BMW ئۆتۆمبێلی بێ شوفێر به‌رهه‌م دێنێت

كۆمپانیای به‌ناوبانگی به‌رهه‌مهێنانی ئۆتۆمبێل، زانیاریی له‌باره‌ی به‌رهه‌مهێنانی ئۆتۆمبێلێكی زیره‌كی بێ شوفێری ئاشكرا كرد و ئاماژه‌ی دا، له‌ ساڵی 2021 ئه‌و ئۆتۆمبێله‌ ده‌خاته‌ بازاڕه‌كانه‌وه‌.

جێگری سه‌رۆكی ئه‌نجوومه‌نی به‌ڕێوه‌بردنی كۆمپانیای BMWی ئه‌ڵمانی "ئه‌لمار فریكنشتاین" ئاشكرای كرد، كۆمپانیاكه‌یان خه‌ریكی به‌رهه‌مهێنانی یه‌كه‌م ئۆتۆمبێلی بێ شوفێر و زیره‌كه‌.

هه‌روه‌ها گوتی، بی ئێم ده‌بیلو ئۆتۆمبێلی بێ شوفێر و زیره‌ك له‌ ئاسته‌كانی سێ و چوار و پێنج به‌رهه‌م ده‌هێنێ و ئێسته‌ش نموونه‌یه‌كی تایبه‌تی ئه‌و ئۆتۆمبێله‌ كه‌ ته‌نیا بۆ نێو كۆمپانیاكه‌یه‌ به‌رهه‌م هێنراوه‌، تا تاقیكردنه‌وه‌ی له‌سه‌ر بكرێ و بتوانرێ په‌ره‌ی زیاتری پێ بدرێت.

ئاماژه‌ی دا، ئه‌و جۆره‌ ئۆتۆمبێله‌ زیره‌كانه‌ی له‌ ئاستی پێنجه‌مدان، به‌هیچ شێوه‌یه‌ك پێویستیان به‌ مرۆڤ نییه‌ و له‌ هه‌موو حاڵه‌ته‌كان خۆیان شوفێری ده‌كه‌ن و دۆخه‌ ناهه‌مواره‌كان تێپه‌ڕ ده‌كه‌ن، به‌ڵام ئۆتۆمبێلی جۆری سێیه‌م له‌ كاتی ته‌نگانه‌ پێویستی به‌ به‌شداری مرۆڤ ده‌بێ، تا له‌ دۆخه‌كان ڕزگاریان ببێت.

كۆمپانیای BMWی ئه‌ڵمانی له‌ 1914 دامه‌زراوه‌ و له‌ 22 ئادار/مارسی 1929 یه‌كه‌م ئۆتۆمبێلی خۆی به‌رهه‌م هێناوه‌ و باره‌گای سه‌ره‌كی له‌ شاری میونشنی ئه‌ڵمانیایه‌، یه‌كێكه‌ له‌ كۆمپانیا هه‌ره‌ به‌ناوبانگه‌كانی دنیا بۆ به‌رهه‌مهێنانی ئۆتۆمبێل و له‌ سه‌رده‌می جه‌نگی دووه‌می جیهانی له‌سه‌ر ڕاسپارده‌ی هیتله‌ر ده‌ستی به‌ به‌رهه‌مهێنانی بزوێنه‌ری فڕۆكه‌ كردووه‌، له‌ بواری به‌رهه‌مهێنانی كه‌لوپه‌له‌كانی فڕۆكه‌ش ده‌ستێكی باڵای هه‌یه‌ و ژماره‌ی كارمه‌ندانی 107 هه‌زار و 500 كه‌س ده‌بێ، به‌گوێره‌ی داتاكانی ساڵی 2007 سه‌رمایه‌ی ئه‌و كۆمپانیایه‌ 56.02 ملیار یۆرۆ ده‌بێت.

سه‌رچاوه‌/ ئه‌لبه‌یان


وشە - باز ئه‌حمه‌د


PM:12:18:18/03/2017




ئه‌م بابه‌ته 1549 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