شەڤا بوری چەکدارێن پەکەکێ تەقە ل هێزێن زێرەڤانی یێن پێشمەرگەی ل نێزیک کوانێ یا سەر ب ئامێدیێ کر.
ب گورەی پێزانینێن وشە ئەو هێزا پێشمەرگەی د ئەرکێ خوە دا بویە و ژ نێشکەکێڤە پەکەکێ تەقە لێ کریە، بەلێ پێشمەرگەی بەرسڤا وان نەدایە.
ژێدەرێن پێشمەرگێ زێرەڤانی ل دەڤەرێ بەحس ل وێ یەکێ دکەن کو تەقە نێزیکێ 15 خولەکان ب رێیا چەکێ سڤک یێ وەکو کلانشینکوف بویە.
هێزێن پێشمەرگەی ب مەرەما پاراستنا سەر ومالێ وەلاتیان چەند خالێن نوو ل دەڤەرا ئامێدیێ ب تایبەتی ل سەرێن رێیێن هەڤدوبر دروستکرینە و پاراستنێ ل سەر دکەن.
پێشتر ژی چەندین جاران تەقە ل پێشمەرگەی ل دەڤەرێ هاتیەکرن و د ئەنجامدا پێشمەگە بویە قوربانی، ئەڤە زێدەباری کو ژ ئەگەرێ دانانا مادەیێ تی ئێن تی چەندان پێشمەرگە شەهید بوینە.
ئامێدیێ دەڤەرەکا چیاییە و دکەڤیتە باکورێ روژهەلاتێ دهۆکێ ب دوراتیا 60کم و پێکدهێت ژ شەش ناوچەداری و پتری 300 گوندان، بەلێ ژ ئەگەرێ شەر و ئالوزیێن دناڤبەرا تورکیا و پەکەکێ نێزیکێ 210 گوند هاتینە چولکرن.