پرۆژێ تێرمینالا دهۆك یا نیڤده‌وله‌تى، ب مه‌زنترین پرۆژێ تێرمینال ل هه‌رێما كوردستان و عیراقێ دهێته هژمارتن و ل باژێرێ دهۆكێ دهێته دروستكرن، بریاره ناڤه‌راستا سالا بهێت بكه‌ڤیته كارى و دێ هژماركا زۆر یا ده‌لیڤێن كارى بۆ وه‌لاتیان دابین كه‌ت.
سه‌ردار سه‌عید، رێڤه‌به‌رێ پرۆژێ تێرمینالا دهۆك بۆ "وشه" گۆت، پرۆژێ تێرمینالا دهۆك یا نیڤده‌وله‌تى ل سه‌ر رووبه‌رێ 272 هزار مه‌ترێن چوار گوشه ل سه‌ر رێیا نیڤده‌وله‌تى یا دهۆك بۆ سێمێل و زاخۆ ل هه‌مبه‌رى كومه‌لگه‌ها ته‌ناهیێ دهێته دروستكرن.
زێده‌تر گۆت: (تێرمینالا دهۆكێ یا نیڤده‌وله‌تى ئێكه‌مین پرۆژێ وه‌به‌رهێنانێ یه ل سه‌ر ئاستێ عیراق و هه‌رێما كوردستانێ كو ژلایێ كه‌رتێ تایبه‌ت دهێته درۆستكرن، پرۆژه پێكدهێت ژ ئاڤاهییه‌كێ مه‌زن ل گه‌ل گوره‌پانا راوستانا ترومبێلێن ته‌كسى و بارهه‌لگر، ل گه‌ل 56 كوگه‌هێن هه‌لگرتنا كه‌لوپه‌لێن هشك و 55 پێشانگه‌هێن ترومبێلا یێن سه‌رده‌م و ئوتێله‌كا پێنج ستێر و پانزینخانه‌كێ و كافیتریا و خارنگه‌ه و بازاڕ و چه‌ندین پشكێن دى، دنوكه دا پرۆژه 80% هاتیه بجهئینان و بریاره ناڤه‌راستا سالا بهێت داوى بهێت و بكه‌ڤیته كارى"
ناڤبرى دیاركر ژى كو ب داوى هاتنا پرۆژه‌ى دێ پترى سێ هزار ده‌لیڤێن كارى بۆ وه‌لاتیان هێنه دابین كرن و گۆت ژى "تێرمینال جهێ راوستاندنا 250 ترومبێلێن ته‌كسى و 150 ترومبێلێن پاس و 250 ترومبێلێن بارهه‌لگر هه‌یه، دێ وه‌كو هێلا ڤه‌گوهاستنا رێڤینك و نه‌فه‌را دناڤبه‌را دهۆك بۆ هه‌موو پارێزگه‌هێن هه‌رێما كوردستان و عیراقێ هێته بكارئینان، ئه‌ڤه زێده‌بارى ڤه‌گوهاستنا رێڤینكان بۆ توركیا و ئیرانێ و خه‌لك دشێن هه‌ر دناڤ تێرمنالێ دا پلێتان ببرن"
جهێ ئاماژه پێكرنێ یه كو پرۆژه ل سالا 2016ێ ده‌ستپێكریه و ژلایێ كومپانیا كاڤین گرووپ دهێته چێكرن.