خولی راهێنەرانی پلەی C ئاسیا لە هەولێر كۆتایی هات

دوێنێ شەموو لە شاری هەولێر كۆتایی بە خولی پێشخستنی راهێنەرانی تۆپی پێی كوردستان بۆ وەرگرتنی پلە  C ئاسیا كۆتایی هات.

مەراسیمی كۆتایی لە هۆڵی كۆنگرەی رۆژنامەوانیی یانەی هەولێر بە ئامادەبوونی سەرۆكی یەكەتیی تۆپی پێی كوردستان سەفین كانەبی بەڕێوەچوو.
دوای پێشكەشكردنی چەند وتارێك، بڕوانامەی سەركەوتن و پلەبەندی C لەسەر ئاستی ئاسیا بەسەر 23 راهێنەری بەشداربوو دابەش كرا.

خولەكە بۆ ماوەی 12 رۆژ لە هۆڵ و یاریگەی شەهید فڕەنسۆ هەریری بە هەردوو شێوازی تیۆری و پراكتیكی بەڕێوەچوو، وانەكانیش لەلایەن وانەبێژی عێراقی و ئاسیایی دكتۆر قاسم لەزام پێشكەش كرا.

راهێنەرانی بەشداربوو لە ماوەی خولەكەدا بە شێوازەكانی كاركردنی راهێنەر بۆ پێگەیاندنی یاریزانانی تازەپێگەیشتووان و لاوان ئاشنابوون و نوێترین زانیارییەكانیان وەرگرت.

خولەكە لەلایەن یەكەتیی تۆپی پێی كوردستان و بە هاوكاری یەكەتیی تۆپی پێی عێراق و بە چاودێریی یەكەتیی تۆپی پێی ئاسیا بەڕێوە چوو.

هاوكات لەگەڵ كۆتاییهاتنی خولەكە لە هەولێر، خولێكی هاوشێوە لە سلێمانی دەستی پێ كرد كە راهێنەرانی سلێمانی و دەورووبەری بەشداریی تێدا دەكەن.

لای خۆیەوە سەفین كانەبی سەرۆكی یەكەتیی تۆپی پێی كوردستان لە لاپەڕەی تایبەتی خۆی لە تۆڕی كمەڵایەتی (فەیسبووك) بڵاوی كردەوە: له‌ كۆتا رۆژی خولی راهێنه‌رانی كوردستان ئاستی (C)  ئاسیایی،‌ له‌ مه‌راسیمێكی قه‌شه‌نگدا بڕوانامه‌ی به‌شداربووانمان بە چەندان راهێنەری كوردستان بەخشی.

كانەبی هیوادارشی خواست ئه‌م خوله‌ سوودی به‌ هه‌موویان گه‌یاندبێ و ئه‌وانیش له‌ یاریگه‌كانی كوردستان به‌ كردار له‌سه‌ر یاریزانانی كورد جێبه‌جێی بكه‌ن. به‌ڵێنیشی دا كە ئه‌مه‌ یه‌كه‌م خول و كۆتا خول نەبێ و پشتیوان به‌ خوای گه‌وره‌ خولی تر له‌سه‌ر ئاسته‌كانی دیكه‌ش ب‌كه‌نه‌وه‌.

سەرۆكی یەكەتیی تۆپی پێی كوردستان راشی گەیاند كە به‌ پێویستیشی ده‌زانێ سوپاسی ئه‌م به‌رێزانه‌ بكات:

دكتۆر (قاسم له‌زام) وانه‌بێژی خوله‌كه‌

كاپتن (یوسف كاكێ) یاریده‌ده‌ری وانه‌بێژ

مامۆستا (دلشاد ساڵح) سه‌رپه‌شتیاری خوله‌كه‌

به‌رێز (ئه‌رسه‌لان قادر) یاریده‌ده‌ری پزیشكی خوله‌كه‌

لەگەڵ سه‌رجه‌م راهێنه‌رانی به‌شداربووی خوله‌كه‌ و هه‌موو ئه‌وانه‌ی له‌م خوله‌ ماندوو بوون.

جێی باسە یەكەتیی تۆپی پێی كوردستان هەموو كات هەوڵی داوە ئاستی راهێنەرانی تۆپی پێی كوردستان بەرزبكاتەوە و بیانگەیەنێت بە ئاستێكی ئاكادیمی و زانستی و ببنە خاوەن بڕوانامەی باوەڕپێكراوی كاركردن.