نووسەرێكی ئەمەریكا: عێراق بووكەڵەی دەستی ئێرانە

نووسەرێكی ئەمەریكی لە وتارێكدا لە پێگەی " The American Conservative "  لە ژێر ناونیشانی "عێراق بووكەڵەیەك بە دەست ئێرانەوە" ئاماژەی داوە، ئەمەریكا بە خوێنی سەربازانی و سامانی خەڵكەكەی ڕژێمی سەدامی لەناو برد، دواتر وڵاتەكەی وەك دیارییەك پێشكەشی تاران كرد تا عێراق بكاتە خاڵی دەستپێكی داگیركاری و پاوانخوازی بۆ وڵاتانی تری ڕۆژهەڵاتی ناوەڕاست، ئێستەش لە عێراق ڕێرەوێكی ئارام بۆ تاران دروست كراوە، تا چەكدار و چەك بگەیەنێتە هێزە بریكارەكانی لە سووریا و ئێران.

ڕۆد دریهەر نووسەری ئەمەریكی لە وتارەكەیدا دەڵێ، پیاسەیەك بە نێو بازاڕەكانی عێراق بكەی، دووكان و ماركێتەكان لەلایەن كاڵای ئێرانییەوە داگیر كراون، شیر و ماست و مریشك و هەموو كەلوپەلەكانی تر، هاوكات تەلەڤزیۆنەكانی عێراق بەردەوام زنجیرە درامای ئێرانی و ئەو بەرنامانەی هاوسۆزن لەگەڵ ئێران پەخش دەكەن و باڵەخانەكان بەرز دەبنەوە، بەڵام بە چیمەنتۆی ئێرانی، كاتێك گەنجان و پیاوانی عێراقیش هەست بە بێ ئومێدی و بێزاری دەكەن، ئێران حەبی هۆشبەریان بە بەردەوامی بۆ دەنێرێت، چونكە هێنانی حەب لە ئێرانەوە بۆ ناو عێراق بە ئاسانترین ڕێگە و بە ئاسایی ڕێی پێ دەدرێ.

هەروەها دەڵێ، ئەمە تەنیا بەشێكیەتی، ئەوەی تر لە تەواوی وڵاتەكە میلیشیاكانی سەر بە ئێران بڵاو بوونەتەوە، كار دەكەن بۆ دروستكردنی ڕێڕەوێكی پارێزگاری گواستنەوە تا سەربازان و چەك بۆ ئەو هێزانەی ئێران بنێرن كە لە سووریا و لبنان شەڕ دەكەن، لە هۆڵ و ژووری دانیشتنەكانی بەرپرسانی باڵای حكوومەتی عێراقیش تا خوارەوە، ئەمە بە پیرۆز ناو دەبەن و زۆرێكیشیان لەلایەن ئێرانەوە سەركردایەتیی دەكرێن.

ڕۆد دریهەر دەڵێ، كاتێك ویلایەتە یەكگرتووەكانی ئەمەریكا 14 ساڵ پێش ئێستە جەنگی بۆ لەناوبردنی سەدام حوسێن ئەنجام دا، عێراق لە گۆشەیەك مایەوە كە لە ڕۆژهەڵاتی ناوەڕاست بەرەو بەری ڕۆژهەڵات و ڕۆژئاوا كرایەوە، ئەمەریكا ڕێژەیەكی زۆری خوێن و سەرمایەی خۆی خەرج كرد، چوار هەزار و 500 ئەمەریكی گیانی خۆیان بەخشی و زیاتر لە تریلیۆنێك دۆلار لە ڕزگاركردنی عێراق خەرج كرا، بەڵام لە یەكەم ڕۆژی ڕووخانی سەدام، ئێران ئەمەی بە دەرفەتێكی گەورە زانی، بۆ دروستكردنی دەوڵەتی سیخوڕ و بووكەڵەی دەستی خۆی لە عێراق، ئەمەش سەركەوتنێكی گەورەیە، چونكە سەدام حوسێن پێشتر ماوەی هەشت ساڵ شەڕێكی خوێنانی دژ بە تاران بەرپا كرد و چەكی كیمیاییشی لە جەنگەكە بەكار هێنا،  بۆیە ئێستە عێراق هیچ كاتێك نابێتە هەڕەشە بۆ سەر ئێران، بەڵكو بووەتە خاڵی دەست پێكردن و بڵاوكردنەوەی پێگە و پاوانخوازی ئێران لە ناوچەكە، لەو كێبەركێیەشدا ئێران سەركەوت و ویلایەتە یەكگرتووەكانی ئەمەریكاش شكستی خوارد.

