كێشەكانی سەندیكای رۆژنامەنووسان گەیشتووەتە مەكتەب سیاسیی پارتی و یەكێتی

بە دروست نەكردنی یەكەی ژمێریاری و دانانی لیژنەی پسپۆڕ، كێشەكانی سەندیكای رۆژنامەنووسانی كوردستان تەقینەوە، هەوڵە ناوخۆیییەكان بێ ئاكام بوون، بۆیە كێشەكان گەیشتنە كۆبوونەوەی مەكتەبی سیاسیی پارتی و یەكێتی.

كێشەكانی سەندیكای رۆژنامەنووسانی كوردستان دوای تێپەڕبوونی شەش مانگ بەسەر هەڵبژاردنی دەستەی نوێ، لە نێوان نەقیب و جێگرەكەی لەسەر دانەمەزراندنی "یەكەی ژمێریاری" دەستیان پێ كرد و بە دانانی لیژنەی پسپۆڕ بۆ كەیسێكی دادگا لەسەر سكاڵای وەزارەتی سامانە سروشتییەكان لە كەناڵی ئێن ئاڕ تی، دەتەقێتەوە. لە كاتێكدا دوو هەفتە پێش ئێستە لە كۆبوونەوەی مەكتەبی سیاسیی پارتی دیموكراتی كوردستان و یەكێتیی نیشتمانیی كوردستان، باس لە چارەسەركردنی كێشەكانی سەندیكا كراوە.

كۆنگرەی سێیەمی سەندیكای رۆژنامەنووسانی لە رۆژانی (21و 22و 23/7/2011) لە هۆڵی پێشەوا لە هەولێر ئەنجام درا، ئازاد حەمەدەمین /پارتی/ وەك نەقیبی سەندیكا و شوان داودی /یەكێتی/ وەك جێگر دەستنیشان كران.

سەندیكای رۆژنامەنووسانی كوردستان بەیاسای ژمارە 40ی ساڵی 2004ی هەمواركراوی ژمارە چواری ساڵی 2008 دامەزراوە، دوای یەكخستنەوەی لەگەڵ یەكێتی رۆژنامەنووسانی كوردستان، لە كۆنگرەی یەكەمیدا لە مانگی كانوونی یەكەمی 2003، تا ئێستە سێ كۆنگرەی بەستووە.

بەگوێرەی بەدواداچوونێكی "وشە" سەرەتای كێشەكانی سەندیكاكە دەگەڕێتەوە بۆ دانەنانی یەكەی ژمێریاریی سەندیكا، دواتر هەردوو مەكتەبی رێكخراوە جەماوەرییەكانی پارتی و رێكخراوە دیموكراتییەكانی یەكێتی لە كۆبوونەوەیەكدا لەسەر چەند خاڵێك رێك دەكەون، یەكیان دانانی یەكەی ژمێریاریی بوو، بەڵام یەكەكە هەر دروست نەكراوە. بەدوایدا شوان داودی دەست لە جێگری نەقیب دەكێشێتەوە و دەبێتە پەرلەمانتاری عێراق لەسەر لیستی سەوز، یەكێتی شوێنەكەی پڕٍ ناكاتەوە. 

دواتر مەهدی زریان بەرپرسی لقی كەركووكی رۆژنامەنووسان لە پشكی پارتی، بوو بە یەكێتی، بەدوایدا جەمال حوسێن ئەندامی ئەنجوومەنی سەندیكا لە پشكی زەحمەتكێشان بوو بە یەكێتی /كۆتای مانگی شوباتی رابردوو بەهۆی نەخۆشییەوە گیانی لە دەست دا/. ئەمانە كرۆكی ئەو كێشانەن كە كاریگەریی دانا لەسەر زیاتر دابڕان لە نێوان نوێنەرانی پارتی و یەكێتی لە سەندیكا و تا ئێستەیش چارەسەر نەكراون.

بەپێی بەدواداچوونی "وشە" بۆ هۆی ئاڵۆزبوونی كارەكانی سەندیكای رۆژنامەنووسان، دوای ساڵێك یەكێتی ئەنوەر حوسێن وەك جێگری نەقیب دەستنیشان كرد، جارێكی تر كۆبوونەوە كرا بۆ چارەسەركردنی كێشەكان، بەڵام سوودی نەبوو و دەئەرنجامیش گەیشتە ئەوەی كۆبوونەوەی ئەنجوومەنی سەندیكا بێ بەشداری ئەنوەر حوسێن و ئەندامانی یەكێتی لە ئەنجوومەنی سەندیكا بەڕێوە دەچوو.

تەنگژەی دارایی كوردستان لە كۆتاكانی ساڵی 2014، كێشەكانی قووڵتر كردەوە كاتێك بودجەی سەندیكا لە 100 ملیۆن دیناری مانگانە بۆ 50 ملیۆن كەم كرایەوە، دواتریش كرا بە 40 ملیۆن.

