دوای هێرشەكەی هەینی رابردووی سنوورەكانی عێراق و سووریا، كە هێزەكانی ئەمەریكا بە بۆمبێكی تایبەت حەوت بارەگای حەشدی شەعبیان لە تۆڵەی هێرشەكەی هەولێر وێران كرد، ئەو میلیشیایانە گوشار لە حكوومەت دەكەن بۆ دەركردنی هێزەكانی هاوپەیمانی دژ بە داعش لە عێراق، كە درووشمی سەرەكیی ئێران بوو دوای كوژرانی قاسم سلێمانی، فەرماندەی پێشووی فەیلەقی قودس لە عێراق لەلایەن ئەمەریكا لە سەرەتای ساڵی رابردوو.
ئەو هێزە بیانیانەی لێرەن بە رێككەوتن لەگەڵ حكوومەتی عێراق هاتوون
دانا محەمەد جەزا، ئەندامی كورد لە پەرلەمانانی عێراق سەبارەت بەزیندووكردنەوەی یاسای دەركردنی هێزە بیانییەكان كە لە سەرەتای ساڵی رابردوو پەرلەمانی عێراق دەری كرد، بە "وشە"ی راگەیاند، ئەو بڕیارەی پەرلەمان كاریگەری نەبوو، چونكە هەموو پێكهاتەكانی عێراق دەنگیان پێ نەدابوو و تەنیا پێكهاتەی شیعە تێی پەڕاند، هەروەها وەك كاردانەوەی رووداوێك بوو، واتە لە دانیشتنێكی ئاسایی نەبوو كە تاوتوێ بكرێت و رەهەندە جیاوازەكانی باس بكرێت.
زیاتر گوتی، ئەو یاسایە كاریگەری و كاردانەوەی رووداوەكەی فڕۆكەخانەی بەغدا بوو، وەك لایەنی یاساییش بڕیاری پەرلەمان بۆ حكوومەت پابەندی تیادا نییە و لەبنەڕەتدا ئەو بابەتە پێویستی بە پەرلەمان نییە، ئەگەر حكوومەت بیەوێ خۆی دەتوانێ بڕیار بدات، چونكە ئەو هێزە بیانیانەی لێرەن، بەرێككەوتن لەگەڵ حكوومەتی عێراق لێرەن و ئەگەر بیانەوێ بگەڕێنەوە یان بچنە دەرەوە یان هێز كەم بكەنەوە، حكوومەتی عێراق پێویستە پێیان بڵێت.
ئەو پەرلەمانتارە دووپاتی كردەوە، ئەوەی لەوبارەوە دەگوترێت بە سیناریۆی دەزانین و ململانێی لایەنە سیاسییەكان خۆیانە، دوای رووخانی رژێمی پێشوو، عێراق دەرگای كراوە بووە بۆ ململانێ سیاسییەكانی لایەنە دەرەكییەكان، بۆیە وەك دەركردنی هێزە بیانییەكان بڕوا ناكەین بچێتەوە ئەو چوارچێوەیە و هیچ هێزێكیش لەوانەی هەن ئێستە ناچنە دەرەوە.