ب مەرەما خوشکرنا رێیێن گوندان و کێمکرنا قەرەبالغا ل گەلیێ دهۆکێ کو جهەکێ گەشتوگۆزارییە، ڤەدیتن بۆ چێکرنا رێییەکا نو بۆ گوندێن پشتا سکرێ دهۆکێ هاتەکرن.
لدوڤ راسپاردێن د.علی تهتهر پارێزگارێ دهۆكێ، ب مەرەما ئامادهكرنا ڤهدیتنهكێ بو چێكرنا رێیهكا نوو ژ گەەکا کێڤلا ل باژێرێ دهۆکێ بۆ تهحا و مشارا گوندێن پشتا سكرێ دهۆكێ، تیمهكێ ئهندازیاری یێ بسپور دبیاڤێ چێكرنا رێك و پرا کو پێکهاتبوون ژ رێڤهبهر وئهندازیارێن رێك وپرا وئهندازیارێن پلان دانانێ ل پارێزگهها دهۆكێ سهرهدانەکا مەیدانی بۆ جهێ ناڤبری كر و ژنێزیك سهحكره رێرهوێ رێیا کێڤلا سهرێ تهحا و لیناڤا کو درێژاهیا وێ نەهـ کیلومەترە .
ب گورەی پێزانینێن "وشە" کو ژ کارگێریا پارێزگەها دهۆکێ وەرگرتنە، ئارمانج ژچێكرنا رێیا نوو ئهوه کو فشار و قەرەبالغا هاتن وچونا ترومبێلا ل سهر رێیا گهلیێ دهۆكێ بهێته كێمكرن نهخاسمه ل روژێن بێهنڤهدان و بیرهوەریا و دهركهتنا هاولاتیان بو گهشت وسهیرانان.
ههروهسا رێیا ناڤبری دێ سهنتهرێ باژێرێ دهۆكێ ب گوندێن دهورۆبهرێن سكرێ دهۆكێ ڤه گرێدان و بزاڤا گهشتیاری ژی خورتكرن وئاسان تر کەت،
ب گۆرەی پلانا كابینا نەهێ یا حوكمهتا ههرێما كوردستانێ بو خوشكرنا رێك وپرا وئاسانكرنا هاتن وچونا گشتی و لدوڤ فهرمانا پارێزگارێ دهۆكێ ئهڤ پرۆژه پێشتر ژلایێ لیژنا پلان دانانا پرۆژێن ستراتیجی و گرنگ هاتیه دیاركرن، ههروهسا چهندین پرۆژێن دی ژی هاتینه ئامادهكرن بو وێ یهكێ داهاتێ نافخویی بهێته زێدهكرن ودهلیڤێن كاری ژی پتر بهێنه دیتن.