بۆ ئێكه‌م جار باله‌فرێن توركیا بۆردمانێن خوه بۆ سنورێ ده‌ڤه‌ردارییا دهۆكێ و ل نێزیك باژێرێ دهۆكێ ڤه‌گوهاست، بڤێ یه‌كێ ترسه‌كا زۆر لده‌ڤ وه‌لاتیان په‌یدا كریه، رێڤه‌به‌رێ ناوچه‌دارییا زاویته ژى دیاركر ئه‌گه‌ر بڤى ره‌نگى بۆردمان به‌رده‌وام بن دێ ژیانا وه‌لاتیان كه‌ڤیته د مه‌ترسیێ دا.
بۆردمانێن توركیا كارتێكرن ل سه‌ر ژیانا وه‌لاتیان و كه‌رتێ گه‌شتوگۆزار كریه
ئه‌ڤرۆ 15ێ ئاب، موشیر محه‌مه‌د، رێڤه‌به‌رێ ناوچه‌دارییا زاویته بۆ "وشه" گۆت، بۆ ئێكه‌مجار باله‌فرێن توركیا بۆردمانێن خوه بۆ نێزیكى باژێرێ دهۆكێ و ناڤا ناوچه‌دارییا زاویته ڤه‌گوهاست.
زێده‌تر گۆت "د ئێك حه‌فتى دا ئه‌ڤه سێ جاران بۆردمانا ده‌ڤه‌رێ هاته‌كرن، ب ره‌نگه‌كێ تنێ 10 بۆ 12كم ل سه‌نته‌رێ باژێرێ دهۆكێ دوره، نوكه زاویته پشكه‌كه ژ دهۆكێ و ب گه‌ره‌كه‌كا دهۆكێ دهێته نیاسین، بۆردمانێن توركیا كارتێكرن ل سه‌ر ژیانا وه‌لاتیان و كه‌رتێ گه‌شتوگۆزار و چاندن و هه‌ر تشته‌كێ كریه، له‌وا دخوازین توركیا و گه‌ریلا ژى شه‌رێ خوه ل ده‌ڤه‌رێ ڤه‌گوهێزن"
حه‌فتیا بورى ل كومه‌لگه‌ها باگێرا ترومبێله‌ك بویه ئارمانج و دوهى ژى ترومبێله‌ك ل گوندێ ره‌شانكێ، پێشتر ژى بوردمان ل نێزیك زاویته هاتبووكرن، بڤێ یه‌كێ ترس لده‌ڤ وه‌لاتیان په‌یدا بویه و خه‌لك زور ب زو نه‌شێن بچنه گونده‌وارێن خوه و ده‌ركه‌ڤن، مشیرى هوسا گۆت.
ئه‌ڤ ساله پترى 120 جاران بۆردمانا سنورێ پارێزگه‌ها دهۆكێ هاتیه‌كرن، د ئه‌نجام دا شه‌ش وه‌لاتى شه‌هید بوینه و سێ ژى برینداربووینه، دیسان سێ گوند ل زاخۆ ژى هاتینه چولكرن و هزاران وه‌لاتى ئاواره بوینه.