بەرپرسێكی سەڵاحەدین: چەكدارانی داعش بەفەرمی لە بەرزاییەكانی مەكحول هەن

:: PM:03:23:22/11/2020 ‌

شەوی رابردوو هێزێكی تەناهی عێراق لە سنووری پارێزگای سەڵاحەدین، كەوتە ناو بۆسەیەكی چەكدارانی داعش و 18 كەسیان لەنێوان كوژراو و بریندار بوونە قوربانی، بەرپرسێكی حكوومەتی لەو پارێزگایە ئاماژە بۆ ئەوە دەكات كە چەكدارانی داعش بەفەرمی لە بەرزاییەكانی مەكحوول هەن.
چەكدارانی داعش قەناسەی پێشكەوتوویان هەیە لای هێزە تەناهییەكانی عێراق نییە
محەمەد زێدان، بەڕێوەبەری شارۆكەی زوییە گوتی، پلانێكی تەناهیان بۆ پاراستنی ئەركی ناوچەكانی باكوری بێجی (زوییە و مەسحەگ)، داناوە، بریتییە لە دامەزراندنی خاڵی چاودێری و كامێرای حەراری بۆ ئاشكراكردنی ئامانجە جووڵاوەكانی داعش.

دووپاتی كردەوە كە چەكدارانی داعش چەكی قەناسەی پێشكەوتوویان هەیە و كامێرای شەوانەیان لەسەرە، بۆیەیش حەوت لە كوژراوانی دوێنێ گوللە لەسەریان دراوە، ئەو چەكانە لای هێزە تەناهییەكانی عێراق نییە، ئاشكرای كرد ئەندامانی داعش لە زنجیرە بەرزاییەكانی مەكحوول لە باكوری بێجی بەفەرمی هەن و هەمووان بەوە دەزانن.

ئەو بەرپرسەی پارێزگای سەڵاحەدین وای لەقەڵەم دا هێرشەكەی مسحەگ، وەڵامدانەوەیەكی تۆڵەسەندنەوە بوو بۆ ئۆپراسیۆنی دوایی لە بەرزاییەكانی مەكحوول، ئەوەی رووی دا كارەساتێك بوو و هێزە تەناهییەكان ویستیان ماڵباتێك رزگار بكەن كە كەوتبووە بۆسەیەكی داعش، بەڵام ئەوانیش كەوتنە ناو بۆسەیەكی تری داعش.

لای خۆیەوە محەمەد جبووری، قایمقامی بێجی گوتی، بەهۆی هێرشەكەی دوێنێی داعش 10 كوژراو و هەشت بریندار هەن، سەرەتا ئۆتۆمبێلێكی مەدەنی كەوتە بۆسەی داعش و بۆمبێكی پیادا تەقییەوە، دوای ئەوە هێزێكی تەناهی بۆ رزگاركردنیان چوو، ئەوانیش كەوتنە بۆسەیەكی تر و بە قەناس تەقەیان لێ كراوە. 



وشە - مه‌حموود ئیسماعیل

ئه‌م بابه‌ته 40 جار خوێنراوه‌ته‌وه‌‌