ئەڤرۆ ب بەرهەڤبوونا وەزیرێ ساخلەمیێ یا حوکمەتا هەرێما کوردستانێ و رێڤەبەرێ گشتی یێ ساخلەمیا پارێزگەها دهۆکێ و نونەرێن رێکخراوا ئایسپو یا ئیتالی پشکا نوو یا زاروک و ئافرەت و زاروکبوونێ ل ئاکرێ هاتە ڤەکرن.
د کونگرەکێ روژنامەڤانی دا د. سامان بەرزنجی، وەزیرێ ساخلەمیێ دیارکر کو ڤەکرنا پشکا نوو یا زاروک و ئافرەت و زاروکبوونێ پێنگاڤەکا باشە بۆ دەڤەردارییا ئاکرێ و دێ خزمەتەکا باش بۆ دەڤەرێ ب گشتی کەت و کەرتێ ساخلەمیێ ل دەڤەرێ بەتە قوناغەکا نوو و گوت، سوپاسیا رێکخراوا ئایسپو یا ئیتالی دکەین کو ب پشتەڤانیا دارای یا ئیکەتیا ئەوروپی هەردەم هاریکاربوویە ل نوژەنکرن و ئافاکرنا پروژان کارێن باش ئەنجامداینە و دێ بەردەوام پالپشت بین ل ئەنجامدانا پروژان.
د. ئەڤراسیاب موسا، رێڤەبەرێ گشتی یێ ساخلەمیا پارێزگەها دهۆکێ دیارکر کو ئەڤ پشکا نوو ب هەماهەنگیا رێکخراوا ئایسپو یا ئیتالی و پشتەڤانیا دارای یا ئێکەتیا ئەوروپی هاتیە چێکرن و پێک دهێت ژ 31 تەختێن بەری و پشتی زاروکبوونێ و ژورەکا نشتەرگەیێن بچوک و دوو ژورێن راوێژکاریێن بەری و پشتی زاروکبوونێ و دەرمانخانە و ژورا تافیلکرنێ و ژورا خۆ گوهارتنێ وچەند کوگەه و کارگێری بخۆڤە دگریت، هەروەسا کارگەها ئوکسجینێ کارەکێ باش تێدا هاتەکرن ل دویف ستانداردێ جیهانی ئوکسجین هاتیە دابینکرن.
ژلایەکێ دنڤە نونەرێن رێکخراوا ئایسپو یا ئیتالی دیارکر کو ئەو کەیف خۆشن ب ڤەکرنا پروژێ ناڤبریبۆ بۆ دەڤەردارییا ئاکرێ وگوت، بەری نوکە ژی ل دهۆک و ئاکرێ ژی پروژە ئەنجامداینە، راستە ئەڤ پروژە نەشێت هەموو کێاسیان ل دەڤەرا ئاکرێ چارەسەر بکەت، بەلێ پشکەک ژوان ئاریشان دێ هێنە چارەکرن و ئەم دێ بەردەوام بین ل ئەنجامدانا پروژان یێت پێدڤی بۆ پارێزگەها دهۆکێ ب گشتی.