ئەڤرو ل كولیژا زانستێن تەندورستی ل گرێ باسێ یا سەر ب باژێرێ دهۆكێ، ب ئامادەبوونا د.عەلی تەتەر، پارێزگارێ دهۆكێ و جێگرێ وەزیرێ خاندنا بلند و هاریكارێ سەروكێ زانكویا دهۆكێ و سەروكێ زانكویا زاخو كلینیكا، (ئای پی پی) یا ئەلمانی بو چارەسەریا دەروونی هاتە ڤەكرن.
پارێزگارێ دهۆكێ دپەیڤەكێ دا بناڤێ حووكمەتا هەرێما كوردستان و كارگێریا پارێزگەها دهۆكێ، سوپاسیا حوكمەتا ئەلمانیا و حكومەتا هەرێما بادن ڤوتنبێرگ و زانكویا توبینگن یا ئەلمانی كر كو پشتەڤانیا ڤەكرنا كلینكێ كریە، دیسان سوپاسیا زانكویا دهۆك كر بو هاریكاریا وان و ڤەكرنا كلینكی دناڤ ئاڤاهیێ كولیژا زانستێن تەندورستی دا.
پارێزگارێ دهۆكێ دیاركر ژی كو پشتی هێرشێن تیرورستێن داعش بو سەر دەڤەرێن كورستانێ و گرتن و رەڤاندنا كچ و ژنێن ئێزدی، نەخوشیێن دەروونی ل دەڤ گەلەك ئاوارا دروست بویە و سوپاسیا حوكمەتا ئەلمانیا و رێكخراوێن خێرخواز دكەین كو چارەسەریا گەلەك ژوان توشبویان هاتیە كرن و ب ڤەكرنا ڤێ كلینیكێ دێ چارەسەریا گەلەك تووشبووێن دن ل پارێزگەهێ هێتە كرن و دخوازم كو حوكمەتا ئەلمانیا پتر ڤان جورە هاریكاریا پێشكێشبكەت و پشتەڤانیا پارێزگەها دهۆكێ ژی بۆ وان دكەین بۆ هەر جورە هەڤكاریەكێ.
هەر درێورسمێن ڤەكرنا كلینیكێ دا چەندین پەیڤێن دی هاتنە خاندن و گرنگیا كلینیكێ بو هەمووان بەرچاڤكرن.
كلینیكا (ئای پی پی)، یا ئەلمانی بو چارەسەریا دەروونی ب پشتەڤانیا حووكمەتا ئەلمانیا و پەیمانگەها چارەسەریا دەروونی و زانكویا دهۆكێ و ساخلەمیا دهۆكێ هاتیە ڤەكرن، نوكە دوو نوشدار و هەشت كارمەند ژ دەرچویێن پەیمانگەها ناڤبری خزمەتێن چارەسەریا دەروونی پێشكێشی هەر هاولاتییەكی دكەن و بێ بەرامبەرە، كلینیك روژانە دەمژمێر 10سپێدێ هەتا 6ێ ئیڤاری دێ خزمەتا هەموو نەخوشان دكەت.