لە ساڵی 2015 و 2016، هاوپەیمانی نێودەوڵەتی بۆ ڕووبەڕووبوونەوەی داعش لە عێراق و سووریا، پەرەی بە هەڵمەتەكان دژی تیرۆریستان لە سووریا دا و بەو هۆیەوە هێزەكانی سووریای دیموكرات بە سەرپەرشتیی ئەمەریكا، دامەزرا و لەلایەن ئەمەریكا و وڵاتانی هاوپەیمان پێداویستی سەربازییان بۆ ڕەوانە كرا، بەڵام ئێستە دەركەوتووە ئەو چەكانە بەشێكی بۆ شەڕ دژی تیرۆریستانی داعش بەكار ناهێنرێن، بەڵكو دەبرێنە چیای قەندیل و ڕادەستی گەریلاكانی پەكەكە دەكرێن. فەرماندەیەكی لەشكری ڕۆژ ئەوە دووپات دەكاتەوە و دەڵێ، بەدڵنیایییەوە یەپەگە چەك دەنێرنە قەندیل.
دوو دژە تانكی ئەمەریكی لە هەكاری گیراون
بەگوێرەی ئەو وێنە و زانیارییانەی دەست "وشە" كەوتوون، لە ماوەی ڕابردوودا هێزە تەناهییەكان لە باكوری كوردستان دوو دژە تانكی پێشكەوتووی ئەمەریكیان لە دوو ناوچەی جیاجیا گرتووە. زانیارییەكان ئەوە پشتڕاست دەكەنەوە كە ئەو دژە تانكانە، ئەمەریكین و پێشتر بۆ یەپەگە نێردراون.
لە ڕۆژی سێی نیسان/ئەپریل (ئەم مانگە) یەكێك لەو دژە تانكانە لە ناوچەی شەمدینلی پارێزگای هەكاری باكوری كوردستان دەستی بەسەردا گیراوە، كە لە جۆری M136 AT4 بووە، لە میانەی گەڕان و پشكنینی كۆماندۆی توركیا لە ناوچەكە دۆزراوەتەوە و دەستی بەسەردا گیراوە.
سەرچاوە تەناهییەكانی توركیا ئەوەیان دووپات كردووەتەوە كە ئەو دژە تانكە، بەهیچ جۆرێك لە بازاڕی ڕەش بوونی نییە تا بگات بە پەكەكە و تاكە ڕێگە ئەوەیە لەلایەن یەكینەكانی پاراستنی گەل "یەپەگە"ی سەربە پەیەدە لە باكوری سووریاوە بە قاچاغ ڕەوانەی قەندیل كراون و پەكەكەش هێناویەتییە ناوچەكانی باكوری كوردستان تا چالاكی چەكداری پێ ئەنجام بدات.
لەشكری ڕۆژ: چەك لە ڕۆژئاواوە دەچێتە قەندیل
لەسەر ئەو پرسە و بەهۆی ئەوەی پێشمەرگەی ڕۆژئاوای كوردستان خەڵكی ناوچە سنوورییەكانی نێوان توركیا و سووریایان تێدایە و پێوەندیشیان بە خەڵكی ئەو ناوچانەوە هەیە و زانیاری زیاتریان لەسەر پرسی چوونی چەكی ئەمەریكایی بە قاچاغ لە ڕۆژئاواوە بۆ قەندیل هەیە.
قادر شێخ مەم فەرماندەی هێزی دووی لەشكری ڕۆژ (هێزی پێشمەرگەی ڕۆژئاوای كوردستان) بە"وشە"ی گوت، تا ئێستە ئەوە بە دیكۆمێنت یەكلا نەبووەتەوە، بەڵام 100% ئێمە دڵنیاین ئەو چەكانەی ئەمەریكا و هاوپەیمانان بۆ چەكدارانی پەیەدەی دەنێرن لە ڕۆژئاوای كوردستان، پشكێكی دەچێتە قەندیل.
ئەو فەرماندەیە دووپاتی كردەوە "بەدڵنیایییەوە ئەو چەكانە دەچنە قەندیل، ئەوە گومانی تێدا نییە".
