ژ ئه‌گه‌رێ باران و له‌هیان سالا بورى ب كوژمێ پترى ملیاره‌ك و 500 هزار دیناران 31 جهێن گشتى و ئاڤا ل سنوورێ پارێزگه‌ها دهۆكێ خراپ بوینه، هه‌تا نوكه نه‌هاتینه چێكرن ڤه، ئه‌ڤێ یه‌كێ كێشه بۆ وه‌لاتیان دروستكرنه ژ به‌ركو پشكه‌ك ژ وان راسته‌وخۆ گرێداى كاروبارێن رۆژانه‌یێن خه‌لكى یه.
خالد رێكانى، جێگرێ رێڤه‌به‌رێ گشتیێ باژێرڤانیان ل پارێزگه‌ها دهۆكێ بۆ "وشه" گۆت، سالا بورى ل وه‌رزێ بارینا باران و درۆستبوونا له‌هیان ل زڤستان و بهارێ ب تایبه‌تى ل هه‌یڤا ئادارێ دا، ژ ئه‌گه‌رێ بارینا بارانێن بهێز و درۆستبوونا له‌هیان زیانێن زۆر ب كه‌رتێ گشتى و وه‌لاتیان ل
سنوورێ باژێرڤانیێن سه‌ر ب رێڤه‌به‌ریا گشتى یا باژێرڤانیان كه‌فت كو زیانێن وێ پترى ملیاره‌ك و 500 هزار دیناربوون و 31 جهێن ئاڤه‌دان و گشتى و پرۆژه‌یان بخوڤه دگرتن، ئه‌ڤه ژبلى وان زیانێن ب وه‌لاتیان و مال و حال و خانو و باخچه و جهێن وان كه‌فتى"
زێده‌تر گۆت "مه هه‌موو زیان بۆ جهێن شوله‌ژێ هنارتنه داكو دووباره جاره‌كا دى بهێنه چێكرن ڤه، زیانێن مولك و مالێن وه‌لاتیان ژى ب رێیا ناحى و قایمقامیان هاتینه خه‌ملاندن، به‌لێ جهێ داخێ یه هه‌تا نوكه چوو ژ وان جهان نه‌هاتینه چێكرن، ئه‌ڤ ساله داكو زیان كێمتر بن ب هه‌ڤكاریا كومپانیێن پاقژكرنێ هه‌موو به‌رهه‌ڤى هاتینه‌كرن"
جێگرێ رێڤه‌به‌رێ گشتیێ باژێرڤانیان ل پارێزگه‌ها دهۆكێ دیاركر ژى كو زورترین زیان ب قه‌زا ئاكرێ كه‌فتنه و گۆت "زیانێن جهێن گشتى و ئاڤه‌دان ل سنوورێ سێمێلێ دگه‌هنه 220 ملیون و 201 هزار و 500 دیناران كو پرانیا وان ژى دكه‌ڤنه ناحیا مسێریكێ، ل ده‌ڤه‌را ئاكرێ ژى زیانێن باران و له‌هیان دگه‌هنه 428 ملیون و 717 هزار و 500 دیناره كو پرانیا وان ژى ل ناحیا دینارته و كه‌لاتێ بوون، ل ده‌ڤه‌را ئامێدیێ ژى 291 ملیون و 554 هزار دینارن زیان هه‌نه، دیسان ل ده‌ڤه‌را زاخۆ ژى 29 ملیون و 942 هزار دینارن زیان هه‌بوینه و ل ده‌ڤه‌را شێخان ژى 12 ملیون و 300 هزار دیناران، دیسان ل سنوورێ باژێرڤانێن سه‌ر ب قه‌زا دهۆكێ ژى كو ئه‌و ژى ده‌ورۆبه‌ران بخوڤه دگریت 32 ملیون و 985 هزار دیناران زیان ب جهێن گشتى و
پرۆژه‌یان كه‌فتنه، ككوما گشتى دبیته ملیاره‌ك و 577 ملیون و هه‌شت هزار و 500 دینار"