جۆن كێری رای دەگەیەنێت، رووسیا لە ئەنجامدانی هێرشە ئاسمانییەكانیدا بۆ سەر حەلەب، تاوانی جەنگی ئەنجام داوە و هێرشكردنە سەر نەخۆشخانە و قوتابخانەكانی ئەو شارەی بە ئامانجدار و هێرشی بە ئەنقەست ناو برد.
بەرەبەیانی رۆژی شەموو 8ی تشرینی یەكەم/ئۆكتۆبەر، جۆن كێری لە واشنتۆن هێرشی توندی كردە سەر هێزی ئاسمانی رووسیا و سوپای بەشار ئەسەد و بە ئەنجامدانی تاوانی جەنگ تۆمەتباری كردن.
زیاتر روونی كردەوە، رووسیا و رژێمی ئەسەد دەبێ لە بەردەم كۆمەڵگەی جیهانیدا وەڵام بدەنەوە كە بۆچی بەردەوامن لە بۆردومانكردنی نەخۆشخانە و ناوەندەكانی تەندروستی و خەڵكی بێ تاوانی شاری حەلەب؟ هاوكات ئەو هێرشانەی خستە ناو خانەی تاوانی سەرەوە و داوای كرد داگەیەكی تایبەت پێك بهێنرێت بۆ لێكۆڵینەوە و بەدواداچوونیان.
وەزیری دەرەوەی ئەمەریكا ئاماژەی بەوەیش دا، رووسیا باكی بەوە نییە سەرجەم دانیشتوانی حەلەب بكوژرێن. سوپای ئەسەد لە رۆژهەڵاتی حەلەب هێرشێكی فراوانیان دەست پێ كردووە و لەلایەن فڕۆكەكانی رووسیاوە پشتیوانی دەكرێن.
ئەمەریكا لە دوای پێشێلكردنی ئاگربەستی حەلەب لەلایەن رووسیا و سوپای بەشار ئەسەد، دانوستانەكانی لەگەڵ رووسیا هەڵپەسارد و خەریكی ئامادەكارییە بۆ جێبەجێكردنی پلانی "B" لە سووریا.
پلانی "B" واتای بژاردەی سەربازی و دوای پێنج ساڵ و چوار مانگ هەوڵدان بۆ دانوستان و چارەسەری پرسی سووریا بە رێگەی سیاسی و دانوستاندن، سەرئەنجام ئەمەریكا بڕیاری یەكلاكەرەوەی دا و رای گەیاند، رووسیا ئەوەندەی ئامانجی كوشتن و لەناوبردنی هاووڵاتییانی سڤیلی سووریایە، هێندە هەوڵ بۆ چارەسەری دۆخەكە نادات. ئێستە كۆشكی سپی سەرقاڵی تاوتوێكردنی چارەسەری دۆخی سووریایە لە رێگەی سەربازی.
وشە/ئاژانسەكان- هیدایەت جان