ئەمڕۆ شەموو گرووپێكی سەر بە حەشدی شەعبی بەناوی "رەبعەڵا"، تەحەدای تەواوی هێزە تەناهییەكان و حكوومەت و دەوڵەتی عێراقی كرد، لە ناوەڕاستی بەغدا و لەبەرچاوی هێزە تەناهییەكانی عێراق هەڵیان كوتایە سەر بارەگای لقی پێنجی پارتی دیموكراتی كوردستان و بارەگاكە و هەردووئاڵای كوردستان و پارتیان سووتاند، ئەوەیش دیمەنی بەغدای پایەتەختی وەك شارێكی وێران لە رووی تەناهی هێنا بەرچاو، كە گرووپە میلیشیاییەكان كۆنترۆڵ و ئاراستەی دەكەن، لەلایەكی تر چەندان هێزی سیاسی سەركۆنەی ئەو هێرشەیان كرد و داوای كۆنترۆڵكردنی ئەو گرووپ و دۆخەكەیان كرد.
عێراق روو لە ترازانە و سوننە و كورد گەشە دەكەن و شیعە زەلیل دەبن
ئەیاد عەلاوی، سەرۆكی هاوپەیمانی وەتەنییە هێرشەكەی بە دەستدرێژیكردن بۆ سەر موڵكوماڵی گشتی و تایبەت و بە حەرامكراو وەسف كرد، لە تویتێك نووسیویەتی، لە دۆخێكی هەستیاردا كە زیاتر پێویستیمان بە سەرخستنی ئەقڵ و میانڕەوی و چەسپاندنی ناوەڕۆكی بەیەكەوەژیانی هاوبەش هەیە، بۆیە ترازانی یەكێتی نیشتمانی و دەستدرێژیكردن بۆ سەر موڵكوماڵی گشتی وە تایبەت خزمەت بە وڵات ناگەیەنێت و لە حەرامكراوەكانە، بۆیە وڵات بەرگەی ململامێی زیاتر ناگرێت، بەتایبەتی لەلایەن ئەوانەی قوربانیان دژ بە دیكتاتۆریەت دا و جەنگی داعشیان كرد.
لای خۆیەوە حزبی حەل، سەركۆنەی سووتاندنی بارەگای لقی پێنجی پارتی دیموكراتی كوردستانی لە بەغدا كرد و ئەوەی رووی دا هەڕەشەیە بۆ سەر پرۆسەی دیموكراسی لە عێراق كە لەسەر بنەمای فرەیی و ئازادی دەربڕین بنیات نراوە، ئەو حزبە لە بەیاننامەیەكدا دووپاتی كردەوە، دووبارەبوونەوەی دیاردەی سووتاندنی بارەگا و موڵكوماڵی گشتی و تایبەت و میدیاكان و دەمبەستن بێ بوونی بەربەستێكی تەناهی، گومان دەخاتە سەر توانای هێزە تەناهییەكانی حكوومەت بە سەپاندنی دەسەڵاتی یاسا و پاراستنی ئاسایشی هاووڵاتییان و فرەحزبی و رێگرتن لە كاری سووتاندن و تێكدان و نەرمی نواندن بەرانبەر ئەنجامدەران.
هەروەها سەرۆكی حكوومەت دەخاتە بەردەم بەرپرسیایەتی پاراستنی فرەیی و دیموكراسیەت، دووپاتی كردەوە بە پێویستی بیركردنەوەی رژد لە كاری سیاسی لە سایەی ژینگەیەكی سیاسی سەقامگیر رێخۆشكەر بێت بۆ هەڵبژاردنێكی پێشوەختە دوور لە هەڕەشەی چەك و لەدەستدەرچوونی تەناهی، بۆیە داوای بڵاوكردەوەی كولتوروی رێزگرتن لە ئازادی دەربڕین و بۆچوونی بەرانبەر بێ هێرشكردنە سەر دامەزراوەكان و كەسایەتییە نیشتمانییەكان، بە شێوەیەك بەیەكەوەژیانی ئاشتیانە و كۆمەڵگەیی بپارێزێ و هاوبەشی و كاری سیاسی هاوبەش و بنەماكانی بنیاتنانی دەوڵەتی هاووڵاتیبوون بێتە پاراستن.
