ژنەكا ل زاخۆیی كو دوو گیان بویە ل گەل هەڤژین و زارویێن خوە قەستا بیلاروسیا دكەت داكو خوە بگەهینە ئەورۆپا، بەلێ پشتی دوو هەیڤان ل پولەندا گیانێ خوە ژ دەست دا و كەسوكارێن وێ دخوازن تەرمێ وێ و هەڤژین و زاروێن وێ دوبارە ڤەگەرینن كوردستانێ.
رێبار وەرمێلی، پسمامێ ئەڤینێ بۆ "وشە"گۆت، ئەڤین عیرفان ل رێكەفتی 4/10/2021ێ ل گەل هەڤژین و پێنج زارویێن خوە ل زاخۆ بەر ب وەلاتێ بیلاروسیا چوینە ب مەرەما وێ یەكێ خوە بگەهینن ئەورۆوپا و ژیانەكا باشتر ببورینن.
زێدەتر گۆت، دەما كو دگەهنە بیلاروسیا قەستا پولەندا دكەن، پشتی بورینا دەمەكێ ئەڤین نەخۆش دبیت ژ بەركو ئەڤین یا دوو گیان بو و د هەیڤا پێنجێ دابوو، د وێ رەوشێ دا زارویێ وێ ل بەرچو و پشتی 21 رۆژان ل نەخۆشیێ ل نەخۆشخانەكا پولەندا گیانێ خوە ژ دەست دا، نوكە ئەڤین و زارویێن خوە هێشتا ل پولەندانە.
ناڤبری د درێژاهیا ئاخفتنێن خودا دیاركر ژی كو هەتا نوكە ئەگەر نەدیارن كا ژبەر چ وەغەركریە و گۆت ژی، رێیا ئەورۆپا ل پولەندا و بیلاروسیا زۆر ب زەحمەت و ماندووبوون و سەرما و نەخوشیە دبیت ئەڤ یەك ژی ئێك ژ ئەگەرا بیت، داخوازێ ل حوكمەتا هەرێما كوردستانێ دكەین كو تەرمێ ئەڤینێ ڤەگەرینن كوردستانێ، ژبلی ڤێ یەكێ هەڤژین و زارویێن وێ ژی ڤەگەرینن، داخوازێ ل خەلكی ژی دكەین كو زێدەتر بێهنفەره بن و قەستا دەرڤە نەكەن، بینم كو تەنگاڤی كورتن و ئەڤرۆ یان سوبەهی دێ دوماهی هێن.
دەما بوری دا حوكمەتا هەرێما كوردستانێ پتری هزار پەنابەر جارەكا دە ڤەگەراندینە كوردستانێ، پشتی كو ل بیلاروسیا و پولەندا توشی چەندان ئاریشە و ئاستەنگێن هەری نەخوش بوین.