دوو رۆژنامەنوس لە (NRT) یەوە بێڕێزیان بەرامبەر پێشمەرگە کردووە

وەزارەتی پێشمەرگەی حکوومەتی هەرێمی کوردستان لە روونکردنەوەیەکدا بڵاویکردەوە، ڕۆژی 20/10/2016 لەبەرنامەیەکی راستەوخۆی کەناڵی NRT دا هەریەک لە عەدنان عوسمان و کەمال رەئووف، بێ ڕێزییان بە پێشمەرگە کرد و بەو هۆیەوە هەستی پێشمەرگە و خانەوادەی شەهیدان بریندار کرا و خەڵکی کوردستانیان نیگەران کرد.

لە درێژەی راگەیەنراوەکەدا هاتووە، هەر بۆیە و لەبەرخاتری شکۆی پێشمەرگە و بۆ ئەوەی پێشمەرگە قارەمانەکان لە بەرەکانی شەڕدا بە بینینیان دڵگران نەبن، بڕیارمان دا تا ئەو کاتەی کەناڵی NRT بە فەرمی داوای لێبوردن دەکات، ڕێگە بە پەیامنێر و وێنەگرەکانیان نادەین بۆ ڕووماڵکردنی شەڕ بچنە بەرەکان و نزیکی سەنگەرەکانی پێشمەرگە بکەون.

دەقی راگەیەنراوەکە:

‎ڕۆژی 20/10/2016 لەبەرنامەیەکی راستەوخۆی کەناڵی NRT دا هەریەک لە عەدنان عوسمان و کەمال رەئووف، بێ ڕێزییان بە پێشمەرگە کرد و بەو هۆیەوە هەستی پێشمەرگە و خانەوادەی شەهیدان بریندار کرا و خەڵکی کوردستانیان نیگەران کرد.

‎ئەوە لەکاتێکدایە کەهەر ئەمڕۆ هێزەکانی پێشمەرگە لەشەڕێکی گەورە و قورسدابوون لەگەڵ تیرۆریستانی داعش لەمیحوەرەکانی باشیک و ناوەران و تلسقۆف، پێشمەرگە توانی بەخوێنی ئاڵی داستانێکی نوێ تۆمار بکات و تیرۆریستان لەبەشێکی تری خاکی کوردستان وەدەر بنێن.

‎ ئێمە وێڕای نیگەرانیی زۆرمان لە دەربڕینە پڕ لە حقد و کینەکانی ئەو دوو کەسە، رایدەگەیەنین کە پێشمەرگە رووحی فیداکاری و پێناسی نیشتمانییە و لەسەر ئاستی جیهان بۆتە سیمبولی ئازایەتی و هەر بۆیە دوژمن و نەیارانی گەلەکەمان چاویان بە پێشمەرگە هەڵنایەت .

‎بۆیە داوامان لە بەڕێوەبەرایەتیی کەناڵەکە کرد کە بێبەرییبوونی خۆیان لەو لێدوانە چەواشەکاری و سوکایەتییە ڕابگەیەنن، بەڵام بەداخەوە وێڕای ئەوەی دووجار بەڵێنیان دا دواجار خۆیان لەوە دزییەوە و ئەوەش لای ئێمە و پێشمەرگە و خەڵکی کوردستان وا دەخوێندرێتەوە کە هاوهەڵوێستی ئەو دووکەسەن مەگەر پێچەوانەکەی بسەلمێنن. هەر بۆیە و لەبەرخاتری شکۆی پێشمەرگە و بۆ ئەوەی پێشمەرگە قارەمانەکان لە بەرەکانی شەڕدا بە بینینیان دڵگران نەبن، بڕیارمان دا تا ئەو کاتەی کەناڵی NRT بە فەرمی داوای لێبوردن دەکات، ڕێگە بە پەیامنێر و وێنەگرەکانیان نادەین بۆ ڕووماڵکردنی شەڕ بچنە بەرەکان و نزیکی سەنگەرەکانی پێشمەرگە بکەون.

‎هەروەها لەکاتێکی گونجاوی تریشدا، ئەگەر پێویست بکات، رێوشوێنی تر دەگرینە بەر.

‎

سەربەرزی بۆ پێشمەرگە .

‎دروود و نەمری بۆ شەهیدان

‎وەزارەتی پێشمەرگە