ئەڤرۆ سەرپەرشتێ ئیدارا سەربەخۆ یا زاخۆ، د پێشوازیەکا پرۆتۆکۆلیدا ل گەل وەزیرێ سامانێن سرۆشتی و شاندێ د گەل دا، رێڤەبەریا نەفت و کانزایان ل زاخۆ ڤەکر.
کەمال ئەترۆشی، وەزیرێ سامانێن سروشتی یا حوکمەتا هەرێما کوردستانێ، د چارچوڤێ سەرەدانێن خوە دا بۆ پارێزگەها دهۆکێ، ئەڤرۆ سەرەدانا ئیدارا سەربخوەی یا زاخۆ ژی کر ول گەل بەرپرسێن کارگێریێن دەڤەرێ کومبوو، د ڕوونشتن و هەڤدیتنێن خوە دا، باس ل ئاریشێن پەترۆلێ ب گشتی ل هەرێما کوردستانێ و قەیرانا وان هاتە كرن ، دیسان بەحس ل پروسا وەرگرتنا گازا سپی و چەوانییا بەلاڤکرنا وێ لسەر خەلکێ دا ژی هاتەکرن.
هەر د چوارچوڤێ رووونشتنێن خوە دا ،دانوستاندن ل سەر زێدەکرنا پشکا نەفتێ و پانزینێ بۆ سنۆرئ ئیدارا سەربەخوەیی یا زاخۆ هاتە کرن.
وەزیرێ ناڤبری دیارکر کو هەر چەندە قەیران یا بەردەوامە، بەلێ هەول دهێنەدان کو ب رێیا سەرۆکێ حوکمەتا هەرێما کوردستانێ چارەسەریا وان بهێتەکرن و گوت، ل زاخۆ نێزیکی 100 هزار ئاوارە تێدا دژین، هەولدەین دەرفەتێن کاری ل کۆمپانیێن پترۆلێ ل زاخۆ بۆ خەلکی دابین بکەین.
ل دوماهیا کومبوونێ ژی ڕێڤەبەریا نەفت و کانزایان ل زاخۆ هاتە ڕاگەهاندن و د دەمەکێ نێزیک دا دێ کەڤتە د خزمەتا خەلکێ دەڤەرێ دا.