خاتوونە گۆرانیبێژ جانێ حەیران لە دایكبووی ساڵی 1979ی شاری ئامەد. بەهۆی گوشار و هەڕەشەكانی حكوومەتی توركیا، پەناهەندەی رووسیا بووە و لەوێوە ستران دەچڕێت. لەم دیمانەیەی "وشە"دا جانێ وەڵامی چەندان پرسیار دەداتەوە و تیشك دەخاتە سەر بوارە هونەرییەكەی خۆی.
ناوی راستینەی خۆت نازانین، یان بۆچی جانێ نازناوی "حەیران و دەنگی چیایی" پێ دەگوترێ؟
بە داوای لێبووردنەوە ناتوانم ناوی تەواوی خۆم ئاشكرا بكەم لەبەر هۆكارێكی تایبەتی، بەڵام بە "جانێ حەیران" ناوبانگم دەركردووە، لەبەرئەوەی نەنكم حەیرانبێژ بووە، هەر ئەویش بە "جانێ حەیران" بانگی دەكردم، بۆیە "حەیران" بووە ناسناوی من، هەروەها من بەخۆم ناڵێم دەنگی چیایی، بەڵكو چەند مامۆستایەكی هونەری لە من گەورەتر ئەو ناسناوەیان لە من ناوە چونكە ستایلی گۆرانییەكانم چیایین.
هۆی دووركەوتنەوەتان لە وڵات چییە؟
بەهۆی سیاسەتی توركیا دوور كەوتمەوە، من گۆرانیم بە زمانی كوردی و بە جلی كوردی دەگوت، حكوومەتی توركیا بەوە ڕازی نەبوو، لە هەمانكاتدا ڕێگری لێ دەكردم گۆرانی بڵێم ئەگەر ئاڵای توركیا لەسەرشانم نەبێت، جارێك لە ئاهەنگێكدا لە توركیا دەستبەسەر كرام و ساڵێك و نۆ مانگ كەوتمە زیندانەوە و ڕۆژانە لەتێك سەموونیان پێ دەدام، ئەوە وای كرد وڵات جێ بێڵم و لە ڕووسیا نیشتەجێ ببم، بەڵام ماوەی چەند ساڵێكە زۆربەی كاتەكان لە باشووری كوردستانم و هاتوچۆ دەكەم لە نێوان كوردستان و ڕووسیا، چونكە لە ڕووسیا ماركێتێكی گەورەی چاویلكەم هەیە و چەند كەسێكم لەسەر داناوە.
ئێستە لەگەڵ كێ دەژیت؟
بەتەنیا دەژیم و ماوەی 19 ساڵە لە هاوژینەكەم جیا بوومەتەوە، كچێكم هەیە بە ناوی "دیلان"، كچەكەم ئێستە تەمەنی 18 ساڵە و ئەمانەتی خوشكەكەم كردووە لە شاری كۆڵن لە ئەڵمانیا دەژین.
ئەگەر ئێستە كەسێك داوات لێ بكات، ئامادەی جارێكی تر ژیانی هاوسەری پێك بێنیتەوە؟
تا ئێستە بیرم لەوە نەكردووەتەوە بچمە ناو ژیانێكی تر و دووبارە دەست بە ژیانێكی نوێ بكەمەوە، بەڵام بۆ داهاتوو نازانم چۆن و چی دەبێت، ئەوە پێوەندی بە قسمەت و نسیبەوەیە.
بۆچی زۆربەی كاتەكان لە باشووری كوردستانی؟
لەبەرئەوەی لە باشووری كوردستان هەست بە ئازادی دەكەم، كاتێك دەگەڕێمەوە باشوور هەوای پاكی كوردستان و ئازادی و سەربەخۆیی هەڵدەمژم، من زۆربەی جار ئاهەنگ و كۆنسێرت لە باشوور ساز دەكەم و خەڵكی باشوور و هەولێرم زۆر خۆش دەوێت، بە تایبەتی لە شەوانی ڕەمەزانی هەموو ساڵێك لە هەولێر دەمێنمەوە و زۆربەی شەوان بە ئاهەنگ و گۆرانی كەشێكی خۆش و ئارام بۆ هەوادارانم دروست دەكەم، بۆ ڕەمەزانی ئەمساڵیش لە هەولێر دەبم و گۆرانیی نوێم ئامادە كردووە.
تا ئێستە خاوەنی چەند بەرهەم و كۆنسێرتی؟
خاوەنی 13 بەرهەمم، 14مین گۆرانیشم بۆ جەژنی ڕەمەزان بڵاو دەبێتەوە، بەڵام كۆنسێرت و ئاهەنگم زۆر كردووە، لەوانەیە كۆنسێرت و ئاهەنگەكانم بە تەنیا لە باشووری كوردستان نزیكەی 500 بن، لەبەرئەوەی چەندان كۆنسێرت و ئاهەنگی حزبی و خێزانی و ئاهەنگی بووك و زاوام لە باشووری كوردستان كردووە، هەروەها چەندان كۆنسێرتم بۆ پێشمەرگە ئەنجام داوە، چونكە پێشمەرگە لە ناو دڵی مندایە.
ئەگەر لە ئامەد داوات لێ بكەن تۆ ئامادەی لەوێ ئاهەنگ ساز بكەی؟
بەڵێ ئامادەم، پێشتریش چەندان ئاهەنگم لە ئامەد ساز كردووە، خۆم كچی ئەو شارەم و لەوێ لە دایك بووم، ئەگەر خەڵكی ئامەد داوا بكەن و نەكەن، من ئامادەم بەخۆم و مایكرۆفۆنەكەم بچم ئاهەنگ بكەم.
بۆچی زۆربەی گۆرانییەكانت سیاسی و نەتەوەیین؟
لەبەرئەوەی ستەمی زۆرم لە سایەی سیاسەتی دەوڵەتی توركیا بینیوە، بۆیە دەمەوێت پەیامی خۆم بە زمانی كوردی لە دژی دەوڵەتی توركیا بە هەموو دنیا بگەیەنم و بەردەوام دەبم لە گۆرانیی سیاسی دژی ئەوان.
قسەت چییە لەسەر هونەری ئێستەی كوردی؟
دوا پەیامی من ئەوەیە بە داخەوە كۆمپانیای بابیلۆن لە باشووری كوردستان بەناوی خزمەتی هونەری كوردییەوە پارەیەكی زۆر بۆ هونەرمەند و كچی عەرەب و بیانی خەرج دەكات، بەبێ ئەوەی ئاوڕ لە هونەرمەندی كورد بداتەوە، لە هەمانكاتدا گرنگی زۆر بە چەند كچێكی كورد دەدات، بەو ناوەی كە ئەمانە هونەرمەندی پڕۆفیششناڵی كوردن، بەڵام مخابن ئەوانە هونەرمەند نین و كولتووری هونەری كوردییان شێواندووە.
وشە/ محەمەد جەمال