گەنج ستونا سەرەکی و بربرا پشتا پێشکەفتنا هەر گەل و وەلاتەکێ یە، دبیتە هێزا سەرەکی یا کاری و پێشڤەبرنا هەمی سکتەرێن ژیانێ، بەلێ ل ڤان چەند سالێن دوماهیێ کێمترین مفا ل شیانێن وان هاتیە وەرگرتن، شارەزایەکێ جڤاکی دیارکر کو گرنگە کەرتێ تایبەت هاریکاریا حوکمەتێ بکەت بو بکارئێخستنا گەنجان.
سەمیع سەدیق، گەنجەکێ شێلادزێ یە دیارکر کو گەنج هێزا سەرەکی یا پێشڤەبرنا گەل و وەلاتی یە و زێدەتر گۆت " گەنج تاکە کەسە کو دشێت د هەمی سکتەرێن ژیانێ دا رولێ خوە ببینیت، دیسان دشێت شیانێن خوە پێشبێخیت و خوە بەرهەڤ بکەت بو رووبرووبوونا هەر ئاستەنگ و ئاریشەکا کو دکەڤیتە د رێیا وی دا ب تایبەتی ئەگەر چ بەرهەڤی بو ئاستەنگان نەهاتبنەکرن"
زێدەتر گوت "ئەز گەنجەکم و سێ سالە ل زانکویێ دەرچویم، زێدەباری کو د کەرتێ حوکمی دا هاتیمە بێ بەهرکرن کو رولێ خوە ببینم، دهەمان دەم دا هەتا نوکە دەلیڤە دروست نەبویە کو رولێ خوە د کەرتێ تایبەت ژی دا ببینم، بەلێ ل گەل ڤێ یەکێ ژی من ئومێد هەیە کو ل ئایندەیەکێ نێزیک گورانکاری بهێنەکرن و دورا گەنجان ژی بهێت داکو ل پەی بسپوریا خوە خزمەتا جڤاکی و گەل و وەلاتێ خوە بکەن"
دێژین عەبدولخالق، ئهو ژى کچەکا دەڤەرێ یە، دبێژیت "شیانێن گەنجان د رێڤەبرنا هەمی سکتەرێن ژیانێ دا بێ سنوورن، بەلێ نەبونا دەلیڤێن کاری هەمی شیانێن وان مراندن هەتا خوە دەلیڤێن کاری نینن کو گەنجێ مە د کارێن ئازاد ژی دا رولێ خوە ببینیت، ب تایبەتی بو تەخا ئافرەت و کچان، پرانیا کچان پشتی دوماهی هاتنا خواندنێ د مال دا دمینن و پشکەک ژ وان کەفتینە بن کارتێکرنێن دەروونی و جڤاکی و هەموو شیانێن وان مرن"
ئاخچین دوسكى، وەکو بهرپرسا ئهنجۆمهنێ ئافرهتێن ئامێدیێ دیارکر کو بەرپرسیارەتیا دابینکرنا دەلیڤێن کاری بۆ گەنجان تنێ ئەرکێ حوکمەتێ نینە و گۆت "دانەکاری یا گەنجان و پێشڤەبرنا شیانێن وان و مفا وەرگرتن ل بسپوری و هێزا گەنجان ئەرکێ حوکمەت و جهێن شولەژێ یە ل هەمی جیهانێ ژبەرکو حوکمەت مینا دایبابایە د خێزانێ دا کو ئەو ژی ئەرکێ بەرپرسیارەتی و خودانکرنا وایە ب ماددی و مەعنەوی، بەلێ ل گەل ڤێ یەکی ژی پێدڤی یە کەرتێ تایبەت کو ئەو ژی رێکخراو و کومپانی و زەنگین و کەساتیێن پێچێبویە خوە ل گەنجان بکەن خودان و بدەن کاری و نەهێلن بمینن بەتال و بێ کار "
زێدەتر گۆت "ژبلی حوکمەت و کەرتێ تایبەت، پێدڤی یە گەنجێ مە ژى دوڤچونێ بكهت کو رولێ خوە د کارێن ئازاد ژی دا ببینیت، ب تایبەتی د حالەتێن قەیرانا دارایی و ئابووری و شەر و ئالوزیان، ژبەرکو پشکەک ژ گەنجان شەرم دکەن خوە دکارێ ئازاد دا ببینن ب تایبەتی کارێن مینا هوستا، کرێکاری و بهانەیا هندێ من خواندیە و نەشێم پشتی چەندین سالێن خواندنێ کرێکاریێ بکەم، لەورا گرنگە هەتاکو حوکمەت و کەرتێ تایبەت خوە ل مروڤی بکەن خودان، مروڤ رولێ خوە د کارێن ئازاد دا ببینیت ب تایبەتی چاندن و خودانکرنا ترش و کەوال و پێشەیێن جوداجودا، چونکی نابیت مروڤ خوە ل تشتەک بگریت کو هاتنا وێ نەدیارە، بەلێ دوپات دکەین کو پێدڤی یە جهێن شولەژێ بجدی کار بکەن بۆ دابینکرنا دەلیڤێن کاری بو هەموان ب تایبەتی گەنجان چونکی ژیان و پاشەروژەکا نوو د رێیا گەنجان دایە ب تایبەتی پروسەیا هەڤژینیێ و ب رێڤەبرنا خێزانێ"
ناڤبرى د درێژاهیا ئاخفتنێن خودا گۆت ژى "نوكه وهكو ئهنجومهنا ئافرهتان بزاڤان دكهین كو ب رێیا خولێن پێشهى شیانێن جڤاكى ب تایبهتى تهخا ئافرهتان پێبگههینین و پاشان ببن خودان كار و پێشهیێ تایبهت بخوڤه، داكو ل ئاینده بشێن پێدڤیێن خوهیێن ماددى و مهعنهوهى دابین بكهن و پشت بهستنێ بخوه بكهن"
دهۆک/ نەوزاد هلۆری