لافاو زیانی بە
گوندەكانی سەرسنووری ناوچە كوردستانییەكانی دەرەوەی هەرێمی کوردستان لە پاریزگای
دیالە گەیاندووە و بەهۆی هەڵكەوتەی جوگرافی ناوچەكەش ساڵانە ئەو مەترسییە دووبارە دەبێتەوە.
مازن عەبدولكەریم،
بەڕێوەبەری شارەدێی قەزانیەی هاوسنووری ئێران رایگەیاند، ماوەی دوو رۆژە لافاوێكی گەورە
لە دۆڵ و شێوەكانی كۆماری ئیسلامی ئێرانەوە لێژ بۆتەوە بۆ ئەمبەرەی سنوور و زیانێكی
بەرچاوی بە كەرتی كشتوكاڵ گەیاندووە کە بە ٣٠ دۆنم زەوی كشتوكاڵی دەخەمڵێنرێت کە
کەوتووەتە نێوان شارەدێی مەندەلی و قەزانیە، هاوكات بۆتەهۆكاری داڕمانی پردێك لەنێوان
مەندەلی و پارێزگای واست .
ئەو گوتیشی، ساڵانە
لە وەرزی زستاندا ئاوی پەنگ خواردووی بارن و بەفر لە دۆڵ و شێوەكانی ئێرانەوە روو
دەکاتە باشووری کوردستان و زیانی زۆر بە ناوچەکە دەگەیەنێت.
بەرێوەبەری شارەدێی
قەزانیە، ئاماژەیدا هاوڵاتیانی ناوچەكە بەهۆی مەترسی لافاوەوە بێبەش بوون لەگەشت و
سەیران، لەگەڵ ئەوەشدا فەرمانبەرانی بەشێكی
بەرچاو لەفەرمانگە خزمەتگوزارییەكان لە دەوامدان و شەوی رابردوو هاوڵاتیانی پێنج گوندیان
لەمەترسی ژێر ئاوكەوتن رزگار كرد .
هکات ئازاد حەمید،
سەرۆكی ئەنجوومەنی شارەوانی مەندەلی، بۆ "وشە" ئاماژەیدا كە تاكە رێگە بۆ
رێگەگرتن لە دووبارە بوونەوەی هاتنی لافاوی سەرسنوور دروستكردنی بەنداوە.
شارەدێیەكانی مەندەلی
و قەزانیە دوو ناوچەی كوردستانی دەرەوەی هەرێمن لە سنوری دیالە، ئەو دووناوچەیە ئەگەرچی
سەر بە پارێزگای دیالەن بەڵام لە پارێزگای واستەوە نزیكن.
گەرمیان / سەبری
هۆرینی