دەنگی پارتی لە مووسڵ زیاد دەكات

:: PM:01:48:15/09/2021 ‌
كاندیدەكانی پارتی دیموكراتی كوردستان ئاماژە بەوە دەكەن، ئەمجارە دەنگی پارتی دیموكراتی كوردستان لە پارێزگای مووسڵ زیاد دەكات و نزیكەی 10 كورسی بەدەست دێنێت، چونكە ھەموو پێكھاتە و نەتەوەكان بێ جیاوازی، پشتگیری لە كاندیدەكانی پارتی دیموكراتی كوردستان دەكەن.

ئیخڵاس دلێمی كاندیدی ژمارە 28 لە بازنەی یەك لە مووسڵ، بۆ "وشە" گوتی، دوای ئەوەی دڵنیا بووین كە ھەڵبژاردن لە كاتی خۆیدا دەكرێت، پارتی بە فەرمیی لە 11ی ئەیلوولەوە دەستی بە بانگەشە كرد، بۆیە ئەوانیش لە سنووری مووسڵ بەگەرمی بانگەشەیان دەست پێ كردووە، تا ئێستە بانگەشەكە بەشێوەیەكی زۆرباش بەڕێوە دەچێت و كێشەیان نییە، خەڵكیش پێشوازییەكی باشیان لێ دەكات. 

لە ماوەی ڕابردوودا لە سنووری مووسڵ، دەستدرێژیی زۆر لە پێكھاتە و نەتەوەكان كراوە


ئەو دەڵێت، "بەڵێن بە خەڵكی خۆمان دەدەین، لە بەغدا بێ جیاوازی داكۆكی لە مافەكانیان دەكەین. پارتی دیموكراتی كوردستان ئەمجارە دەنگەكانی زیاد دەكات، بەھۆی ئەوەی لە ماوەی ڕابردوودا لە سنووری مووسڵ، دەستدرێژیی زۆر لە پێكھاتە و نەتەوەكان كراوە و پارتیش خۆی بەخاوەنی ھەمووان دەزانێت، بۆیە ئەمجارە پێشبینی دەكەین نزیكەی 10 كورسی بەدەست بێنین". 

هاوكات كاڤین شێخ سەعید كاندیدی ژمارە 21 لە بازنەی دووی مووسڵ، بۆ "وشە" گوتی، بازنەی ئەوان تەنیا كوردی لێ نییە، بەڵكو چەند پێكھاتە و نەتەوە لە خۆ دەگرێت. بەپێی ئەو سەردانانەی دەیكەن بۆیان دەركەوتووە، ھەموو پێكھاتە و نەتەوەكان، پێشوازییەكی زۆرباش لە كاندیدەكانی پارتی دەكەن.

وەك زیاتر خستیەڕوو، "بەڵێنی زۆریان پێ داوین پشتگیریمان بكەن و دەنگ بەكاندیدەكانی پارتی دیموكراتی كوردستان بدەن، بۆ ئەوەی جارێكی تر ئارامی بۆ ئەو ناوچانە بگەڕێتەوە، چونكە دوای نەمانی دەسەڵاتی كوردی لەو ناوچانە ئارامیش نەماوە، بۆیە ئەزموونیان لەگەڵ پارتی ھەیە و پشتگیری لە پارتی دەكەن."

داكۆكیكارێكی سەرسەخستی خەڵكی ناوچەكە بەگشتی دەبن

كاڤین شێخ سەعید بەڵێن دەدات ئەگەر بچێتە بەغدا، داكۆكیكارێكی سەرسەخستی خەڵكی ناوچەكە بەگشتی دەبن بەھەموو پێكھاتە و نەتەوەكانەوە.

هەولێر/بڵند ئیبراھیم







وشە - سلێمان تاشان