دوو فڕۆكەی جەنگی توركیا بەمەبەستی لێدانی بنکە و بارەگاکانی پەكەكە بە
چڕی بۆردومانی گوندەکانی شارەدێی وەرتێ و بناری
قەندیلیان لە سنووری رەواندز كرد و قایمقامی شارۆكەكەش رای دەگەیەنێت، بۆردومانەکە
هیچ زیانێکی گیانی لێ نەکەوتۆتەوە.
ئەمڕۆ پێنجشەم 20ی تەمووز، كوێستان ئەحمەد قائیمقامی شارۆكەی رەواندز بە
" وشە "ی راگەیاند" فڕۆكە جەنگیەكانی توركیا بە مەبەستی بۆردومان كردنی
بنكە و بارەگاكانی پەكەكە ، سەعات 12:30 ئەمڕۆ 2017 دەستییان بە بۆردومان كردنی گوندەكانی
بۆكریسكان، زارگەلی، چیای گەرمگە و دەورووبەری گوندی بۆ كریسكان لە سنووری رواندز كردوە
و بۆردومانەكە بۆ ماوەی یەك سەعات بەردەوامی هەبوو.
زیاتر روونی دەکاتەوە، بۆردومانەكە خۆشبەختانە هیچ زیانی گیانی هاووڵاتییانی
سڤیلی بە دوواوە نەبووە و زیانی گەریلاكانی پەكەكە نەزانراوە، بێگومان زیانی زۆر بەر
ژینگەی دەڤەرەكەش كەوتووە .
"هەر بەهۆی بۆردومانەكە، ترس و دڵەڕاوكێیەكی زۆر لای هاووڵاتییان
و ئەو خەلكە دروست بووە كە بە مەبەستی کۆکردنەوەی گیاوگژ روو لە چیا و كوێستانەكانی
سنووری شارەدێی وەرتێ دەكەن و بەمەش زیان بە ئابووری خەلك دەگەینێت" قایمقامی
رەواندز وای گوت.
تا ئێستە بەهۆی بۆردومانەكانی توركیا بۆ سەر بنكە و بارەگاكانی پەكەكە
چەندین هاووڵاتی سڤیل لە گوندەكانی بۆكریسكان و زار گەلی لە بناری قەندیل زەرەرمەندی
گییانی و ماڵی بوونە.
رواندز / موڕشید برادۆستی