پترى 30 ساله ل گونده‌وارێن پارێزگه‌ها دهۆكێ بۆردمان و شه‌ر و ئالووزى دناڤبه‌را توركیا و په‌كه‌كه به‌رده‌وامن، ب گوره‌ى داتایێن تورا هه‌ماهه‌نگى یا رێكخراواین ل هه‌رێما كوردستانێ هه‌تا نوكه 591 گوندێن پارێزگه‌ها دهۆكێ ژ ئه‌گه‌رێ بۆردمانان هاتینه چۆلكرن.
لاوین سه‌ورى، سه‌رپه‌رشتیارێ تورا هه‌ماهه‌نگى یا رێكخراوان ل پارێزگه‌ها دهۆكێ بۆ "وشه" گۆت، ب مه‌ره‌ما دیتنا رێیا چاره‌سه‌ریه‌كا گونجاى بۆ چه‌ند پرسێن هه‌نوكه‌ى ل پارێزگه‌ها دهۆكێ و هه‌رێما كوردستانێ ژ وانان پرسا بۆردمانكرنا گوندێن پارێزگه‌ها دهۆكێ و چونا گه‌نجان بۆ ده‌رڤه و زێده‌بوونا حاله‌تێن ژێكجودابوونا هه‌ڤژینیێ، تورا هه‌ماهه‌نگى یا رێكخراوان كونفرانسه‌كا تایبه‌ت ل باژێرێ دهۆكێ ئه‌نجام دا.
زێده‌تر گۆت"زێده‌بارى تێكچونا ره‌وشا دارایى و ئابوورى و جڤاكى یا هه‌رێما كوردستانێ، هه‌ڤده‌م ژ ئه‌گه‌رێ بۆردمان و شه‌ر و ئالوزیێن دناڤبه‌را توركیا و په‌كه‌كێ، ره‌وشا پشكه‌كا زۆر یا گونده‌وارێن پارێزگه‌ها دهۆكێ ژى ئالوزبوویه، ب گوره‌ى دوڤچونێن مه 591 گوندێن پارێزگه‌ها دهۆكێ كو رێژا 42% ژ كوما گوندێن پارێزگه‌ها دهۆكێ بخوڤه دگریت، هاتینه چولكرن و زیانێن زور یێن گیانى و ماددى به‌ر وه‌لاتیان كه‌فتنه ژبه‌ركو ژین و ژیارا خه‌لكێ وان گوندان ل سه‌ر خودانكرنا ته‌ش و كه‌والى و چاندنێ و ره‌رز و بیستان و چیا و سرۆشت و ژینگه‌هێ بویه، ئه‌ڤه زێده‌بارى كو هژماره‌كا زۆر یا خه‌لكێ وان گوندان ب درێژاهیا سالێن بوردمانێ شه‌هید و برینداربووینه، له‌وا داخوازێ ژ هه‌ردوو ئالیێن توركیا و په‌كه‌كێ ژى دكه‌ین كو بۆردمان و شه‌ر و ئالوزیێن خوه رابگرن و ب ره‌نگه‌كێ ئاشتى و دویر ژ ئاخ و سنوورێ هه‌رێما كوردستان و پارێزگه‌ها دهۆكێ چاره‌سه‌ریا ئاریشه و پرسێن خوه بكه‌ن، داكو زێده‌تر خه‌لكێ ده‌ڤه‌رێ نه‌بیته قوربانى و خه‌لك ژى بشێن بزڤرنه سه‌ر ژین و ژیارا خوه و ئێدى نه‌بن قوربانى و زیاندار ژى نه‌بن"
ب گوره‌ى داتایان، چه‌ند سالێن بورى پترى 150 كه‌س ل پارێزگه‌ها دهۆكێ ژ ئه‌گه‌رێ بۆردمانێن توركیا شه‌هید و برینداربوونه، ملیاران دولار زیان ب خه‌لكێ گوندان كه‌فتنه.