ئەنەكەسە
بەرپرسێكی ئەنجوومەنی نیشتمانیی كورد لە سووریا هێما بۆ ئەوە دەكات كە یەپەگە و پەیەدە گرێدراوی پەكەكەن و ئەوەی لە ڕۆژئاوا ئێستە حوكم دەكات، لە راستیدا پەكەكەیە، ئەو چەكانەیش كە ئەمەریكا بۆ هێزەكانی سووریای دیموكرات دەینێرێت، باس لەوە دەكرێ بەشێكی دەدرێتە پەكەكە.
نەواف ڕەشید بەرپرس لە ئەنجوومەنی نیشتمانیی كورد لە سووریا و نوێنەری پەدەكەسە لە هەرێمی كوردستان، بە"وشە"ی ڕاگەیاند، پەیەدە و یەپەگە هیچ جیاوازییەكیان لەگەڵ پەكەكە نییە و ئەمەریكاش ئەوەیان بۆ شاندی ئەنەكەسە لە واشنتن دووپات كردووەتەوە، بەڵام ئەوان بۆ شەڕی داعش بەكاریان دێنن، لەسەر ئەو پرسانە ئەمەریكا و كونسوڵگەكان ئاگەدار كراونەتەوە، ئەمەریكا جگەلەوەش ئاماژەیان بەوە دا كە چاك دەزانن پەكەكە و پەیەدە و یەپەگە هاوپەیمانی ئێرانن.
هەروەها گوتی، ئەمە تا ئێستە بە وردی ڕوون نییە، بەڵام ئەوە ڕوونە كە لە ڕووی سیاسی و دەسەڵات و هەموو بوارەكانەوە، پەیەدە و یەپەگە ڕاستەوخۆ بە پەكەكە گرێ دراون، دەتوانین بڵێین ئەوەی ئێستە لە ڕۆژئاوا لە دەسەڵاتن، پەكەكەن نەك پەیەدە و یەپەگە.
بەپێی ئەو قسانەی نەواف ڕەشید، هەموو ئەو چەكانەی ئێستە لە دەست یەپەگەدان، لە بنەڕەتدا پەكەكە خاوەندارێتییان دەكات.
دژە تانكی M136 AT4
ئەو مووشەكە كەسییە كە هەر سەربازێك دەتوانێ هەڵی بگرێ و لە كاتی شەڕدا بەكاری بێنێت دژی تانك و ئۆتۆمبێلە سەربازییەكان، بە یەكێك لە بەهێزترین چەكەكانی شەڕی مەیدانی دادەنرێ و سەرەتا لە سوید دروست كراوە، دواتر ئەمەریكا پەرەی پێ داوە و پێشی خستووە و پاشان سوید لەسەر شێوە ئەمەریكاییەكەی بەرهەمی هێناوەتەوە.
ئەو دژە تانكە، درێژیی لوولەكەی 101.6 سانتیمەترە و كێشەكەی 6.7 كیلۆگرام دەبێ، لە دووریی 300 مەتر ئامانجەكە وێران دەكات و تا دووریی نزیكەی 600 مەتریش كاریگەری دەبێ، تەنی گولەنەبڕی 400 ملیمەتر دەبڕێت، تەنیا ئەمەریكا و وڵاتانی ئەڵمانیا و فڕەنسا و سوید و نەرویج و بەریتانیا و چەند وڵاتێكی تری ڕۆژئاوای ئەوروپا خاوەنی ئەم جۆرە دژە تانكەن.
تا ئێستەش لە بازاڕی ڕەش مامەڵە بەو چەكە نەكراوە، بەڵكو تەنیا بە ڕەزامەندی ناتۆ و ئەمەریكا و سوید ئەم جۆرە دژە تانكە بە وڵاتانی تر دراوە، لە شەڕی عێراق و ئەفغانستاندا ئەو چەكە بەشێوەیەكی بەربڵاو بەكار هێنراوە و كاریگەریی زۆر بەهێزی هەبووە لە یەكلاكردنەوەی ڕووبەڕووبوونەوەكان.