بۆ ئێكەمجار ل پارێزگەها دهۆكێ جڤاتەكا تایبەت ب زەردەشتیان بناڤێ یەسنا ل باژێرێ دهۆكێ هاتە راگەهاندن، نونەرا جڤاتێ ژی ددەت دیاركرن كو جڤات دێ گرنگیێ ب هزرا زەردەشتیان دەت.
چەندین پەرتوك و نامیلكەیێن تایبەت ژی ب هزرا زەردەشتی هاتنە بەلاڤكرن
هێلین چیا، نوونەرا جڤاتا یەسنا ل دهۆكێ بۆ "وشە" دیاركر كو جڤاتا یەسنا ل دهۆكێ ئێكەمجارە د دیروكا پارێزگەها دهۆكێ دهێتە راگەهاندن.
زێدەتر گوت "جڤات بۆ ڤەوژاندن و بهێزكرن وخورتكرنا هزر و بیرێن زەردەشتیایە ژلایێ كەلتور و فەرهەنگ و فەلسەفی ڤە، ئەڤرۆ ب بەرهەڤبوونا هژمارەكا كەسایەتی و ئەكادیمیسیەن و جڤاكی و پشتەڤان و لایەنگیرێن فەلسەفا زەردەشتی هات راگەهاندن و بارەگایێ وێ ژی هاتە ڤەكرن"
ناڤبری دیاركر ژی كو دچارچوڤێ ڤەكرنا بنگەهێ جڤاتێ دا هژمارەكا چالاكیان هاتنەكرن و گوت ژی "چەندین گاتا و هزر و بیرێن زەردەشتیان هاتنە خواندن و رێز ل مێهڤانان هاتنە گرتن و چەندین پەرتوك و نامیلكەیێن تایبەت ژی ب هزرا زەردەشتی ل سەر بەرهەڤبویان هاتنە بەلاڤكرن"