دژ بە بڕیارێكی وەزارەتی خوێندنی باڵا خۆپیشاندان ئەنجامدەدرێت
بڕیارە رۆژی یەكشەم 26ی ئاداری 2017 لەبەردەم وەزارەتی خوێندنی باڵا و توێژینەوەی زانستی حكوومەتی هەرێمی كوردستان خۆپیشاندان ئەنجام بدرێت.
ئەمڕۆ پێنجشەم 23ی ئاداری 2017 یەكێك لەڕێكخەرانی خۆپیشاندانەكە بە"وشە"ی راگەیاند، بریارە كاتژمێر 10ی پێشنیوەڕۆی رۆژی 26ی ئادار لە بەردەم وەزارەتی خوێندنی باڵا و توێژینەوەی زانستی لەشاری هەولێر خۆپێشاندانی گەورە ئەنجام بدەین.
زیاتر گوتی، مەبەست لەخۆپیشاندانەكەدا ناچاركردنی وەزارەتی خوێندنی باڵایە بۆ هەڵوەشاندنەوەی بریارەكەی لەبارەی زمانی كوردی و وەزارەت داوای لێبوردن لە هاونیشتمانیانی كوردستان و پسپۆڕانی كوردی و عەرەبی بكات.
رای گەیاند، خاوەنی ئەم بڕیارە و بیرۆكانە پێویستە ڕووبەڕووی دادگا بكرێنەوە، چونكە بەپێچەوانەی دەستووری هەمیشەیی عێراق(2005) و یاسای زمانە فەرمییەكانی هەرێم(2014) و یاسای زمانە فەرمییەكانی عێراق(2014) و یاسای ئەكادیمیای كوردی ڕەفتاریان كردووە.
بەپێی زانیاریەكانی "وشە" مامۆستایانی بەشەكانی زمانی كوردی و زمانی عەرەبی و قوتابیان و چەندان كەسایەتی و هاووڵاتیان بەشداری لەو خۆپیشاندانەدا دەكەن.
وەزارەتی خوێندنی باڵاوتوێژینەوەی زانستی حكوومەتی هەرێمی كوردستان پێشتر بڕیاریدابوو كە تاقیكردنەوەكان لەزمانی كوردی بۆ قوتابیانی زانستی ئارەزوومەندانەبێت و ئەمەش ناڕەزایی فراوانی لێ كەوتەوە.
وشە -
سهرخێڵ هاشم