دیارە دوهی و ئەڤرۆ وەزیرێ بەرەڤانیا تورکیا سەرەدانا عیراق و هەرێما کوردستانێ کر و ژلایێ بەرپرسێن بلند کومبوو، شارەزایەکێ سیاسەت و کارگێریا گشتی یا تورکیا ژی ددەت دیارکرن کو گەلەک پرسن گرنگ دناڤبەرا عیراق و هەرێما کوردستان و تورکیا هاتنە شروڤەکرن ژ وانان پرسا ئەمن و ئاسایش و سەربازی و پاراستنا سنوران.
عادل خێرکی بسپۆر د سیاسەت و کارگێریا گشتییا وەلاتێ تورکیا دا بۆ "وشە" گوت، سەرەدانا فەرمی یا خۆلۆسی ئاکار، وەزیرێ بەرەڤانیا تورکیا ب یاوەریا سەرۆک ئەرکانێ لەشکەریێ تورکیا بۆ عێراقێ و هەرێما کوردستانێ پێشتر پلان بۆ هاتبوویە دانان بەلێ ئۆپەراسیۆنێن تورکیا بۆ سەر بنگەهێن چەکدارێن پەکەکێ ل سنورێ هەرێما کوردستانێ و زیانێن گیانی ب لەشکەرێ عێراقێ ژی، کێشە هەمبەری سەرەدانا خۆلۆسی ئاکار ژ لایێ عێراقێ هاتە هەلوەشاندن و تا ڕاددەیەکێ ژی گرژی پەیداکرن.
زێدەتر گوت "سەرەدانا ئیرۆ یا وەزیرێ بەرەڤانیا تورکیا ژ روویێ لەشکەری ڤە دێ پێشڤەچوونێن باش دناڤبەرا هەردوو وەلاتان و هەرێما کوردستانێ ژی بخوڤە بینیت، تورکیا دزانیت سەرۆک وەزیرێن عێراقێ وەکو پێدڤی باندۆرا خوە ل سەر سیاسەتا دەڤەرێ نابیت، کوردستان دەرگەهێ ئێکانەیە بۆ ئارام راگرتنا رەوشا ناڤخوە یا تورکیا ل هەمبەر گەفێن ناڤخوە و دەرڤە ب تایبەت کو تورکیا د رەوشەکا نالەباردایە و ئەگەر هەلبژارتن بهێنە ئەنجامدان دێ رەوشا ئێمناهیا تورکیا تێکچیت و دووور نینە ئالۆزیێن مەزن درۆست بن، ب تایبەتی ژ ئەگەرێ بێهێزبوونا پێگەهێ سیاسی و جەماوەریێ پارتێن نوکە وەلاتێ تورکیا ب رێڤە دبن"
خێرکی، د درێژاهیا ئاخفتنا خودا دیارکر ژی کو تورکیا ئێدی دزانیت سەردەمێ سیاسەتا ترەمپ ب سەرڤەچویە و ئێدی دێ سیاسەتا جو بایدن ل رۆژهەلاتا ناڤین هێتە پەیرەوکرن و گوتژی" نێزیکبوونەک دناڤبەرا سەرۆک مەسعود بارزانی و جو بایدن دا هەیە، لەوا تورکیا ژی نەچارە کو پەیوەندیێن خوە ل گەل بارزانی خورتر بکەت و سەرەدانا فەرمیا خۆلۆسی ئاکار ژبلی بۆ لایێ سەرۆکێ هەرێمێ و سەرۆکێ حوکەمەتا هەرێما کوردستانێ، زێدەتر گرنگی هەبویە، ب ڤێ چەندێ تورکیا دێ بالانسا سیاسەتا خوە ل هەمبەر پەکەکێ و کوردێن باکوور و ئەمریکا ژی راگریت ژبەرکو تورکیا یا رژدە عێراق رێککەفتنا شنگالێ بجهـ بهینت و پەکەکە ل سەر سنورێ سوریا و دناڤ شنگالێ دا سەرێ تورکیا نە ئێشینت و بۆ ڤێ چەندێ ل سەر خەتن کو عێراق سنورێن خوە ژ پەکەکێ پاقژ بکەت و مەترسیا ل سەر تورکیا نەهێلیت و کێشەیێن ل هەمبەر بنگەهێ لەشکەریێ تورکیا ل باشیکێ ژی چارەسەر بکەت، بۆ هندێ د خزمەتا بەرەڤانیا ئاخا عێراقێ و پێگەهاندنا لەشکەرێ وێ دا بیت و تورکیا ژی ل هەمبەر ڤێ چەندێ کێشەیا ئاڤا عێراقێ ئەوا کو ژ تورکیا دهێت دێ چارەسەر بکەت و ژ روویێ ئابووری ڤە تورکیا دێ پشتەڤانێ عێراقێ بیت و تێکەلیێن بازرگانی دێ خۆرتتر کەت دگەل عێراقێ"
دهۆک/ نەوزاد هلۆری.