پشكهك ژ پهرلهمانتار و راگههاندنێن ههرێما كوردستانێ بهحس ل ههبوونا فهرمانبهر و موچهخورێن بندیوار ل ههرێما كوردستانێ دكهن، بهلێ ل ههمبهری ههبوونا بندیواران ل عیراقێ بێدهنگن، بسپورهكێ سیاسهتا كارگێریا گشتی ژی دیار كر كو هژمارا بندیوارێن عیراقێ نێزیكێ چوار ملیون موچهخورایه و عیراق دخوازیت ب بهانهیا ههبوونا بندیواران ل كوردستانێ خهلكی ل دژی حوكمهتا ههرێما كوردستانێ بكهت دوژمن.
عادل خێركی، بسپور د سیاسهت و كارگێریا گشتی دا بۆ "وشه" گۆت، دهما دبیته بابهتێ مووچهیی، هژمارهكا پهرلهمنتارێن خوفروشێن كورد مل ب ملێ عهرهبان ددهن دیاركرن كو داتایێن ههرێما كوردستانێ ل بارا هژمارا فهرمانبهران راست نینه، بهلكو بندیوار ل گهل دانه.
زێدهتر گۆت "جهێ داخێ یه مل ب ملێ پهرلهمنتارێن خوفروش و عهرهبان، ههڤدهم پشكهك ژ راگههاندنا كوردی ژی دپێناڤ گههشتنا مهرهمێن خوه ههمبهری داتایێن بندیوارێن عیراقێ بێدهنگن، ئهرێ بوچی ئهو ل میدیاێن نافخوه و جیهانی ناكهن دهنگو و گڤاشتنان دروست بكهن؟ ب تایبهتی ل بالیوزخانه و رێكخراوێن نیڤدهولهی و دهستههلاتا دادوهریێ، ژبهركو ئهڤ یهك گهندهلیهكا ههری مهزنه، ئهگهر ل ههرێما كوردستانێ پارت و لایهنێن سیاسێن مینا پارتی و ئێكهتی و گۆڕان و ئێكگرتوو و نهوهی نوێ و زهمحمهتكێش و ههتا دوماهیێ 100 هزار بن دیوار ههبن، ل عیراقێ ددهما چهند سالێن بوری سێ ملیون و 800 هزار كهس وهكو موچهخورێن بندیوار ههنه و دهوامێ ناكهن و فهرمانبهرن"
ناڤبری دیاركر ژی كو ل سالا 2003ێ عیراقێ 850 هزار فهرمانبهر ههبوون، بهلێ د نوكه دا شهش ملیون و 500 هزار فهرمانبهر ههنه و ئانكو پتری شهش ملیون فهرمانبهر یێن زێدهبوی و گۆت ژی " ل سالا 2004ێ مووچهیێن فهرمانبهرێن عیراقێ دوو ملیار دولار بوون، بهلێ نوكه 43 ملیار و 300 ملیون دولارن، نوكه ل عیراقێ ب تنێ دوو ملیون و 700 هزار فهرمانبهرێن توماركری ههنه، ئهڤ یهك ژی رامانه كو ل عیراقێ سێ ملیون و 800 هزار فهرمانبهرێن بندیوار ههنه، دناڤ وان دا 539 كهس ب مووچهیێن پلهیێن وهزیر ههنه، چوار هزار و 769 كهس ب مووچهیێن پله تایبهت ههنه، 48 هزار و 385 كهس ب مووچهیێن رێڤهبهرێن گشتی، 128 هزار و 893 كهس ب مووچهیێن جێگرێ رێڤهبهرێ گشتی و 127 هزار و 279 كهس ب مووچهیێن رێڤهبهرێن پشكان، جهێ داخێ یه ههتا نوكه ئهڤ یهك نهبویه جهێ گرنگیدان و بابهتێ میدیایێ، بهانهیا حوكمهتا عیراقێ بو ههبوونا بندیواران ل ههرێما كوردستانێ ب تنێ خاپاندنه و دخوازن خهلكێ كوردستانێ دژی حوكمهتا ههرێما كوردستانێ بكهن دوژمن"
دهۆك/ نهوزاد هلۆری