سبەی لە هەندێك ناوچەی كوردستان باران دەبارێت

 

لە ئەنجامی كاریگەری لاوازی نزمە پاڵەپەستۆی نیمچە دوورگەی عەرەبی و لاوازی نزمە پاڵەپەستۆی توركیا، پێشبینی دەكرێت ئەمڕۆ پێنجشەم ئاسمانی هەولێر ساماڵ و پەڵەهەور دەبێت و لە هەندێك شوێن دەگۆڕێت بۆ نیمچە هەور.

 

هەروەها ئاسمانی سلێمانی ساماڵ و پەڵەهەور دەبێت و دهۆكیش لە نێوان پەڵەهەور و نیمچە هەوردا دەبێت. هاوكات ئاسمانی كەركووك ساماڵ و پەڵە هەور دەبێت. بەرزترین پلەی گەرما لە كەركووك ٣٨ لە هەولێر ٣٦، لە سلێمانی ٣٢ و لە دهۆك ٣٣ دەبێت.

 

سبەی هەینی ئاسمانی هەولێر پەڵەهەور و نیمچە هەور دەبێت و لە هەندێك ناوچەی شاخاوی ئەگەری نمەباران هەیە.

لە دهۆك ئاسمان نیمچە هەور دواتر بۆ هەوری تەواو دەگۆڕێت و باران لە هەندێك شوێن دەبارێت.

 

ئاسمانی كەركووك و سلێمانی نیمچە هەور و پەڵە هەور دەبێت. بەرزترین پلەی گەرما لە كەركووك ٣٩ لە هەولێر ٣٧ لە سلێمانی ٣٣ و لە دهۆك ٣٤ دەبێت.

 




وشە - سلێمان تاشان


AM:10:54:18/05/2017




ئه‌م بابه‌ته 567 جار خوێنراوه‌ته‌وه‌‌