ئەو بڕە پارەیەی ئەنجوومەنی سەندیكا لە ماوەی ساڵانی (2014، 2015، 2016)و شەش مانگی یەكەمی ئەمساڵ وەك بودجە لە حكوومەتی هەرێمی وەرگرتووە، 937 ملیۆن و 461 هەزار دینار بووە. بەڵام بە بڕیارێكی ئەنجوومەن، پشكی هەر شەش لق و سێ نووسینگەكەی ماوەی دوو ساڵ و نیوە بڕاوە و تەنیا نۆ مانگی یەكەمی ساڵی 2014 نەبێ ئەویش بۆ نیوە كەم كراوەتەوە. جگە لەمە، بەگوێرەی بەدواداچوونی "وشە" لە كۆی هەشت هەزار ئەندام، بە بەردەوام 25%یان ئابوونەی ساڵانەیان داوە كە 25 هەزار دینارە و 50 هەزاریشیان داوە بۆ نوێكردنەوەی ناسنامەی نێودەوڵەتی.

ئەگەرچی جێگری نەقیبی سەندیكا رەخنەی "تاكڕەوی لە بڕیار" لە نەقیبی سەندیكا دەگرێت، بەڵام بەگوتەی یەكێتییەكانی ناو سەندیكا "شوان داودی و ئەنوەر حوسێن بازگر پابەندی دەوامی رۆژانەی سەندیكا نەبوونە و هەفتانە دوو رۆژ سەردانی هەولێریان كردووە". هاوكات رەخنەی ئەوە لە نەقیب دەگیرێت كە بۆ دەركردنی بڕیارەكان راوێژی بە جێگرەكەی نەكردووە.

یەكێكی تر لەو رەخنانەی لە ئیدارەی سەندیكا دەگیرێت، فرۆشتنی ئۆتۆمبێلێكی سەندیكا لە جۆری لاندكرۆزەر بە هەندرێن ئەحمەد ئەندامی ئەنجوومەنی سەندیكا بووە كە بەگوێرەی بەدواداچوونی "وشە" لە فرۆشتنەكەدا لیژنە پێك نەهێنراوە.

بەڵام لە مانگی ئایاری رابردوودا هەریەكە لە هەندرێن ئەحمەد ئەندامی ئەنجوومەن و سمكۆ عەبدولكەریم بەرپرسی لقی هەولێر بە ئاگاداری ئازاد حەمەدەمین نەقیبی سەندیكا، سەردانی سلێمانی دەكەن بۆ چارەسەركردنی كێشەكان لەگەڵ ئەنوەر حوسێن جێگری نەقیب، بەڵام جێگرەكە هیچ گونجانێك ناخاتە ڕوو زۆر بێباك قسە دەكات. بۆیە ئەو هەوڵەیش ئەنجامی نەبوو.

لە دوو هەفتەی رابردوودا لە یەكێك لە كۆبوونەوەكانی مەكتەبی سیاسیی پارتی و یەكێتی، تەوەرێكی تایبەت بوو بە كێشەكانی سەندیكای رۆژنامەنووسانی كوردستان.

ئەنوەر حوسێن بازگر جێگری نەقیبی سەندیكای رۆژنامەنووسانی كوردستان، پشتڕاستی كێشەكانی ناو سەندیكا دەكاتەوە و بۆ "وشە" ئاشكرای دەكات، "هەوڵەكانی چارەسەر بەردەوام بوونە، لە هەندێكیان گەیشتووین بە رێككەوتن، بەڵام نەقیبی سەندیكا پێیەوە پابەند نەبووە ئەگەرچی خۆیشی واژووی لەسەر كردوون".
جێگری نەقیب باسی لە ناوەڕۆكی رێككەوتنەكان كرد لەوانە پرسی ئیفاد و گەشتی شاندی سەندیكا، پرسە دارایییەكان، پشكی لق و نووسینگەكان و لایەنە سیاسییەكەی، زیاتر گوتی "داوامان كردووە بودجەی سەندیكا رابگیرێت، چونكە تەنیا نەقیب تەسەڕوفی پێوە دەكات".

ئەنوەر بازگر رەخنەی ئەوە لە نەقیبی سەندیكا دەگرێت كە 30%ی مەحزەری كۆبوونەوەكانی ئەنجوومەنی جێبەجێ نەكرووە، لەوانە كەمكردنەوەی ئەندامان، پرسی گەشت و ئیفاد، خستنە بەردەستی بودجەی سەندیكا بۆ سكرتاریەتی سەندیكا، فایلی ئەندامیەتی كە سكرتارییەت واژووی لەسەر بكات.

