سه‌رۆكی حكوومه‌ت سه‌ره‌خۆشی له‌ خانه‌واده‌ی نه‌وشیروان مسته‌فا ده‌كات


سه‌رۆكی حكوومه‌تی هه‌رێمی كوردستان، سه‌ره‌خۆشی ئاڕاسته‌ی خانه‌واده‌ی نه‌وشیروان مسته‌فا ڕێكخه‌ری گشتیی بزووتنه‌وه‌ی گۆڕان ده‌كات.

نێچیرڤان بارزانی سه‌رۆكی حكوومه‌تی هه‌رێمی كوردستان، له‌ پرسه‌نامه‌كه‌دا نووسیویه‌تی، به‌بۆنه‌ى كۆچى دواییى خوالێخۆشبوو نه‌وشیروان مسته‌فاوه‌، پرسه‌ و سه‌ره‌خۆشى له‌ ئه‌ندامانى خانه‌واده‌ و كه‌سوكار و دۆست و هاوڕێیانى به‌ڕێزیان و بزووتنه‌وه‌ى گۆڕان ده‌كه‌م. 

هه‌روه‌ها نووسیویه‌تی: هاوسۆز و به‌شدارى خه‌متانم، خواى گه‌وره‌ خوالێخۆشبوو بخاته‌ به‌ر ڕه‌حمه‌تى خۆى. هیوادارم بزووتنه‌وه‌ى گۆڕان و لایه‌نگرانى خوالێخۆشبوو نه‌وشیروان مسته‌فا بۆ خزمه‌تى كوردستان و ئامانجه‌ هاوبه‌شه‌كانى گه‌له‌كه‌مان به‌رده‌وام بن.

ئه‌مڕۆ شۆڕش حاجی ئه‌ندامی جڤاتی نیشتمانیی بزووتنه‌وه‌ی گۆڕان، له‌ ته‌له‌ڤزیۆنی ئۆرگانی بزووتنه‌وه‌كه‌ ڕای گه‌یاند، به‌یانیی ئه‌مڕۆ هه‌ینی (19ی ئایار/ مایۆ) سه‌عات هه‌شت، نه‌وشیروان مسته‌فا ڕێكخه‌ری گشتیی بزووتنه‌وه‌كه‌ كۆچی دوایی كردووه‌.



وشە - كوردۆ شابان


PM:02:38:19/05/2017




ئه‌م بابه‌ته 4461 جار خوێنراوه‌ته‌وه‌‌