ئەڤرۆ ب ئامادەبوونا مەسرور بارزانی، سەرۆکێ حوکمەتا هەرێما کوردستانێ، پارێزگارێ دهۆکێ و وەزیرا چاندن و ژێدەرێن ئاڤێ، سەرۆکێ دەستەیا وەبەرهێنانێ، بالیۆز و کۆنسلێ شانشینا هۆلەندا و هژمارەکا مێهڤانێن ناڤخوە و بیانی بەرێ بنیاتی بۆ پرۆژێ کارگەها جۆتیار یا دروستکرنا فینگەرا ژ پتاتێن خۆمالی ژلایێ کۆمپانیا کەی.ئێچ "کوردستان_هۆلەندا” ب پشتەڤانیا دارایی یا شاهنشینا هۆلەندا و لدویڤ بەرنامێ حوکمەتا هەرێما کوردستانێ بۆ پێشئێخستنا کەرتێ پیشەسازیا خۆارنێ ل گوندێ بامەرزێ یا سەر ب دەڤەردارییا بەردەڕەش هاتەدانان.
دپەیڤەکێ دا د.عەلی تەتەر، پارێزگارێ دهۆکێ سۆپاسیا ئامادەبوونا جەنابێ سەرۆکێ حوکمەتا هەرێما کوردستانێ کر و رۆلێ جەنابێ وان بۆ گرنگیدان ب پرۆژێن ستراتیژی ل پارێزگەها دهۆکێ دهەمی بیاڤەکی دا بلند و دەستپێشخەر نرخاند، هەروەسا سۆپاسیا بالیۆز و کۆنسلێ شانشینا هۆلەندا کر بۆ وێ هەماهەنگی و پشتەڤانیا لڤی پرۆژەیی و بیاڤێن دی دکەت و گوت، ئەنجامدانا ڤان پرۆژان دێ بیتە ئەگەر ئاستێ بەرهەمێ ناڤخۆیی بلند ببیت و جۆتیارێن مە ژی ب پشتراستی ڤە ئەردێن خۆیێن چاندنێ بکەنە بەرهەم و هوسا دەلیڤێن کاری بۆ هژمارەکا زۆرا هاولاتیان دێ پەیدابن و بازار و ژێرخانا ئابۆری دێ بهێزتر لێ هێت.
پاشان هەر ئێک ژ وەزیرا چاندن و ژێدەرێن ئاڤێ و کۆمپانیا جێبەجیکار و بالیۆزێ شانشینا هۆلەندا ل عیراقێ دپەیڤێن خۆدا بەحسێ گرنگی و چەوانیا ئەنجامدانا ڤان پرۆژان و ئاست و کۆالێتیا بەرهەمی و داخوازیێن کەرتێ چاندنێ کرن.
هەر د چارچوڤێ دانانا بەرێ بناغەی بۆ پرۆژێ ناڤبری، مەسرور بارزانی، سەرۆکێ حوکمەتا هەرێما کوردستانێ پیڤەک پێشکێشکر و گوت، ئەڤ جۆرە پرۆژە زۆر گرنک و ستراتیژینە بۆ پشتەڤانیکرنا کەرتێ چاندنێ و پێشئێخستنا ئابۆرێ هەرێما کوردستانێ، ئەڤە ژی پشتەڤانیەکا زۆرە هەتا کو ئەم پشتبەستنێ ل سەر خوە بکەین و ئێدی نەچار نەبین بەرهەمی بیانی هاوردەیی کوردستانێ بکەین، بەرنامێ حوکمەتێ ئەوە کو چ نیگەرانی لایێ جۆتیاران نەمینیت و گرنگیێ ب بەرهەمێ خۆ و جۆرێن وی بدەن.
زێدەتر گوت، حوکمەت دپەیوەندیێن خوە دا ل گەل وەلاتێن دەوروبەر و جیران و وەلاتێن دۆست و ئەورۆپا دهەولا ڤەدیتنا بازارێ دەرڤەداینە، مە دڤێت کوردستان ب جۆرێ بەرهەمێ خوە تام و چێژا وان بهێتە نیاسین و ببیتە ناڤ و نیشانەک بۆ بەرهەمێ کوردستانێ یێ ل دەرڤە دهێتە فرۆتن، هەموو هەولەکی دێ دەین کو نەچارنەبین ئەو بەرهەمێ ل ناڤخوە بەرهەم دهێت ژ دەرڤە بینین.
دەربارەی رێکەفتنا دناڤبەرا هەرێما کوردستانێ و حوکمەتا عیراقێ، سەرۆکێ حوکمەتا هەرێما کوردستانێ گۆت: ئەو رێکەفتنا دناڤبەرا هەرێما کوردستانێ و عیراقێ هاتیەکرن بۆ هنارتنا بۆدجا هەرێما کوردستانێ دێ پێنگاڤەکا باش بیت بۆ بهێزکرنا ئابۆرێ کوردستانێ و مۆچەیێ فەرمانبەران، ئەو دەستکەفتێن ل هەرێما کوردستانێ ب دەستڤەدهێن بۆ هەموو خەلکێ عیراقێ دێ جهێ مفایی بن پشتراستبن حوکمەتا هەرێما کوردستانێ خۆدانا سۆزێن خۆیە و دەرفەتا کاری دێ بۆ هەوە درۆستکەین ب پشتەڤانیا دوستێن مە.
پاشان بەرێ بیناتی بۆ پرۆژێ کارگەها جۆتیار هاتەدانان کو نێزیکی 100 ملیۆن دۆلار تێچوویێ پرۆژەینە و سالانە 6000 تەنێن پتاتان دێ کەتە فینگەر و دەلیڤێن کاری بۆ سەدان جۆتیاران و هاولاتیان دێ پەیداکەت.
کارگەها جوتیار ل گوندێ بامەرزێ یا سەر ب ناوچەدارییا روڤیا یا سەر ب دەەردارییا دێ هێتە چێکرن کو مەزنترین گوندە ل کوردستانێ بو چاندنا پتاتا و سالانە پتری 100 هزار تەنێن پتاتا دهێنە چاندن.