ئاژانسی هاریكاری ئاسایشی بەرگری سەر بە وەزارەتی بەرگری ئەمەریكا لە ڕاگەیەنراوێكدا ئاشكرای كرد، وەزارەتی دەرەوە ڕەزامەندی لەسەر فرۆشتنی چەك بۆ كۆماری عێراق دا، بۆ چەك و كەلوپەلی سەربازی دوو لیوای پیادەی پێشمەرگە و دوو كەتیبەی تۆپهاوێژ، كە بەهای چەكەكانیش دەگاتە 295.6 ملیۆن دۆلاری ئەمەریكا, ئاژانسی هاریكاری ئاسایشی بەرگری ئەمەریكا بەڵگەنامەی پێویستی لەوبارەوە دوێنێ سێشەم بە كۆنگرێسی ئەمەریكا داوە.
ئاژانسەكە نووسیویەتی، چەك و كەلوپەلە سەربازییەكان بۆ پڕچەككردنی دوو لیوای پیادەی پێشمەرگە و دوو كەتیبەی تۆپهاوێژن، سەرجەمی ئەو هێزانەی پێشمەرگە كە ئەو بڕە چەكەیان پێ دەگەیەنرێت، سەر بە وەزارەتی پێشمەرگەی حكوومەتی هەرێمی كوردستانن و حكوومەتی ناوەندیش ڕەزامەندی لەسەر ەئمە داوە.
لە بەشێكی تردا هاتووە, چەكەكان بریتین لەمانەی خوارەوە:
- چوار هەزار و 400 چەكی جۆری M16A4.
- 46 رەشاشی جۆری M2 50.
- 186 ڕەشاشی تری جۆری M240B.
- 36 هه‌مه‌ری جۆری هەمڤۆس M1151.
- 77 موده‌ره‌عه‌ی جۆری هەمڤۆس M1151.
- 12 مۆلیدەی سێ كیلۆوات.
- جلی گولەنەبڕ.
- كڵاوی سەربازی.
- سێت جلی سەربازی.
- چەكی بچووك و پاشكۆكانی.
- هاوەن و كەلوپەلە سەربازییەكانی.
- دووربین و كەلوپەلەكانی تری سەربازی.
-كەلوپەلی خۆپاراستن لە چەكی كیمیایی و بایۆلۆجی و ئەتۆمی و تیشكدانەوەكان.
- سیستەمی چاودێری كردن و دیاری كردنی شوێن SPS.
- كه‌لوپه‌لی پزیشكی.
- ئۆتۆمبێلی تری جۆری سەربازی هەمڤۆس M1142.
- ئۆتۆمبێلی ئاشكراكەری مین و كەمین MARP.
- ئۆتۆمبێلی تری تاكتیكی بچووك و مام ناوەند، تانكەری ئاو و سوتەمەنی، ئۆتۆمبێلی فریاكەویت.
- 36 تۆپهاوێژی 105 ملیمی جۆری M119A2.
- ئەمەریكا لەسەر كۆی ئەو چەك و پێداویستییە سەربازیانەش مەشق و ڕاهێنان بە پێشمەرگە دەكات.
لە بەشێكی تری ڕاگەیەنراوەكە ئاژانسی هاریكاری ئاسایشی بەرگری سەر بە وەزارەتی بەرگری ئەمەریكا ئاماژەی داوە، كە ئەو چەك و پێداویستییە سەربازیانە پێویستن بۆ هاوسەنگی سەربازی لە ناوچەكە و بەشێكن لە بە دیهێنانی ئامانجەكانی سیاسەتی دەرەوە و ئاسایشی نەتەوەیی ئەمەریكا، لەمیانەی هاریكاری عێراق لە تێكشكاندنی تیرۆریستانی داعش.
سه‌رچاوه/
ماڵپه‌ڕی ئاژانسی هاریكاری ئاسایشی به‌رگری ئه‌مه‌ریكا.