هاوپەیمانی "نەسر"، بە سەرۆكایەتی حەیدەر عەبادی سەركۆنەی هێرشەكەی سەر بارەگا و موڵكوماڵی گشتی و تایبەت كرد و داوای یەكێتی نیشتمانی كرد، هاوپەیمانیەتییەكە لە بەیاننامەیەكدا رای گەیاند، دەستدرێژیكردنە سەر بارەگا و موڵكوماڵی گشتی و تایبەت لە بەغدا شوێنەكانیتریش و سیاسەتی سووتاندنی ئاڵا رەت دەكەینەوە و هەر پەرەسەندێكی لەو شێوەیە یەكێتی نیشتمانی لاواز دەكات.
زیاتر گوتی، داوا لە حكوومەت دەكەین بەرپرسیارەتی بگرێتە ئەستۆ بۆ پاراستنی ئاسایش و سەقامگیری و سەپاندنی دەسەڵاتی دەوڵەت، هەریەك لە حەشدی شەعبی و پێشمەرگە لەپاڵ یەكتر لە دژی تیرۆر جەنگیان كرد و دانایی نییە ئێستە دوژمنداریەتی لە نێوان دروست بێ و بۆ ئەجیندای سیاسی و هەڵبژاردن بەكاربهێنرێن، بۆیە هەموو ئاستە سیاسییەكان پێویستە وریا بن لە لێدوانەكانیان یان ئەنجامدانی كارێك كە ئاشتەوایی و یەكێتی نیشتمانی بشێوێنێت، بەتایبەتی لەم رۆژانە كە وڵاتە رووبەڕووی كێشەی چارەنووسساز بووەتەوە.
لای خۆیەوە حزبی ئیسلامی عێراق وای بینی كە سووتاندنی بارەگای لقی پێنجی پارتی لە بەغدا كارێكی رەتكراوەیە و قبووڵكراو نییە، بۆیە بینە و بەردەی سیاسی و تۆمەت گۆڕینەوە و پەرەسەندنی بەرەو سووتاندنی بارەگای حزبەكان، چەسپاندنێكی نەرێنی كولتووری زاڵكردنی هێزە بەسەر گفتوگۆ و نەیاری بەسەر دانوستان، بۆیە پێویستە هەموو هێزە سیاسییەكان و دامەزراوە حكوومەتییەكان هەموو هەوڵێك بدەن بۆ رێگرتن لە دووبارەبوونەوەی ئەو جۆرە كارانە و وەستاندنی ئەوانەی ئەو كارە دەكەن و لێپرسینەوەی یاسای لەگەڵیان، جا هۆكارەكەی هەرچییەك بێت، چونكە شێوازی چارەسەركردنی ناكۆكییەكان زۆرن.
حزبی ئیسلامی روونی كردەوە، هێرشەكەی ئەمڕۆ ئاماژەیە بۆ لاوازیی حكوومەت و بێتوانایی لە پاراستنی بەشدارانی پرۆسەی سیاسی، كە ئەو بێدەسەڵات بەرانبەر تۆقاندن و هێرشی سەر باڵوێزخانەكان و بارەگای حزبەكان و ماڵی كەسیایەتییە سیاسییەكان بەهۆی جیاوازی بۆچوون وەستاوە، ئەوەیش ئاماژەیە بۆ نەبوونی ئازادی دەربڕین و بۆچوونی جیاواز و سەپاندنی خواست بە زەبری هێز و هەڕەشەكردن، بۆیە ئەگەر بەغدا پایەتەخت بۆ عێراقییەكان سەلامەت نەبێت، بۆ بیانییەكان و مێوانەكان چۆن دەبێت؟، ئایا بۆ بەرژەوەندی كێ ئەو جۆرە كارانە روودەدەن؟، ئایا چارەنووسی پرۆسەی سیاسی و هەڵبژاردنی داهاتوو لەگەڵ ئەو كارە خراپانە چی دەبێت؟.
لای خۆیەوە فایەق شێخ عەلی، پەرلەمانتاری عێراق دەڵێت، دوای هەر جیاوازییەك لە بۆچوون زمانی سووتاندن زاڵە لای میلیشیا شیعەكان، ئەو لە تویتێك نووسیویەتی، لەم رۆژانەدا و بەهۆی سووكایەتییەكانی میلیشیاكان و كاڵفامیان، زمانی دابەشكردن و جیابوونەوە لای كورد و سوننە زاڵە، بۆیە عێراق روو لە ترازانە، ئەوكات سوننە و كورد گەشە دەكەن و شیعەیش زەلیل دەبن و دەبنە بەندە.