ب مه‌ره‌ما پاراستنا زاروكان ژ روویێ ساخله‌میێ و ڤه‌گه‌راندا وان بۆ خواندنێ، دیسان پتشه‌ڤانیكرنا داراى بۆ خێزانێن وان زاروكێن نه‌چارى كار دكه‌ن، پارێزگه‌ها دهۆكێ هه‌ڤكارى ل گه‌ل ده‌زگه‌هێن په‌یوه‌ندیدار دوڤچونێ ل سه‌ر زاروكێن كار دكه‌ن دكه‌ت.
ئه‌ڤرۆ لژێرچاڤدێریا پارێزگارێ دهۆكێ و ب پشته‌ڤانیا دارایى یا ده‌زگه‌هێ SKI یێ سوێدى، كارگێریا پارێزگه‌ها دهۆكێ هه‌ڤكارى ل گه‌ل چه‌ند ده‌زگه‌هێن په‌یوه‌ندیدار یێن حوكمى و كه‌رتێ تایبه‌ت كومبوونه‌كا به‌فره‌ه ل بارا دیاردا كاركرنا زاروكان ل سنوورێ پارێزگها دهۆكێ ئه‌نجام دا و تێدا ب تیروته‌سه‌ل به‌حس ل چه‌وانیا كاركرن و رێێن كاركرنا زاروكان و چه‌وانیا پاراستنا وان و دویركرنا وان ل كارى هاته‌كرن، ئه‌ڤه زێدبارى به‌حس ل سه‌ده‌مێن بارزگانیكرن ب زاروكان ژى هاته‌كرن.
گرنگترین ته‌وه‌رێن كو دكومبوونێ دا به‌حس ل سه‌ر هاتیه‌كرن، هه‌ر ئێك ژ ته‌وه‌رێن زاروکێن ل سه‌ر جادەیان خواستنێ دکەن، نەهێلانا زاروکێن دناڤ ئاڤاهیان دا کار پێ دهێتە کرن، ڤاڤارتن دناڤبەرا وان زاروکێن ژ نەچاری خواستنێ دکەن و یێن د هێنە ب کارئینان، رێ نەدانا سوشیال میدیایێ و کارکرنا وان ل سەر زاروکان بو مه‌ره‌مێن تایبەت، نەهێلانا هاندانا سەمیانێن هندەك ژوان زاروکێن خواستنێ دکەن.
فایزا عه‌بدولواحد، رێڤه‌به‌را یه‌كا پاراستنا زاروكان ل رێڤه‌به‌ریا گشتى یا گه‌شه‌پێدانا جڤاكى ل پارێزگه‌ها دهۆكێ دیاركر ئه‌وان پلانه‌ك بۆ دوڤچون ل سه‌ر وان زارۆكێن كار دكه‌ن دانایه و بۆ "وشه" گۆت، كاركرنا زاروكان ئێكه ژ دیاردێن جیهانى و ل هه‌موو وه‌لاتان هه‌یه، دیاره ل هه‌رێما كوردستانێ ژى هژماره‌كا زۆر یا زاروكان كار دكه‌ن، ل سنوورێ پارێزگه‌ها دهۆكێ ژى هژماره‌كا زورا زاروكان هه‌نه و كار دكه‌ن ب تایبه‌تى وان یێن ل خوار ژیێ 15 سالیێ به‌لێ جهێ داخێ یه هه‌تا نوكه چوو روپێڤان و دوڤچون ل سه‌ر نه‌هاتینه‌كرن"
زێده‌تر گۆت "ب گوره‌ى روپێڤانه‌كا ساده، تنێ ل سه‌نته‌رێ باژێرێ دهۆكێ پترى 250 زاروك هه‌نه كار دكه‌ن، پشكه‌ك ژ وان ل سه‌ر جادده و ناڤا بازاڕان و جهێن گشتى كار دكه‌ن، ئه‌ڤ یه‌ك جهێ دلگرانیێ یه، وه‌كو رێڤه‌به‌ریا گشتى یا گه‌شه‌پێدانا جڤاكى مه پلانه‌ك هه‌یه و دوڤچونێن هویر ل سه‌ر هه‌موو وان زاروكان كریه و هه‌موو ئامار ئێخستنه به‌ر ده‌ستێ جهێن شوله‌ژێ بۆ وێ یه‌كێ ئه‌ڤرۆ وێڤه كار ل سه‌ر پاراستنا وان زاروكان بهێته‌كرن و پشته‌ڤانیا دارایى بۆ بهێته‌كرن و جاره‌كا دى ڤه‌گه‌رن خواندنێ"
رێڤه‌به‌را یه‌كا پاراستنا زاروكان ل رێڤه‌به‌ریا گشتى یا گه‌شه‌پێدانا جڤاكى ل پارێزگه‌ها دهۆكێ دیاركر ژى كو پلانا وان دێ ب هه‌ڤكاریا رێكخراوا مندالپارێزیا كوردستانێ و رێڤه‌به‌ریا كار و بنگه‌هێن پولیسێن سنێلان و ده‌زگه‌هێن په‌یوه‌ندیداریێن حوكمى و كه‌رتێ تایبه‌ت بیت و گۆت ژى "پلان دێ بو ده‌ما ساله‌كێ بیت و تێدا هه‌موو هوركاریێن وان زاروكان بخوڤه گریت ئه‌وێن كار دكه‌ن، هه‌ند ل سه‌ر كه‌ساتیان وان هه‌ند ژى ل سه‌ر جهێ كارى و جورێ كارى و ره‌وشا ژیانا وان یا گشتى بیت، ب تایبه‌تى وان زاروكێن ل خوار ژیێ 15 سالى، پلانێ دا دێ بۆ وان رون بیت كا زاروك چه‌ند و چه‌وا بشێن هاریكاریا وان بهێته‌كرن"