سەرۆك وەزیرانی عێراق وەڵامی حكوومەتی توركیا دەداتەوە، لە ئەنجامی ئەو بڕیارەی كە هێزەكانیان ناكشێننەوە.
حەیدەر عەبادی، سەرۆك وەزیرانی عێراق، ئەمڕۆ پێنجشەم لە كۆنگرەیەكی ڕۆژنامەوانیدا ڕای گەیاند كە پێویستە توركیا ئەوەیان بۆ دەركەوێ هاتنی سوپاكەیان بۆ خاكی عێراق و مانەوەیان، وەك گەشت بەسەریانەوە ناڕوا، بەڵكو هەڵوێستی توند و بەرپەرچدانەوەمان دەبێت.
ئەم قسانەی سەرۆك وەزیرانی عێراق، لە كاتێكدایە كە ئەمڕۆ بینالی یڵدرم، سەرۆك وەزیرانی توركیا گوتی: "حكوومەتی عێراق، بەغدا چی دەڵێت با بیڵێت، توركیا بۆ ئەوەی بەرەنگاری داعش ببێتەوە لە ناوچەكەدا، بۆ ئەوەی بەزۆرەملێ دیمۆگرافیای ناوچەكە نەگۆڕدرێت، بوونی خۆی لەوێ بەردەوامی پێ دەدات". ئاماژەی بەوەش دا: ئامانجی ئێمە بریتییە لەوەی كە زیاتر مرۆڤەكان تراژیدیا نەبینن، زیاتر خوێن نەڕژێت و بەر لە توندوتیژییەكان بگیرێت. لە كاتێكدا كە سەربازی دەیان وڵات لە خاكی عێراق بسووڕێنەوە، ئەو جۆرە گوتانە بە توركیا كە هەمیشە فڕیادڕەسی ناوچەكە بووە، مافی حكوومەتی عێراق نییە.
لەسەر ئەو كێشەیە، وەزارەتی دەرەوەی عێراق داوای سازكردنی دانیشتنێكی نائاسایی ئەنجوومەنی ئاسایشی كردووە بۆ باسكردنی پێشێلكارییەكانی سوپای توركیا بۆ سەر خاكی عێراق و دەستوەردانی لە كاروباری ناوەخۆی.
ئەو وەزارەتە دوێنێ چوارشەم بڕیاری دا بانگێشتی باڵوێزی توركیا لە بەغدا بكات و بە فەرمی تێبینییەكانی عێراقی لەبارەی كردەوەگەلی مووسڵ پێ بڵێ و لە وادەی دەست پێكردنیشی ئاگەداری بكاتەوە. لە بەرامبەریشدا توركیا باڵوێزی عێراقی بانگێشت كرد و تێبینی و هەڵوێستی خۆی بە ڕوونی پێ گوت.
ئەمەش دوای ئەوە دێت كە ڕۆژی سێشەم لە بەیاننامەیەكدا، كۆمەڵێ ئەندامی ئەنجوومەنی نوێنەرانی عێراق داوایان لە وەزارەتی دەرەوە كرد كە باڵوێزی توركیا دەربكرێ، چونكە پەرلەمانی وڵاتەكەی بڕیاری لەسەر درێژكردنەوەی ماوەی مانەوەی هێزەكانیان داوە لە عێراق. ئاماژەشیان بەوە كرد كە هەموو پێوەندییەكی ئابووریش لەگەڵ توركیا ڕابگیرێ.
ئەو هێزەی سوپای توركیا لە سەربازگەی "زەلكان" لە نزیش شارەدێی "بەعشیقە" جێگیر بوون، پەرلەمانی توركیایش بە زۆرینەی دەنگ، بڕیاری لەسەر مانەوەی هێزەكانیان دا، ئەمەش لەلایەن حكوومەتی عێراقەوە بە پێشێلكاری ناو برا و داوایان لە نەتەوە یەكگرتووەكان كرد كە هۆشدارییان بداتێ.
وشە/ ئاژانسەكان، كوردۆ شابان