بەرشەلۆنە گرێبەستێكی تریشی ئەنجامدا


فیلیپی رۆسۆ بەڕێوەبەری كارەكانی بەرگریكاری كۆڵۆمبی ییری مینا رایگەیاند كە بەتەواوی لەگەڵ بەرپرسانی یانەی بەرشەلۆنەی ئیسپانی رێككەوتوون و هاوینی ساڵی داهاتوو بەفەرمی پەیوەندی بەو یانەیەوە دەكەن.

مینا كە لە ریزی هەڵبژاردەی كۆڵۆمبیا و یانەی پاڵمیراسی بەڕازیلی یاریی دەكات، بۆ وەرزی داهاتوو شوێنی خافیێر ماسكیڕانۆی بەرگریكاری ئەرجەنتینی لە یانەی بەرشەلۆنە پڕ دەكاتەوە.

بەڕێوەبەری كارەكانی مینا لە چاوپێكەوتنێكی رۆژنامەوانیدا رایگەیاند: سەرجەم كارەكانی گرێبەستەكەی مینا لەگەڵ یانەی بەرشەلۆنە كۆتایی هاتووە، ئەمساڵ هەر لە خولی بەڕازیل دەمێنینەوە و بۆ وەرزی داهاتوو پەپوەندی بە خولی تۆپی پێی ئیسپانیاوە دەكەین.

زیاتر گوتی: یەكێك لە خەونە گەورەكانی مینا پۆشینی درێسی یانەی بەرشەلۆنە بووە و وەرزی داهاتووش خەونەكەی دەبێتە راستی و لەنێو یاریگەی كامپ نوو درێژە بە ژیانی وەرزشی دەدات.

مینا /22 ساڵ/ وەرزی رابردوو خەڵاتی باشترین بەرگریكاری خولی تۆپی پێی بەڕازیلی پێ درا دوای ئەوەی ئاستێكی ناوازەی لەگەڵ یانەی پاڵمیراس پێشكەش كردبوو.

بەگوێرەی سەرچاوە رۆژنامەوانییەكان گرێبەستەكەی مینا لەگەڵ یانەی بەرشەلۆنە بۆ ماوەی 5 ساڵە و نرخەكەشی 9 ملیۆن یۆرۆ بووە.






وشە - ئامانج ئه‌كره‌م


AM:10:18:17/07/2017




ئه‌م بابه‌ته 2564 جار خوێنراوه‌ته‌وه‌‌