پرۆسا ئه‌نفالا ده‌ڤه‌را به‌هدینان كو مه‌زنترین رووبه‌رێ جوگرافى ل هه‌رێما كوردستانێ بخوڤه دگریت، پروسه‌ییه‌كا تمام وێرانكه‌ر یا ژێرخانا مرۆڤایه‌تى و جڤاكى و ئابوورى و سیاسى بو ل هه‌رێما كوردستان و پارێزگه‌ها دهۆكێ، كه‌سوكارێن قوربانیان دده‌ن دیاركرن زێده‌بارى ئه‌و داخوازا مافێن خوه‌یێن ماددى و مه‌عنه‌وه‌ى ل جهێن شوله‌ژێ دكه‌ن، هه‌ڤده‌م دخوازن كو پارت و لایه‌نێن سیاسیێن كوردستانێ ئێكگرتى بن داكو ئه‌ڤ كریاره دووباره نه‌بن.
كه‌سوكارێن ئه‌نفالكریان داخوازن سیاسیێن كوردستانێ ئێكگرتى بن
جویرا ئەحمەد، ژنه‌كا ده‌ڤه‌ردارییا سێمێل یا سه‌ر ب پارێزگه‌ها دهۆكێ یه و هه‌ڤژین و پێنج كور و تیه‌كێ وێ د پرۆسه‌یا ئه‌نفالا ده‌ڤه‌را به‌هدینان شه‌هید بوینه بۆ "وشه" دیاركر كو پرۆسا ئه‌نفالا ده‌ڤه‌را به‌هدینان خاله‌كا ره‌ش و وێرانكه‌ر بوو، بۆ ژناڤبرنا قه‌وارێ كوردستان و ره‌گه‌زێ كورد ل كوردستانێ، به‌لێ ئیرادا كوردستانێ ژ وێ یه‌كێ مه‌زنتر بو و نه‌هاته ژناڤبرن.
زێده‌تر گۆت "هه‌ڤژینێ من ل گه‌ل زه‌لامێن دى یێن گوندێ سەرێ کانیێ (راس العین) یا سه‌ر ب ده‌ڤه‌را مانگێش ل نێزیك دهۆكێ مینا پرانیا گوندێن دى یێن كوردستانێ پێشمه‌رگه بوون و چه‌كێ شه‌ره‌فێ ل ملى بو و به‌ره‌ڤانى ل ئاخا كوردستانێ د كر، به‌لێ جهێ داخێ یه ده‌ما كو پرۆسا ئه‌نفالێ ل سالا 1988 ل ده‌ڤه‌را به‌هدینان ده‌ست پێ كرى و گونده‌وارێن مه ژى مینا گوندێن دن كه‌فتینه به‌ر هه‌وا ئه‌نفالێ، مه بزاڤ كر خوه ل ده‌ستێ رژێمێ رزگار بكه‌ین و ل گه‌ل خه‌لكێ دى ئاواره بین، به‌لێ جهێ داخێ یه رزگار نه‌بوین و كه‌فتینه ده‌ست رژێما به‌عس"
ده‌ستپێكێ ل گه‌ل خه‌لكێ گوندى بو قوتابخانه و ئاڤاهیان ل ناوچه‌دارییا مانگێش هاتنه ڤه‌گوهاستن، پاشان بۆ كه‌لها نزاركێ ل دهۆكێ، ل كه‌لها نزاركێ ژن و زه‌لام ل هه‌ڤدوو هاتنه جوداكرن، جهێ داخێ یه هه‌موو جورێن ئه‌زیه‌ت و سزا و نه‌خۆشى ل گه‌ل زه‌لامان هاتنه بكارئینان و ده‌نگێ هه‌واریێن وان ب سه‌ر كه‌لهێ دا دچو، پشتى چه‌ند رۆژكا ژن و زه‌لام هه‌موو پێكڤه بۆ كه‌لها سه‌لامیێ هاتنه ڤه‌گوهاستن، دیسان ل وێرێ ژى هه‌موو جوره سزا و نه‌خۆشى دانه به‌ر زه‌لامان و هێلانه دوان سزایان دا، جویرایێ هوسا گۆت.
جویرا ئەحمەد، هه‌ڤژین و دایكا پێنج شه‌هیدان د درێژاهیا ئاخفتنێن خودا دیاركر ژى كو پشتى كه‌لها سه‌لامیێ ئێدى ئه‌وێ هه‌ڤژین و كورێن خوه ل گه‌ل تیێ خوه و هژماره‌ك ژ خه‌لكێ دى نه‌دیتن و هه‌تا نوكه ژى نه‌دیتنه و تنێ دزانیت كو هه‌موو هاتینه شه‌هیدكرن و زێده‌تر گۆت "ئه‌م دخوازین كو بریارا دادگه‌ها تاوانان ل عیراقێ بچیته دوارێ بجهكرنێ دا و هه‌موو تاوانبارێن پرۆسا ئه‌نفالێ بگه‌هنه سزایێ خوه، دیسان دخوازین كه‌سوكارێن ئه‌نفالكریان بهێنه قه‌ره‌بوكرن ب ماددى و مه‌عنه‌وى و روفاتێن ئه‌نفالان ڤه‌گه‌رینن باوه‌شا كوردستانێ و سالانه ب رێیا چالاكیێن جودا رێز ل كه‌سوكارێن قوربانیان بهێته گرتن، د نوكه دا داخوازیا مه‌یا سه‌ره‌كى ئه‌وه كو هێز و لایه‌نێن سیاسیێن كوردستانێ ب ئێك ده‌نگ و ئێك ره‌نگ هه‌ڤگرتى بن بۆ پاراستنا قه‌وارێ كوردستانێ، ژبه‌ركو هه‌موو وان شه‌هید و ئه‌نفالكریان بۆ پاراستنا قه‌وارێ كوردستانێ و ئازادیا نوكه ئه‌م تێدا گیانێ خوه كریه قوربانى"
جویرا، نوكه ل سه‌نته‌رێ ده‌ڤه‌ردارییا سێمێلێ ل گه‌ل ئه‌و زاروكێن خوه‌یێن مایى دژیت و دده‌ما خوه دا گه‌له‌ك ماندوبوون و زه‌حمه‌ت و قوربانیدان بریه، به‌لێ تا نوكه هیچ لایه‌نه‌كێ شوله‌ژێ خوه ب كاغه‌ز ژى رێز ل وێ نه‌گرتیه.