م، ل گه‌ل چه‌ند هونه‌رێن دى، د ئاینده‌دا كار دكه‌م بۆ جوره‌ هونه‌ره‌كێ دن كو ئه‌و ژى گه‌له‌ك زانستیانه‌ و ئه‌ندازیارانه‌یه‌ ئه‌و ژى ئبوكسید هارس كو ل گه‌ل كاره‌بێ ب شێوه‌یێ بریسى ل سه‌ر داران دهێته‌ چێكرن"

ره‌مه‌زان ره‌شید كو دایكبوویێ 1992 ل زاخۆ و ده‌رچویێ خواندنا پێشه‌ییه‌ و نوكه‌ ل باژێرێ هامبورگ یا ئه‌لمانیا دژیت زێده‌تر گۆت" دارتاشى هونه‌ر و زانسته‌كێ به‌رفره‌هه‌ و پێدڤى یه‌ مرۆڤ خودان مێشكه‌كێ ئارام و پاقژ بیت، به‌رده‌وام كار ل سه‌ر كار و پێشه‌ و نووترین جور و شێوه‌یان بكه‌ت، د ده‌ما بورى دا من دوو پێشانگه‌هێن تایبه‌ت ب هونه‌ر و كارێ دارتاشیێ ڤه‌كریه‌ و تابلویێن خوه‌  ب بهایه‌كێ باش ژى فروتنه‌ و خه‌لكێ ئه‌لمانیا گه‌له‌ك گرنگى ب كار و هونه‌رێ من دده‌ن، ئه‌ز كار دكه‌م داكو ببمه‌ ئێك ژ باشترین دارتاشان ل هه‌موو ئه‌لمانیان و سوپاس بۆ خودێ زۆر ل ڤێ یه‌كێ نێزیكم"











وشە - نەوزاد هلۆری

ئه‌م بابه‌ته 255 جار خوێنراوه‌ته‌وه‌‌