پەیكەری خواوەندی دایك لە هەولێر دەدۆزرێتەوە


بەدووریی 22كم لە ناوەندی شاری هەولێر، لە یەكێك لە گردە شوێنەوارییەكاندا پەیكەری خواوەندی دایك دەدۆزرێتەوە. دوو شمشێر لەسەر سنگی پەیكەرەكەدا هەیە، بەو هۆیەوە تیمەكانی شوێنەوارناسی كە لەئەنجامی كنە و پشكنینەكاندا پەیكەرەكەیان دۆزیوەتەوە، گریمانەیەكیان هەیە كە ئەو پەیكەرە وەك خواوەندی شەڕیش بەكار هاتبێت.

گردی (قەبرستانی كورد) یەكێك لە گردە شوێنەوارییەكانی سنووری پارێزگای هەولێرە و لە شارەدێی شەمامك بەدووریی 22كم لەناوەندی هەولێر هەڵكەوتووە. 

كاتێك تیمەكانی شوێنەوارناسی لەو گردەدا سەرقاڵی كنە و پشكنین بوون، پەیكەرێكی تایبەتیان دۆزییەوە. پڕۆفیسۆر گلن شوارتز سەرۆكی تیمەكە گوتی، "ئەوە پەیكەری خواوەندی دایكە". 

بەپێی كۆتا دەستكەوتەكانی كاری كنە و پشكنینی شوێنەواری،بەهاوكاری زانكۆی جۆن هاپكینزی ئەمەریكی و بەڕێوەبەرایەتیی شوێنەواری هەولێر، پەیكەرەكە بۆ سەردەمی دەسەڵاتداری میتانییەكاندەگەڕێتەوە.

پڕۆفیسۆر (گلن شوارتز) سەرۆكی تیمی شوێنەوارناسی ئەمەریكی باس لە چۆنیەتیی دۆزینەوەی ئەو پەیكەرەكە دەكات و بە "وشە" دەڵێ‌، "لە چوارگۆشەیەكی 6-10 لە قەبرستانی كورد خەریكی هەڵكۆڵین بووین، گۆڕێكمان دۆزییەوە كە هەندێك گۆزە و ئێسك و پەیكەری تێدابوو، یەكێك لە پەیكەرەكان لەشێوەی جەستەی ئافرەتێك بوو".

زیاتر دەڵێ‌، "دوو پارچە كانزای مس لە شێوەی شمشێر لەسەر سنگی دانرابوو، پاشتر بە شێوەیەكی زانستی پەیكەرەكەمان دەرهێنا و لە لێكۆڵینەوەیەكی سەرەتایی دەركەوت پەیكەری خواوەندی دایكە، بەڵام بەپێی دوو شمشێرەكەی سەر سنگی، پێدەچێت وەك خواوەندی شەڕیش بەكار هاتبێت، هێشتا لەوە دڵنیا نین".

درێژی پەیكەرەكە 25-30سم دەبێت، لە ناوەڕاستی ئەم مانگەدا لەلایەن ئەو تیمە هاوبەشی زانكۆ ئەمەریكی و شوێنەواری هەولێر دۆزراوەتەوە. 

پەیكەرەكە لەناو كوورەی ئاگردا سوور نەكراوەتەوە، ئەوە یەكێك لە تێبینییەكانە و پڕۆفیسۆر شوارتز دەڵێ‌، "خەڵكی پێشینان كاتێك كەسێكیان نەخۆش دەكەوت، پەیكەرێكیان بۆ دروست دەكرد بەبێ‌ ئەوەی سوور بكرێتەوە، پاشان دەیانناشتەوە و پێیان وابوو هەرچی زووتر پەیكەرەكە هەڵوەشێتەوە و لەناو بچێت، ئەوە نەخۆشەكەیان زووتر چاك دەبێتەوە، پێدەچێت ئەم پەیكەرە بۆ ئەو مەبەستەش بەكار هاتبێت".

لەسەردەمانی كۆن پەیكەری تایبەتی خواوەندەكان لە پەرستگەكاندا دادەنران بەمەبەستی پەرستن و پاڕانەوە، بەڵام ئەو پەیكەرە نەك لە ناو پەرستگەیەكدا نییە، بەڵكو لەناو گۆڕی ئافرەتێكدا دۆزراوەتەوە كە گۆڕەكەش بە هەندێك نەخشی تایبەت رازاوەتەوە، ئەوەش وای لە شوێنەوارناسان كردووە كە بەبێ‌ لێكۆڵینەوەی دواتر، نەتوانن بڕیار لەوە بدەن ئایا پەیكەری خواوەندی دایك بە چ مەبەستێك لەناو ئەو گۆڕە دانراوە؟.

پەیكەرەكە پاش دۆزینەوە و دەرهێنانی بۆ بەشی تاقیگەی بەڕێوەبەرایەتیی شوێنەواری هەولێر گواستراوەتەوە، بەمەبەستی لێكۆڵینەوەی زانستی لەوبارەیەوە.

نیهایەت عەبدوڵا محەمەد بەرپرسی بەشی تاقیگە لەو بەڕێوەبەرایەتییە بە "وشە" دەڵێ‌، "پەیكەرەكەمان وەرگرتووە، بەڵام بەهۆی ئەوەی سوور نەكراوەتەوە، بووەتە نزیكەی 20-25 پارچە و مەترسی هەڵوەشانەوەی لەسەر بوو، لەبەرئەوە هەستاین بە راگرتنی پارچەكانی بەمادەی یەكگری تایبەت كە هیچ زیانێكی بۆ پارچە شوێنەوارییەكان نییە".

زیاتر دەڵێ‌، "پاش لێكاندنەوەی پارچەكانی و دروستكردنەوەی بەشە ونبووەكانی پەیكەرەكە و رووپۆشكردنی، لە قاڵبێكی گونجاو و ستاندەردا بۆ نمایشكردنی لە مۆزەخانە ئامادە دەكرێت".

هەولێر-سارا سەردار




وشە - تایبه‌ت


AM:08:36:14/06/2017




ئه‌م بابه‌ته 16770 جار خوێنراوه‌ته‌وه‌‌