نوژداره‌كێ كورد ل ئه‌مریكا بۆ "وشه" گۆت، ڤاكسینا فایزه‌ر دێ سنووره‌كێ بۆ به‌لاڤبوونا كۆرۆنایێ دانیت
ده‌ما چه‌ند رۆژایه به‌حسه‌كا زۆر ل سه‌ر ڤاكسینا كومپانیا فایزه‌ر یان كومپانیا بایونتێك دهێته‌كرن و ب ڤاكسینه‌كا سه‌ركه‌فتى و باش دهێته نیاسین، نوژداره‌كێ كورد كو نوكه ل ئه‌مریكا دوارێ په‌تا و په‌ژیكان دا كار دكه‌ت دده‌ت دیاركرن، دڤێت هوشیارێ ڤاكسینا فایزه‌ر بین به‌رى كو هیڤێن خوه بگه‌هینه ئاسته‌كێ بلند.
دكتور جه‌گه‌ر جاسم، نوژدار و تایبه‌تمه‌ندێ په‌تا و په‌ژیكا ل ئه‌مریكا بۆ "وشه" گۆت، ده‌مه‌كه به‌حس ل ڤاكسینا فایزه‌ر ل جیهان و ئه‌مریكا و چه‌ند وه‌لاتێن دى ژى دهێته‌كرن كو كارتێكرنه‌كا باش ل سه‌ر تووشبوویێن كۆرۆنایێ هه‌یه.
زێده‌تر گۆت "ژ گرنگترین خالێن ئه‌رێنى یێن ڤاكسینا كومپانیا فایزه‌ر ئه‌وه كو ئه‌ڤ ڤاكسینه ل سه‌ر نێزیكێ 43 هزار كه‌سان هاتیه تاقیكرن كو ئه‌ڤ هژمارا سێمپلا هژماره‌كا زۆرا مه‌زنه، ئه‌و كه‌سێن كو هاتینه تاقیكرن ژى ژ هه‌موو ته‌خ و چینێن جڤاكى و ته‌مه‌نان بوون و كارتێكرنا وێ یا باش پتره ژ 90% كو ئه‌ڤ یه‌ك ژى پێنگاڤه‌كا هه‌رى باشه د نوكه دا و چوو زیانێن مه‌زن ژى نینن"
خالا نه‌رێنى یا ڤاكسینا كومپانیا فایزه‌ر ئه‌و كو ئه‌و داتایە هاتینە بەلاڤکرن ژلایێ کۆمپانیا ناڤبرى نە هاتنە تاقیکرن ژلایێ بسپۆرێن بێ لایەن ڤە و نەهاتینە بەلاڤکرن ژى د جۆرنالێن زانستی دا، نه‌یا دیاره كا دێ بۆ ده‌ما چه‌ند رۆژان به‌رگریێ ڤه‌كێشیت و ره‌نگه ئه‌و كه‌سێن پشكدارى د تاقیكرنێن زانستى یێن كومپانیا ناڤبرى دا كرى هه‌موو ئه‌و بن كو ره‌وشه‌نبیریا ساخله‌میى هه‌یى و پێگیرترن ژ وان كه‌سێن كو دویرن ژ بكارئینانا ده‌مامك و رێنمایێن ساخله‌میێ و ئه‌و كه‌سێن كو هاتینه تاقیكرن دبیت كێمتر ژ خه‌لكێ دى تووشى ڤایرۆسا كۆرۆنایێ ببن و ئه‌ڤ یه‌ك ژى ئاماژه‌یه كو دبیت نه ژ به‌ر كارتێكرنا ڤاكسینا فایزه‌ر چاك ببن، دكتور جه‌گه‌رى هوسا گۆت.
تایبه‌تمه‌ندێ په‌تا و په‌ژیكا ل دوماهیێ گۆت "ئه‌ڤ جورێ ڤاكسینێ دهێته نیاسین ب جوداهیا هه‌لبژارتى Selection bias ب كورتى ئه‌م دشێن بێژین كو ڤاكسینا فایزه‌ر دێ سنووره‌كێ بۆ به‌لاڤبوونا ڤایرۆسا كۆرۆنایێ دانیت و دڤێت هوشیار بین به‌رى كو هیڤێن خوه بگه‌هینینه ئاسته‌كێ بلند و خه‌یالى".