ل سنورێ دەڤەردارییا ئامێدیێ ب تایبەتی ناوچەدارییا سەرسنکێ هژمارەکا کوچک و ئاڤاهیێن نایاب ژلایێ رژێما بەعس هاتینە چێکرن، بەلێ ژلایێ خەلکی ڤە هاتینە تێکدان و جهێن شولە ژێ ژی نەشیاینە ب پارێزن، شارەزایەکێ شینواری دیارکر کو پێدڤی یە ژ روویێ گەشتوگۆزاری ڤە مفاییەکێ باش ژ وان کوچک و ئاڤاهیان بهێنە وەرگرتن.
سەردار هێتوتی، شارەزایێ شینواری و ئەندامێ سەنتەرێ قوبەهان یێ کومکرنا بەلگەنامە و دەستنڤێسان ل دەڤەرا بەهدینان بۆ "وشە" گوت، پشتی کەفتنا بەعسیان ل هەرێما کوردستانێ، زێدە کوچکێن سەروکاتیێ کەفتنە ژێر دەستێ ڕێڤەبەریا کوردی ل عیراقێ کو ئەو ژی پرانیا وان دەڤەرا ئامێدیێ بوون، ڤان کوچکان کو پتریا وان کار تێدا خلاس ببوو و بەرهەڤی پێشوازیا دکتاتوری بوون، بەلێ خۆشبەختانە نەشیان ل وان هەموو کوچکێن خوە دەمی بورینیت، مینا کوچکێن وان ل ئینشکێ، گارەیی وچەند جهێن دی.
زێدەتر گوت، جهێ داخێ یە ژلایێ وەلاتیان و گرنگینەداناوان ژلایێ جهێ شولەژێ، کار ل سەر تێکدانا وان کوچکێن بەرکەفتی هاتیەکرن و پتریا وان ب تنێ وەکو شینوار ماینە و ئاسن و کەڤرێن وان ب هەموو کەلوپەلێن دیترڤە هاتینە تاڵانکرن و برن.
ئەگەر کار ل سەر پاراستنا وان هاتباکرن، ئەڤوۆ دا بنەرییەکێ دیتر یێ توریزمێ و گەریانێ ل ئامێدیێ و دا پەیدا بیت
ناڤبری ل بارا گرنگی یا مانا وان ب تایبەتی ژ روویێ گەشتوگۆزاری گوت، ئەگەر کار ل سەر پاراستنا وان هاتباکرن، ئەڤوۆ دا بنەرییەکێ دیتر یێ توریزمێ و گەریانێ ل ئامێدیێ و دا پەیدا بیت و هژمارەکا زێدە یا خەلکی قەستا ڤان جها کەن و د هەمان دەم دا دا هندەک کەس ژی ب ڕیکا وان بنە خودان داهات، لەوما دبێژین ل شوونا خراب کرنێ بلا پاراستبان و پتر گرنگی پێ هاتبادان دابان و هند ژ وان کربانە موزەخانە و د ناڤا هندەکان دا ژی سەرکەفتنێن کوردان هاتبانە پێشچاڤکرن و یێن مای ژی بلا وەکی خوە بان و ببانە جهێ حێبەتیا گەریدان، بەلێ جهێ دلگرانیێ یە ئەم نەشیاین مفا ژێ وەرگرین.
جهێ ئاماژەپێکزنێ یە تنێ ل سنورێ سەرسنکێ پتری پێنج کوچک و ئاڤاهیێن نایاب هاتینە چێکرن، ئێک ژ وان ئوتێلەکا پێنج ستێرە و ب بەری هاتیە چێکرن، نوکە کومپانیەک کار ل سەر نوژەنکرنا وان دکەن.