پشتی کو مەترسی ل سەر هەرفینا قشلا ئاکرێ یا شینواری دروست بوی، حوکمەتا هەرێما کوردستانێ ئەڤ مەترسیە ب جدی وەرگرت و کوژمەکێ پارەی بۆ نوژەنکرنا وێ تەرخانکرن و نوکە کار سەر چێکرنا وێ دهێتەکرن.
بلند رزا زێباری، سەرۆکێ باژێرڤانیا ئاکرێ بۆ "وشە" گوت، پشتی کو مەترسی ل سەر هەرفینا قشلا ئاکرێ دروستبوی و مە ئالیێن شولەژێ هایدارکری، بریار لسەر نوژەنکرنا وێ ژلایێ حوکمەتا هەرێما کوردستانێ هاتەدان.
زێدەترگوت، کوژمێ 166 ملیون دینار ژلایێ بودجا وەبەرهێنانێ یا وەزارەتا باژێرڤانی و گەشتوگۆزار بۆنوژەنکرنا قشلا ئاکرێ هاتنە تەرخانکرن و نوکە کار د نوژەنکرن وچێکرنێ دا دهێتەکرن.
ژلایەکێ دنڤە دکتور بێکەس بریفکانی، رێڤەبەرێ شینوارێن دهۆکێ بۆ "وشە" گوت، نوژەنکرنا قشلا ئاکرێ دێ ل سەر هەمان شێوە و ستایلێ دیرۆکی وشارستانی و کەڤنار بیت یێ ل سەر هاتیە چێکرن.
چێکرنا قشلێ دێ ب بەرەکێ تایبەت بیت کو ب رێیا ئێتون ل ئامێدیێ دهێتە چێکرن
زێدەتر گوت، چێکرنا قشلێ دێ ب بەرەکێ تایبەت بیت کو ب رێیا ئێتون ل ئامێدیێ دهێتە چێکرن، بۆ دەما 40 روژان ئەو بەر دهێتە گەرمکرن هەتا دبیتە کسل، پاشان بۆ دەما نێزیکێ 15 روژان دێ هێتە سارکرن داکو دروست رەنگو شێوەیێ بەرێ کەڤنارێ قشلا ئاکرێ بیت، کەسانێن شارەزا و تایبەتمەند دێ لسەر کارکەن.
قشلا ئاکرێ دزڤریت بۆ سەدەمێ دەولەتا عوسمانی دەما کو ل دەڤەرێ حوکمرانی دکر، نوکە ئێکە ژ وان جهێن شینواری کو رێژەییەکا زۆر یا گەشتیاران قەست دکەنێ، نوژەنکرنا وێ دێ بیتە ئەگەر کو هژماران وان زێدەتر بیت.