داخڵكردنی سه‌رجه‌م قوتابییانی ١٢ی ئاماده‌یی بۆ تاقیكردنه‌وه‌ ره‌ت ده‌كرێته‌وه‌

ده‌نگۆی داخڵكردنی گشت قوتابییانی 12ی ئاماده‌یی بۆ تاقیكردنه‌وه‌ی ئه‌زموونه‌ گشتییه‌كانی ئه‌مساڵ، بووه‌ته‌ باسێكی گه‌رم له‌ناو قوتابییان و گوته‌بێژی وه‌زاره‌تی په‌روه‌رده‌ش ده‌ڵێت، وه‌زاره‌ت هیچ پلانێكی له‌و شێوه‌یه‌ی نییه‌ و داخڵكردنی گشت قوتابییان زیان به‌ پرۆسه‌ی خوێندن ده‌گه‌یه‌نێت .

سامان سیوه‌یلی گوته‌بێژی وه‌زاره‌تی په‌روه‌رده‌ی حكوومه‌تی هه‌رێمی كوردستان به‌ "وشه‌"ی ڕاگه‌یاند، وه‌زاره‌تی په‌روه‌رده‌ ڕاوێژی له‌گه‌ڵ ڕاوێژكار و پسپۆڕه‌كانی كردووه‌ و هیچ پلانێكی نییه‌ بۆ داخڵكردنی گشت قوتابییانی 12ی ئاماده‌یی بۆ تاقیكردنه‌وه‌ی ئه‌زموونه‌ گشتییه‌كانی ئه‌مساڵ  كه‌ بڕیاڕه‌ 15-6-2017 ده‌ست پێ‌ بكات .

ئه‌و ڕوونی كرده‌وه‌، داخڵكردنی گشتی زیان به‌ پرۆسه‌ی خوێندن ده‌گه‌یه‌نێت و كاریگه‌ری ده‌بێت له‌سه‌ر توانای زانستی قوتابی و سته‌مێكیشه‌ له‌وانه‌، زیره‌كن و به‌ مافی خۆیان داخڵ بوون له‌گه‌ڵ ئه‌وانه‌ی كه‌ به‌هۆی كه‌مته‌رخه‌مییه‌وه‌ له‌ خوێندن، داخڵ نه‌كراون .

هاوكات یوسف كه‌مال پسپۆڕ و ڕابه‌ری په‌روه‌رده‌یی له‌ وه‌زاره‌تی په‌روه‌رده‌ ڕای گه‌یاند، ساڵانه‌ ئه‌و ده‌نگۆیانه‌ زیاتر له‌ لایه‌ن ئه‌و قوتابییانه‌ بڵاو ده‌بنه‌وه‌  كه‌ داخڵ نابن بۆ تاقیكردنه‌وه‌ی ئه‌زموونه‌ گشتییه‌كان .

ئه‌و ڕوونی ده‌كاته‌وه‌، تا ئێسته‌ وه‌زاره‌تی په‌روه‌رده‌ داتایه‌كی نه‌خستووه‌ته‌ ڕوو كه‌ پیشانی بدات ئه‌و قوتابییانه‌ی له‌ ساڵانی پێشووتردا داخل كراون، تا چه‌ند سه‌ركه‌توو بوون و نمره‌ی باشیان هێناوه‌ .

یوسف كه‌مال وه‌ك ڕابه‌رێكی په‌روه‌رده‌یی گوتی، ئه‌وه‌ ئه‌ركی سه‌ر شانی ڕاوێژكار و پسپۆڕانی ناو وه‌زاره‌تی په‌روه‌رده‌یه‌، له‌و بابه‌ته‌ زیاتر بكۆڵنه‌وه‌ كه‌ زیانی هه‌یه‌ یاخود به‌ ئه‌رێنی ده‌شكێته‌وه‌ بۆ پرۆسه‌ی خوێندن .

ئه‌و ده‌شڵێت، به‌ پێی ئه‌و ئه‌زموونه‌ی من هه‌مه‌ له‌ناو وه‌زاره‌تی په‌روه‌رده‌دا، داخڵكردنی گشت قوتابییان كاریگه‌ری خراپی ده‌بێت له‌سه‌ر پرۆسه‌ی خوێندن و بۆ شكۆی وه‌زاره‌تی په‌روه‌رده‌ش باش نابێت .

وشه‌/ هێمن ڕه‌فیق


وشە - سلێمان تاشان


AM:11:12:20/04/2017




ئه‌م بابه‌ته 654 جار خوێنراوه‌ته‌وه‌‌