هه‌ر چه‌نده ئه‌ڤرۆ رۆژا جیهانیا سێنگلاییه، به‌لێ وه‌كو دیاره ئه‌ڤ رۆژه ژى مینا هه‌موو روژێن دى، دێ رۆژه‌كا ئاسایى بیت و ب بێ ده‌نگى بوریت، دنوكه دا نێزیكێ 60% ژ پێكهاته‌یا سه‌ره‌كى یا جڤاكى وه‌كو هژمار سێنگلا بخوڤه دگریت ب تایبه‌تى ل پارێزگه‌ها دهۆكێ.
عه‌زو عه‌زو، سێنگله‌كێ دهۆكێ یه گوت "هه‌موو قانون و رێسایێن ئه‌سمانى و دنیایى به‌حس ل وێ یه‌كێ دكه‌ن كو پێدڤى یه هه‌ر كه‌سه‌ك ده‌ما دگه‌هیته ژیێ پێگه‌هشتنێ دڤێت هه‌ڤژینیێ پێكبینن، به‌لێ دیاره پشتى درۆستبوونا هژماره‌كا قه‌یرانێن دارایى و سیاسى و ساخله‌مى و جڤاكى ژى ل جیهان و كوردستانێ ژى، پێكئینانا هه‌ڤژینیێ ب زه‌حمه‌ت كه‌فتیه له‌وا دكارین بێژین دنوكه دا سێنگلى نیمعه‌ته و ده‌ست هه‌مووان ناكه‌ڤیت"
زێده‌تر گۆت "دجڤاكێ مه دا بارگرانیێن زۆر ژلایێ كچان هه‌مبه‌رى كوران دهێنه‌كرن، دبیته سه‌ده‌م كو كور وه‌كو پێدڤى نه‌شێن هه‌ڤژینیێ پێكبینن، له‌وا جهێن شوله‌ژێ ب رێیا دانا ده‌لیڤێن كارى و پێشینه‌یێن هه‌ڤژینیێ دشێن تا راده‌ییه‌كێ سێنگلا ژ سێنگلیێ داوى بیننن و ژیانه‌كا باشتر بۆ دابین بكه‌ن"
یاسین محه‌مه‌د، وه‌كو شاره‌زاییه‌كێ جڤاكى دیاركر كو پێدڤى یه هه‌ر مرۆڤه‌ك، هه‌موو قوناغێن ژیێ خوه تاقى بكه‌ت و بۆ "وشه" گۆت، بێگومان هه‌ر مرۆڤه‌ك دژیانا خوه دا د پێنج قوناغان دا دبوریت كو ئه‌و ژى زاروكینى، سنێله‌ى، گه‌نجاتى، خێزاندارى و دانه‌مریى بخوڤه دگریت.
زێده‌تر گۆت "ئه‌ڤ قوناغه ل سه‌ر دوو قوناغێن دى هاتینه دابه‌شكرن كو ئه‌و ژى خێزاندارى و سێنگلى یه، بێگومان پرانیا تاكێن جڤاكى ب تایبه‌تى نوكه سێنگلن ئانكو ئه‌وان كه‌سان بخوڤه دگریت كو هێشتا هه‌ڤژینیى و خێزاندارى پێكنه‌ئینایه و ل گه‌ل كه‌سانێن دى دژین مینا دایك و باب و خوشك و برا و كه‌سانێن دى"
ناڤبرى د درێژاهیا ئاخفتنێن خودا دیاركر ژى كو ئێك ژ مه‌زنترین ئاریشه‌یێن هه‌مبه‌رى تاكێ كورد ئه‌وه كو وه‌كو پێدڤى نه‌هاتیه په‌روه‌رده و پێگه‌هاندن و زێده‌تر گۆت "تێكچونا ره‌وشا دارایى و سیاسى و هه‌تا خوه ئه‌من و ئاسایش ژى نابیته بهانه كو سێنگل خوه ژ پرۆسه‌یا هه‌ڤژینیێ دور بكه‌ن، ژبه‌ركو پشتى سالا 2014ێ وێڤه و ل گه‌ل ده‌ستپێكرنا قه‌یران و ئالوزیان ل عیراق و پشكه‌كا كوردستانێ ژى گه‌نج كێمتر ژیانا هه‌ڤژینیێ پێكدئینن و رێژا قه‌یره كورى و كچى به‌ر ب زێده‌بوونه، ئه‌ڤێ یه‌كێ كارتێكرنێن خراپ ل سه‌ر تاكێن جڤاكى و پاشه‌رۆژا وان هه‌یه، له‌وا گرنگه جهێن شوله‌ژێ ب هه‌ر هه‌ول و بزاڤه‌كا بیت جاره‌كا دى دڤێت گه‌نجان په‌روه‌رده بكه‌ت و هه‌ڤكاریا وان ژى بكه‌ت ب تایبه‌تى ژ روویێ دارایى ڤه"
دوو روژێن بورى وشه د پرسیاره‌كێ دا ل سه‌ر تورێن جڤاكى بوچونا 374 كه‌س تێكدا پشكدابوون، نێزیكێ 60% دایه دیاركرن كو ئه‌و سێنگلن و ژیانا هه‌ڤژینیێ پێكنه‌ئینایه، دیسان پترى 40% ژى گوتیه كو ئه‌و خێزاندارن.
ب گوره‌ى ئاخفتنێن شاره‌زایێ جڤاكى، د نوكه دا پشكه‌كا زۆر یا سێنگلا بزاڤێ دكه‌ن بچنه ده‌رڤه‌یێ كوردستانێ و گۆت ژى" پشكه‌كا زۆر یا سێنگلا وه‌كو چاڤلێكرن خوه ل سه‌ر پێكئینانا پرۆسه‌یا هه‌ڤژینیێ بێده‌نگ كریه و ب تورێن جڤاكى ڤه مژولن"
به‌رى چه‌ند رۆژان، رێكخراوا ئه‌لند بۆ دیموكراسیكرنا گه‌نجان ل پارێزگه‌ها دهۆكێ هه‌ڤكارى ل گه‌ل ده‌زگه‌هێ كوردستان یێ خێرخوازى، كونفرانسه‌ك ل بارا چونا گه‌نجان بۆ ده‌رڤه ئه‌نجام دا، تێدا هاته دیاركرن كو پرانیا وان كه‌سێن دخوازنبدچنه ژ ده‌رڤه سێنگلن، ئانكو ژ كوما 750 كه‌سێن پشكدارى د راپرسیار كونفرانسا وان دا كرى، 494 ژ وانان سێنگل بوون، ئه‌ڤه رامانه كو نێزیكێ 66% ژ وان گه‌نجێن دخوازن بچنه ده‌رڤه سێنگلن.
دهۆك/ نه‌وزاد هلۆرى