یەكێك لەو شتانەی بێ ویستی مرۆڤ روو دەدات، تەنانەت كۆرپەلە لەناو سكی دایكیدا دەیكات، باوێشكدانە، مرۆڤ نازانێت بە وردی لەش بۆچی ئەنجامی دەدات، لەبارەی هۆكارەكەی چەند بیردۆزێك هەن، یەكێكیان كە بڵاوە باسی ئەوە دەكات باوێشك یارمەتی لەش دەدات بۆ راكێشانی ئۆكسجینی زیاتر، بەڵام ئەوانیتر چی دەڵێن؟
یەكێك لەو بیردۆزانەی زانست زیاتر پاڵپشتیی لێ دەكات وەك هۆكاری باوێشككردن، بۆ رێكخستنی پلەی گەرمی مێشكە، كاتێك توێژینەوەیەك لە 2014 چاودێری باوێشككردنی 120 كەسی كرد، بۆی دەركەوت كە لە وەرزی زستاندا كەمتر روودەدات، بۆیە ئەو كاتەی پلەی گەرمی مێشك زۆر بەرزترە لە ئاسایی، لەش لە رێگەی باوێشكەوە هەوا رادەكێشێت و یارمەتی ساردكردنەوەی مێشك دەدات.
بە گشتی وەك ماڵپەڕی
" WebMD"ی پزیشكی باسی كردووە، پێنج حاڵەتی سەرەكی هەن كە وا دەكەن مرۆڤ باوێشك بكات ئەوانیش:
یەكەم/ ئەوكاتەی مرۆڤ ماندووە، چونكە ئەوكاتە مێشك سست دەبێتەوە، باوێشك دەبێتە هۆی نزمبوونەوەی پلەی گەرمییەكەی.
دووەم/ ئەوكاتەی هەست بە بێزاری دەكەیت، چونكە ئەوكات مێشك هەست بە هاندان ناكات و سست دەبێتەوە، بەوەیش پلەی گەرمی دێتە خوارەوە.
سێیەم/ ئەوكاتەی كەسێك دەبینیت كە باوێشك دەكات، یان وێنەی ئەو كەسە دەبینیت.
چوارەم/ لەش دەیەوێ خۆی بەخەبەر بێنێت، ئەو جووڵانەوەیش یارمەتی دەدات بۆ فرەوانبوونی سییەكان و دەبێتە هۆی لێكراكێشانی ماسولكە و جومگەكانی لەش، رەنگە خوێنیش بەرەو دەموچاو و مێشك پاڵ بنێت بۆ وریاكردنەوەی زیاتری.
پێنجەم/ گۆڕانی ئاستی بەرزی، وەك بوونت لەناو فڕۆكەدا، یان وەك كاردانەوەیەكی لەش بۆ هاوسەنگكردنی پەستان لە گوێیەكان.
بە گشتی مرۆڤ لە قۆناغی كۆرپەلەیی لەناو سكی دایكی باوێشك دەكات، بێ رەچاوكردنی رەگەز و تەمەن و سیستمی خۆراك و ئاستی توانای لەش، هەر مرۆڤێك رەنگە وەك تێكڕا لە 10 جار لە سەعاتێك باوێشك بكات، واتە 240 هەزار جار لە تەمەنیدا.
هۆكاری تر هەیە وا دەكەن مرۆڤ زیاتر باوێشك بكات، لەوانە خەواڵوویی و ماندووبوون و شێوانی نوستن وەك پچڕانی هەناسە، رەنگە بەهۆی كاریگەریی لابەلای دەرمانێكەوە بێت، وەك دەرمانی خەمۆكی و رارایی، لە هەندێك حاڵەتی دەگمەنیش ئاماژەیە بۆ بوونی گرێ لە مێشك یان تووشبوونی نۆرەی دڵ یان تێكچوونی جگەر.