ب بریارا پارێزگارێ دهۆكێ دهرگههێن هولێن داوهت و شههیانان پشتى سالهكێ ژ گرتنێ هاتنه ڤهكرن ئهو ژی پشتى چهندین خوهنیشاندان و خرڤهبوونێن نهرازیبوونێ، بهلێ ژبهر رێنمایێن كۆرۆنایێ و تێكچونا رهوشا دارایى و بهرچاڤ گرتنا كێمترین مهزاختن، پشكهكا ههرى زۆر یا بوك و زاڤا داوهتێن خوه دناڤ پارك و باخچهیان و ئهنجام ددهن، ب گورهى ئاماران ژی ل سهر دهمێ كۆرۆنایێ مارهبرین زێدهبویه و جودابوون كێمبویه.
ههرمان و نارین دوو بووك و زاڤایێن نونه و داوهتا خوه دناڤ ئێك ژ باخچهیێن دهۆكێ ئهنجامدایه بۆ "وشه" تێكچونا رهوشا دارایى و رهوشا ساخلهمیێ ژ ئهگهرێ كۆرۆنایێ ئهگهرا سهرهكى بویه كو ئهم هزر د هاتنا ناڤا باخچهیهكێ دا بكهین ژ بهركو ژ روویێ دارایى بومه باشتره و مه نهڤێت ژى ژ ئهگهرێ شههیانا مه كارتێكرن ل سهر رهوشا ساخلهمیا وهلاتیان بهێتهكرن و خهلك توشى كۆرۆنایێ ببن.
زێدهتر گۆت" داوهت و شههیان د نوكه دا دهلیڤهكا مهزنه ههمبهر كچ و كورا كو ب كێمترین تێچون داوهتا خوه بكهن، ژبهركو هول ب مهزاختنن، نوكه داوهت بویه دانهكێ رۆژێ و گرتنا هندهك وێنان، لهوا گرنگه بووك و زاڤا بخوه دهمهكێ خوش بگهرێن و بیرهاتنهكێ دروست بكهن، پاشان هزر بكهن كا دێ چهوا بهختهوهربن.
مێهڤان عهگید، سهرپهرشتیارێ پرۆژێ بابلو ل دهۆكێ بۆ "وشه"پرۆژێ بابلو ئێكه ژ وان قهرهبالغترین پرۆژێن پارێزگهها دهۆكێ كو پێشوازیێ ل زورترین رێژا بووك و زاڤا دكهت ل دهرڤهیێ هولێن داوهت و شههیانان كو ئهو ژى رۆژانه بیته نێزیكێ 50 بووك و زاڤانه.
زێدهتر گۆت، دناڤ باخچهیێن مه دا كهشهكێ خوش بۆ بووك و زاڤا هاتیه دروستكرن و بێ بهرامبهره ژى، تنێ وهكو ههموو وهلاتى و گهشتیاران بهایێ چونا ژور ل وان دهێته وهرگرتن، دیسان ئهگهر زارو ل گهل مالا داوهتێ بن یارى بۆ بێ بهرامبهر هاتینه تهرخانكرن، ئهڤه وهكو هاریكارى بۆ وان ژبهركو رهوشا دارایى و ئابوورى یا وهلاتیان گهلهك باش نیه.
بهادین دهشتانى، خودانێ ئێك ژ هولێن داوهت و شهیانان ل دهۆكێ دیاركر كوپ شتى سالهكێ ژ گرتنا دهرگههێن هولان ژ بهر كۆرۆنایێ ب بریارا پارێزگارێ دهۆكێ دهرگههێن هولان هاتنه ڤهكرن و بۆ "وشه" گۆت ژی، نووترین رێنمایێن ڤهكرنا دهرگههێن هولێن داوهتان ئهوه كو دڤێت ب شێوازێ خارنگهه بهێنه ڤهكرن، ل پارێزگهها دهۆكێ نێزیكێ 180 هول ههنه و پترى چوار هزار كهس تێدا كار دكهن، گرتنا وان زیانێن زۆر گههاندن خودانكارێن ناڤا هولان، نوكه كو وهكو خارنگهه هاتینه ڤهكرن تا رادهیهكێ باشتره، دیسان ههموو رێنمایێن خوهپاراستن ژ كۆرۆنایێ ژی ئهم ل بهر چاڤ وهردگرین.
جیهاد موستهفا، وهكو ماموستایهك ل سهر بابهتى گۆت بۆ"وشه"بێگومان پرۆسا ههڤژنیێ ئێكه ژ پرۆسهیێن ههرى گرنگ و ههر كچ و كورهكێ بگههنه ژیێ پێگههشتنێ دڤێت ژیانا ههڤژینیێ پێكبینن، د ههڤژینیێ دا گرنگ ئهوه كو كچ و كور ل سهر بنهمایهكێ موكوم و بهێز و دروست پێكبینن و خێزانهكا بهختهوهر دروست بكهن، هزر د هندێ دا بكهن چهوا و ب چ رێى دێ د ههڤدوو گههن و پێكڤه د خوشى و نهخۆشیان دا ژین، نهیا گرنگه كا داوهتا خوه ل هولان دكهن یان ژى ل ناڤا باخچه و پاركان دا یان ژى ههر ل مال دا، بهلێ مافهكێ رهوا و گرنگه ژى بووك و زاڤا بیرهاتنهكا خوش و گرنگ بخوه دروست بكهن ب گێرانا ئاههنگهكا جوان و گرنگ و تێدا كهیفێ بكهن و خهلكهكێ ژى مێهڤانێ خوارنهكێ و خوشیا خوه بكهن داكو ئهڤ خهلكه ل سهر شههیانا وان ببنه دیدهڤان.
زێدهتر گۆت" گرنگه ههر بووك و زاڤایهك گرنگى ب دابونهریتێن جڤاكى و قانونى بدهن، خهلكهكێ ژی پشكدارێ خوشیێن خوه بكهن، مێهڤاندارییهكێ رێكبێخن ژبهركو د كهڤن دا كوردان بو دهما سێ شهڤ و سێ رۆژان داوهت دكر و خوارن و ڤهخوارن ددانه خهلكى، ههر چهنده نوكه رهوش هاتیه گوهرین و رهوشا دارایى و جڤاكى و ساخلهمى ل بهر چاڤ بهێته وهرگرتن، بهلێ ل گهل هندێ ژی دڤێت ژ داب و نهریتێن جڤاكى و كهلتورى دورنهكهڤین.
ب گورهى داتایێن دادگهها دهۆكێ ل سهر دهمێ كۆرۆنایێ داوهت و شههیان ل سنورێ پارێزگهها دهۆكێ ئانكو مارهبرین زێدهبویه، دههمبهر ژی دا جودابوونا ههڤژینان كێم بویه، ئهڤ یهك وهسا ددهت خویاكرن كو كۆرۆنایێ كارتێكرن ل سهر ئهنجامدانا ههڤژینیێ زێدهكریه ژبهركو مهزاختیێن دارایى كێمتربویه، ژلایهكێ دنڤه كۆرۆنایێ خێزان و ههڤژین ل ههڤ نێزیك كرن ب تایبهتى ل سهر دهمێ كهرهنتینێ دا.
دهۆك/ نهوزاد هلۆرى