هه‌ر چه‌نده ئه‌و ده‌ڤه‌رێن كو نوكه بۆردمان و شه‌ر و ئالوزى دناڤبه‌را توركیا و چه‌كه‌كه ل هه‌رێما كورستانێ ب گشتى و پارێزگه‌ها دهۆكێ ب تایبه‌تى دهێته‌كرن زنگینن ب هه‌بوونا چه‌ندین ماددێن سرۆشتى، به‌لێ ئه‌و ده‌ڤه‌را كو توركیا داگیركرى زێده‌تر زه‌نگینه ب مادێن سرۆشتى و خالێن سه‌ربازى تێدا دروستكرینه.
نه‌زیر عه‌لى، نڤیسه‌ر و چاڤدێر بۆ ئالۆزیێن سنوورى دناڤبه‌را هەرێما كوردستان و توركیا بۆ "وشه" گۆت، ئه‌و ده‌ڤه‌را كو توركیا داگیركرى و ب پیاده هاتیه دناڤ دا، ده‌ڤه‌ره‌كا زه‌نگینه ب چه‌ندین كانزایان و سامانێن سرۆشتى ل پارێزگه‌ها دهۆك، كو گه‌له‌ك نێزیكه ل مه‌زنترین زه‌ڤیێن په‌ترۆلا دهێته نیاسین ب تاوكێ ل زاخۆ.
زێده‌تر گۆت " له‌شكه‌رێ توركیا د ئه‌نجامێ ئۆپه‌راسیۆنا چه‌نكێ پلنگى كو سالا بورى ل ده‌ڤه‌را هه‌فته‌نین دژى گه‌ریلایێن پارتیا كاركه‌رێن كوردستان ده‌ستپێكربوو و تا نوكه به‌رده‌وامه، 55 گوندێن ده‌ڤه‌را زاخۆ داگیر كرینه، ئه‌و گوند ب چه‌ندین كانزایان و په‌ترۆلێ زه‌نگینن"
ده‌ڤه‌ر ژ ئالیێ رۆژهه‌لات دكه‌ڤیته ناڤبه‌را رووبارێ خابوور و ئالیێ رۆژئاڤا رووبارێ هیزل، نێزیكى 500 كانیێن ئاڤێ یێن مه‌زن و بچووك، رووبارێ كه‌شان، دارستانێن مه‌زن، دكه‌ڤنه تێدا، ژبه‌ر ئۆپه‌راسیۆنێن به‌رده‌وام یێن توركیا، ئه‌و گونده هاتینه چۆلكرن، له‌شكه‌رێ توركیا رێ ناده‌ت چۆ هێز نێزیكى وان ده‌ڤه‌ران ببن، هه‌تا خوه زێره‌ڤانێن سنوورێن عیراقێ كو نوكه ل ده‌ڤه‌رێ هه‌نه، نه‌شێن بێ رازیبوونا توركیا چۆ لڤینان بكه‌ن، ل ده‌مێ گوهرینا له‌شكه‌ران ژى هێزێن زێره‌ڤانێن سنوورێن عیراقێ، توركیائاگه‌هدار دكه‌ت، نه‌زیرى هوسا گۆت.
ب گوره‌ى ئاخفتنێن نه‌زیر كو ئه‌وان ژ دوڤچون ل سه‌ر جور و شێوه‌یێن كانزایێ كریه، ئه‌و كه‌رسته و كانزایێن كو ل ده‌ڤه‌رێ هه‌یى پێكدهێن ره‌ژیا به‌رى، بارایت، قۆرقۆشم، په‌ترۆل، ئاسن و زنك كو رێژا بارایت و ره‌ژیا به‌رى ل وان ده‌ڤه‌ران گه‌له‌ك زێده‌یه، دیسان په‌ترۆله‌كا باش ل ده‌ڤه‌را هه‌فته‌نین هه‌یه، لێ پێدڤی یه بیرێن په‌ترۆلێ نێزیكى دوو مه‌تران بهێنه كۆلان، دیسان بازرگانێن دارودره‌ختان به‌رده‌وام قه‌ستا گوندێن هه‌فته‌نین دكه‌ن و دارێن به‌رهه‌مى وه‌ك گیز، باهیڤ سپیندار و به‌ڕى بۆ ره‌ژیێ دبڕن و ل باژارێن توركیا دفرۆشن، جهێ داخێ یه هه‌تا نوكه چوو ڤه‌كولین ل بارا یه‌ده‌كێ په‌ترولێ و كه‌رسته‌یێن كانزاى و سرۆشتى ل ده‌ڤه‌رێ نه‌هاتینه‌كرن"
ئه‌و ده‌ڤه‌را كو توركیا داگیركرى بتنێ 10 كیلومه‌ترا ژ زه‌ڤیێن په‌ترولا تاوكێ دوره كو ژلایێ كومپانیێن گنه‌ل ئێنرجیا توركى و DNO یا نه‌رویجى دهێته ده‌رئینان و رۆژانه پترى 100 هزار به‌رمیلێن په‌ترولێ به‌رهه‌مدئینیت، رۆژا 16ێ خزیرانا 2020ێ وه‌زاره‌تا به‌ره‌ڤانیا توركیا ئوپراسیونه‌ك ده‌ستپێكر و پشتى 78 رۆژان راگه‌هاند كو ئوپراسیون داوى هات، به‌لێ د ژێوارى دا ئه‌ڤ یه‌ك به‌رده‌وامه و 18 خالێن له‌شكه‌رى تێدا دروستكرینه و جاده‌یان بۆ وان خالان دبه‌ن.