"ئەگەر كێشەكان چارەسەر نەبن، پەنا دەبەینە بەر (IFJ)و دادگا، هەروەها ئەگەر قسە ئەوە بێت یەكێتییەكان دژایەتی پارتی دەكەن، ئەوە راست نییە، بەڵام نەقیب تاكڕەوی دەكات و راوێژ ناكات"، بازگر وای گوت.

لەبارەی فرۆشتنی ئۆتۆمبێلی سەندیكا، ئەنوەر دەڵێ "بێ لیژنە فرۆشراوە و نازانین پارەكەی چی لێ هاتووە، چونكە تەنانەت ئاگاداری هیچ داهات و خەرجییەكی سەندیكا نین".

یەكێ لەو رەخنانەی لە جێگری نەقیبی سەندیكا دەگیرێت، پابەند نەبوونیانە بەدەوامكردن لە سەندیكا، بەڵام ئەنوەر ئەوە رەت دەكاتەوە.

ئەنوەر باس لە كۆنگرەی داهاتووی سەندیكا دەكات و دەڵێ، بەپێی رێككەوتن پۆستی نەقیب پشكی یەكێتییە، پێشتر لەسەر داوای فەرهاد عەونی، مام جەلال دایەوە بەو، بۆیە لە داهاتوو ئەگەر نەدرێ بە یەكێتی، دەبێ لە هەڵبژاردنی كۆنگرەدا هەموو ئەندامان مافی خۆكاندیدكردنیان بۆ نەقیب هەبێت.

لە بەرامبەردا خۆشناڤ جەمیل ئەندامی ئەنجوومەنی سەندیكا، باس لە دوا هەوڵ دەكات كە هەفتەی داهاتوو بێ بەشداری نەقیب لەگەڵ پشكی یەكێتی لە سەندیكا كۆ دەبنەوە، ئەگەر نزیك ببنەوە لە كۆبوونەوەی دواتر نەقیب بەشدار دەبێ.

خۆشناڤ جەمیل ئەوە رەت دەكاتەوە كە ئازاد حەمەدەمین تاكڕەوانە بڕیاری دابێ و راوێژی بۆ پرسە دارایییەكان و بڕیارەكان بە ئەندامان و جێگری نەقیب نەكردبێ، دەڵێ "ئەمە بە یاسا لە دەسەڵاتی نەقیبی سەندیكایە و ئەو مافە هی خۆیەتی".

باسی لەوەش كرد كە نەقیبی سەندیكا هەموو ئامادەیییەكی نیشان داوە بۆ چارەسەری كێشەكان و یەكخستنەوەی سەندیكاكە، بەڵام یەكێتییەكان پێیەوە پابەند نەبوون. دووپاتی كردەوە "ئەگەر بەو عەقڵییەتە كار بكرێ، ناگەین بەهیچ چارەسەرێك و گۆڕینی نەقیبیش هیچ لە دۆخەكە ناگۆڕێت، چونكە نەقیبی سەندیكا ئامادەیی نیشان دا و لیژنە پێك هات بۆ خەرجی و داهات، بەهەموو داواكارییەكان رازی بوو ئەگەرچی بە یاسا هەمووی لە دەسەڵاتی نەقیبدایە.

"ئازاد حەمەدەمین هیچ بڕیارێكی تاكڕەوانەی نەداوە و هەموو ئەندامانی ئەنجوومەن ئاگادارن، نەقیبی سەندیكا تەنیا بەرپرس نییە لە جێبەجێ نەكردنی مەحزەری كۆبوونەوەكان"، خۆشناڤ وای گوت و ئەوەیشی خستە ڕوو كە "بەستنی گۆنگرە یەكێكە لە چارەسەرە باشەكان".

لەبارەی پرسی دارایی، ئەو ئەندامەی ئەنجوومەنی سەندیكا دەڵێ، ئێمەش قبووڵی ناكەین كەسێك پارەی سەندیكا بخوات، ئەگەر ئەمە هەیە با یەكێتییەكانی سەندیكا ئاشكرای بكەن تا پشتگیرییان بكەین.

خۆشناڤ هۆی فرۆشتنی ئۆتۆمبێلی سەندیكا بۆ بەشداری شاندی سەندیكا گەڕاندنەوە لە كۆنگرەی نێودەوڵەتی (IFJ) لە فڕەنسا، ئەوەیشی گوت، "پارەكە بۆ سەفەرەكە خەرج كرا، ئۆتۆمبێلەكەش بە لیژنە فرۆشراوە دوای وەرگرتنی نرخی بازاڕ، بەهەمان نرخ بە هەندرێن ئەحمەد فرۆشرا".



وشە - فه‌رمان سادق


PM:04:35:13/07/2017




ئه‌م بابه‌ته 1806 جار خوێنراوه‌ته‌وه‌‌