پۆلیسی دارستان و ژینگەی سلێمانی، چوار هاووڵاتیی تۆمەتباریان بە تاوانی راوی ئاژەڵ و باڵندە كێوییەكان گرت و داوایش لە هاووڵاتییان دەكەن پابەند بن بە یاساكانی ژینگە.
ئەمڕۆ پینجشەم 23ی شوبات/فێبرایەر، بەڕێوەبەرایەتی پۆلیسی دارستان و ژینگەی پارێزگای سلێمانی لە راگەیەندراوێكدا گرتنی چوار هاووڵاتی بە تۆمەتی راوی باڵندە و ئاژەڵە كێوییەكان راگەیاند.
لە راگەیەندراوەكەدا ئاماژە دراوە، بنكەی پۆلیسی دارستان و ژینگەی پیرەمەگروون لە گوندی تەڕەمار دوو هاووڵاتییان گرت كە سەرقاڵی راوی ئاژەڵ و باڵندەی كێوی بوون.
زیاتر روون كراوەتەوە، هاوكات پۆلیسی دارستانی بنكەی وارماوا گوندی "بەردەكەڕ" دوو هاووڵاتییان لەكاتی راوكردنی باڵندە كێوییەكان گرت.
لەو چالاكییەی بەڕێوبەرایەتی پۆلیسی دارستان و ژینگەی پارێزگای سلێمانی، دەست بەسەر دوو كەو و چەكێكی جۆری تاپڕو و سێ دەستە داودا گیراوە و سەرجەم گیراوەكان رادەستی یاسا كراون.
پۆلیسی دارستانی هەرێمی كوردستان رۆژانە لە گەشتەكانیاندا تووشی سەرپێچیكارانی یاسای ژینگەپارێزی هەرێم دەبنەوە كە سەرقاڵی دیاردەی راوكردن و تێكدانی سروشتی كوردستانن و دوای گرتنیان رادەستی یاسایان دەكەن، بەڕێوەبەرایەتی پۆلیسی دارستان و ژینگە داوا لە هاووڵاتییان دەكەن پابەندی رێنوێنییەكانیان بن و بە وشیارییەوە ژینگەی وڵاتەكەیان بپارێزن.