هێمای بۆ ئەوەش كردووە، ئەمەریكا هیوای دەخواست لە ژینگە نەخۆشەكەی ڕۆژهەڵاتی ناوەڕاست دیموكراتییەكی بەهێز دروست بكات، بەڵام بە تەواوی شكستی خوارد لە شوێنی ئەوەی عێراق بكاتە باشترین شوێنی ڕۆژهەڵاتی ناوەڕاست، بە خوێن و سامانی خۆی خاكەكەی كردووەتە هەرێمێك بە حوكمی دیفاكتۆ خستوویەتییە ژێر دەسەڵاتی تاران.

ئەوەیشی ڕوون كردووەتەوە، ئێستە لە سیاسەتی دەرەوەی ئەمەریكا جەنگێكی قووڵ هەیه، كە لەلایەن پارێزخوازانەوە بەرامبەر بە سیاسەتی پێشووی دەرەوەی ئەمەریكا دەستی پێ كردووە، خەڵكی هەموو وای دەبینن كە سەرۆك دۆناڵد ترەمپ بەو شێوەیە توند و پارێزخوازە، بەڵام ئەمە بەرەی پارێزخوازانن، نەك دۆناڵد ترەمپ كە كۆشش دەكەن بۆ گۆڕینی سیاسەتی دەرەوەی ئەمەریكا و ڕاستكردنەوەی هەڵەكانی پێشووی ئەمەریكا، ئەمە تووڕەیی بیری ئایدلۆجیای ئەمەریكایە بەرامبەر بە پەراوێزخستنی سەركەوتنەكان و بەخشینی خوێن و سامانی وڵات لە پێناوی هیچدا، ئەو جەنگە تاكر كارلسۆن سەرۆكایەتیی دەكات و ئەوان لە گفتوگۆ و ناكۆكی قورسدا لەسەر پرسی سووریا و ڕووسیا و عێراق و ئێران، بەگشتی پارێزخوازان "محافیزكاران"یش سەردەكەون، ئەمە هیچ پێوەست نییە بە ترەمپەوە، بەڵكو بیری كۆمەڵگەی ئەمەریكییە وەك چۆن دوای ڕووداوەكەی 11ی سێپتێمبەر هەمووان هاتنە سەرخەت و داوای تۆڵەیان دەكرد، ئێستەش هەمان شێوە و ئاراستەیە.

جێی باسە پارێزخوازان بەشێكی سەرەكی و گرنگی نێو پارتی كۆماری ئەمەریكان، كە دۆناڵد ترەمپی سەرۆكی ئێستەی ئەمەریكاش كاندیدی ئەو حزبە بوو لە هەڵبژاردنەكان و بە پشتیوانی حزبەكەی و خەڵكی ئەمەریكا توانی لە ململانێكانی هەڵبژاردن سەر بكەوێت و ببێتە بە سەرۆكی ویلایەتە یەكگرتووەكانی ئەمەریكا، نووسەران و شارەزایان لە هەڵمەتی هەڵبژاردنەكانی ترەمپ و دوای دەرچوونیشی پێشبینی ئەوەیان دەكرد كە ترەمپ گۆڕانكاری ڕیشەیی لە سیاسەتی دەرەوەی ئەمەریكا بكات، ئێستەش ئەوەی دەیبینن و دەركەوتووە، گۆڕانی ڕیشەیی و بنەڕەتین كە سیاسەتی دەرەوەی ئەمەریكا بەخۆیەوەی بینیوە.

سەرچاوە/ The American Conservative



وشە - باز ئه‌حمه‌د


PM:02:51:29/07/2017




ئه‌م بابه‌ته 7130 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